ایہہ کاروبار اے صاحب جی!

لكهت: مظہر برلاس

ایف بی آر دے سابق چیئرمین شبرزیدی ایس دعوے نال گل بات دا آغاز کردے نیں کہ پاکستان دی مالیات دے حوالے نال جنی جانکاری اوہناں کول اے اوہ شاید کسے ہور پاکستانی کول نہیں۔ شبرزیدی ہور کہندے نیں کہ اوہناں نے ایس شعبے وچ چالھی ورھے گزارے اوہ ایس دوران سٹیٹ بینک دے بورڈ وچ وی رہے تے پورے پنج ورھے سٹاک ایکسچینج دے ڈائریکٹر وی۔ مالیات دی ایس سوجھ بوجھ دے دعوے مگروں شبرزیدی کہندے نیں کہ مالیاتی بے ضابطگیاں دی تفتیش کرنا فوجیاں دا کم نہیں‘ جے ٹریس اینڈ ٹریک سسٹم آ جاوے تے بہت ساریاں تھاواں توں چوری ختم ہو جاوے۔ مالی بے ضابطگیاں دی تفتیش عدالتاں‘ بیوروکریسی تے فوج دا کم نہیں‘ ایہ کم آڈٹ کرن والے پروفیشنلز دا اے۔ ایف بی آر‘ ایس ای سی پی‘ ایف آئی اے‘ نیب تے سٹیٹ بینک دے فنانشل کرائمز دے سیکشن بند کرکے فنانشل ریگولیٹری بنانی چاہیدی اے۔ جہدا دفتر اسلام آباد توں کدھرے دور ہووے‘ میری ایس تجویز وچ رکاوٹ وزیراعظم عمران خان نہیں سگوں معاشرہ تے سسٹم بنیا کیوں جے کاروباری بندے تے بیوروکریٹس نہیں چاہندے کہ مالیاتی معاملیاںتے پروفیشنل ماہرین ویکھن۔ ریونیو سروس دی تجویز تے ایف بی آر دے سارے ملازم مخالف بن گئے۔
سرکاری ملازماں دیاں تنخواہواں جان بجھ کے گھٹ رکھیاں گئیاں تاں جے قابل لوک نہ آ سکن خریداری تے شناخت ظاہر نہ کرنا کاروباری طبقے دی بدترین بددیانتی اے۔ نوازشریف تے آصف زرداری دے ای کاروبار نیں جہناں وچ ڈاکومینٹیشن نہیں۔ ایہدے وچ سٹیل رولنگ مل‘ شوگر‘ پولٹری تے رئیل اسٹیٹ شامل نیں۔ مریم نواز تے بلاول بھٹو زرداری نوں تنقید توں علاوہ کدی کوئی پلان پیش کردے نہیں ویکھیا۔ 1992ء وