فارن فنڈنگ :ساریاں جماعتاںقصوروار
لكهت:اشرف شریف
سابق سینیٹر طارق چوہدری صاحب نے فارن فنڈنگ سلسلے دا دوجا کالم پڑھ کے تشنگی برقرار رہن دا دسیا۔ طارق چوہدری اوہناں ورھیاں وچ سینٹ دے سرگرم رکن رہے جدوں پاکستان وچ افغان جہادامریکہ تے سعودی عرب دا کردار بڑا اہم ہوندا سی۔ اوہ دس رہے سن کہ نوازشریف نے شاہ فہد توں وی بینظیر بھٹو نوں ہران لئی انتخابی خرچیاں دے ناں تے فنڈ لئے۔ میں پچھیا اسامہ بن لادن دے فنڈز دین دے گواہ مل سکدے نیں؟ طارق چوہدری نے خالدخواجہ تے کرنل امام دے ناں لئے۔ دوویں کجھ ورھے پہلاں پراسرار حالات وچ قتل ہو چکے نیں۔ کرنل امام نال میریاں اپنیاں کجھ ملاقاتاں رہیاں نیں۔ ایہناں دے خاندان نال مراسم ہن وی قائم نیں۔ ہو سکدا اے کجھ لوک زندہ ہون جو ایس لین دین دے گاہ رہے نیں۔ فارن فنڈنگ دے معاملے تے ہور وضاحت لئی میں الیکشن کمیشن دے سابق سکیرٹری کنوردلشاد توں پچھیا کہ جے اوہناں نوں ایہ معاملہ سلجھان دا ہدف دتا جاندا تے اوہ کیویں حل کردے۔ کنوردلشاد نے پہلے تے دو ورھے توں اجلاس تے اجلاس کرن والی سکروٹنی کمیٹی نوں وقت تے قومی وسیلے ضائع کرن دے مترادف قرار دتا فیر دسیا کہ جے اوہناں نوں کم دتا جاندا تے اوہ سٹیٹ بینک توں فارن فنڈنگ اکائونٹس دیاں تفصیلاں منگدے۔ ایف بی آر تے ایف آئی اے توں ریکارڈ لیندے تے تن مہینے وچ کیس ختم کر دیندے۔ سیاسی پارٹیاں ولوں معاملے نوں لمکان دی نیت نال دتیاں گئیاں ساریاں درخواستاں نوں باہر سٹ دیندا۔اوہناں دے خیال وچ سکروٹنی کمیٹی نے سیاسی جماعتاں دے اعتراضات تے مبنی درخواستاں نوں لوڑ توں ودھ اہمیت دے کے معاملے نوں لمکایا۔
میرے پچھلے دو کالماں نوں رائے عامہ تشکیل دین والے دوستاں نے بڑی دلچسپی نال پڑھیا۔ ایہو وجہ سی کہ میڈیا تے اصل قنونی عبارت دی تھاں سیاسی تشریح دا ہنگامہ اے۔ ایہدے نال قنونی پوزیشن کنڈ پچھے چلی گئی تے بندیاں دی کچی پکی رائے قنون دے طور تے زیربحث آ گئی۔ اوہناں کالماں وچ سوال اٹھایا سی کہ فارن فنڈنگ تے ممنوعہ فنڈنگ دا معاملہ کس قنون نال طے کیتا جاوے گا۔ میں کنوردلشاد توں پچھیا کہ تحریک انصاف خلاف کاروائی پولیٹیکل پارٹیز آرڈر 2002 دے تحت ہووے گی یاں الیکشن ایکٹ 2017ء دے تحت۔ کنور دلشاد دے مطابق ملک وچ کئی قنون وقتاً فوقتاً بن دے رہے‘ جمہوری حکومتاں تے مارشل لاء دور وچ الیکشن قنون ہیٹھ اُتے بنے۔ جنرل مشرف نے پولیٹیکل پارٹیز آرڈر بنایا جو 1962ء دا ترمیم شدہ قنون اے۔ اک لمی احتجاجی تحریک دے بعد قائم ہون والی انتخابی اصلاحات کمیٹی نے کوئی کم نہ کیتا سگوں سارے پرانے قنوناں نوں اکٹھا کرکے اوہدا ناں الیکشن ایکٹ 2017 رکھ دتا۔ نواں قنون بناندے تے اسیں کہہ سکدے سی کہ 2002ء پی پی او دی تھاں الیکشن ایکٹ 2017ء دے تحت کاروائی ہووے گی۔ ایہ پرانے قنون ای نیں ایہدے وچ نویں چیز کیہ اے۔ اپوزیشن اتحاد ولوں الیکشن کمیشن دے سامنے احتجاج عددی اعتبار نال ماٹھا رہیا پر مریم نواز تے مولانا دی شرکت پاروں اوہنوں میڈیا کوریج مل گئی۔ ایس طرح دا احتجاج تحریک انصاف وی کر چکی اے۔ جدوں اوہ انتخابی دھاندلی دی تحقیقات دا مطالبہ کر رہی سی ایس طرح دے دھرنے نما احتجاج پیپلزپارٹی دے اعتزاز احسن تے وکیل رہنما علی احمد کرد جنرل پرویزمشرف دے کاغذات نامزدگی داخل کران ویلے کر چکے نیں۔
ایازامیر نے حوالا دتا اے کہ جنرل پاشا جدوں ڈی جی آئی ایس آئی سن تے اک اہم معاملے تے پارلیمنٹ دا ان کیمرہ اجلاس ہویا۔ ایس اجلاس وچ سارے واری واری اپنی رائے دا اظہار کر رہے سن۔ مولانا فضل الرحمن دی واری آئی تے اوہناں نے عسکری ادارے تے پورے ریاستی نظام تے ڈاڈھی تنقید خطیبانہ رنگ وچ جھاڑ دتی۔ اوہناں دی تقریر دے آخر تے جنرل پاشا جواب دین لئی اٹھے تے آکھیا کہ مولانا جو کجھ فرما رہے سن ایہدا جواب بڑا تلخ اے پر بزرگاں دے احترام وچ چپ رہیا بس اک گل سن لوو کہ مولانا لیبیا توں فنڈ دے معاملے دا جواب دے دین۔ کہندے نیں ایس گل تے پورے ایوان نوں سپ سنگھ گیا مولانا دی حالت ایہہ کہ کٹو تے لہو نہیں۔ اجہے کجھ واقعات کتاباں وچ لکھے نیں کہ مولانا کشمیر کمیٹی دے چیئرمین دی حیثیت نال سعودی عرب تے خلیجی ملکاں وچ جاندے تے اوہناں دیاں ملاقاتاں اجہے بندیاں نال ہوندیاں جو اوہناں دی جماعت تے مدرسیاں نوں چوکھی رقم بطور چندا دین تے تیار ہوندے۔
ریکارڈ کسے جماعت دا صاف نہیں۔ پیپلزپارٹی تے وی فارن فنڈنگ دا الزام اے۔ ایہ فارن فنڈنگ جہڑے اکائونٹس توں ہوئی اوہناں دا ناں منی لانڈرنگ وچ آن دی اطلاع اے۔ ایہناں حالات وچ قوم دے کول دو راہ نیں۔ قوم طے کر لوے کہ اوہنوں فارن فنڈنگ دی ایس تعریف نال اتفاق نہیں جو کسے خاص تشریح دی پابند اے۔ دوجا ایہ کہ جو قنون لاگو اے اوہ ساریاں لئی اکو جیہا ہون دا مطالبہ کیتا جاوے۔ ساڈے ایتھے عام بندہ اک ڈری ہوئی بھیڈ اے سیاسی تے مذہبی رہنما چھری وکھا کے اوہنوں ڈراندے نیں۔ ایہ عام بندہ وڈے طاقتوراں دے خلاف زبان نہیں کھول لکدا‘ گھٹ طاقت والے اینے بے حس ہو چکے نیں کہ اوہ سامنے ہوندے جرم نوں جھٹلا دیندے نیں۔ الیکشن ایکٹ ساڈیاں جماعتاں دی لوڑ پوری نہیں کردا تے بنایا کیوں سی؟ ایہنوں حتمی قنون منیا گیا اے تے فیر حزب اقتدار ہووے یاں حزب اختلاف قنون دے سامنے سر جھکانا ہووے گا۔ ساریاں جماعتاں نے غیرملکی فنڈنگ لئی اے‘ فارن فنڈنگ تے ممنوعہ فنڈنگ وچ فرق نہیں کیتا جا رہیا۔ اوورسیز ونگ ایہو کم کردے نیں۔ کیہ ساریاں نوں کالعدم قرار دے دتا جاوے؟۔٭٭
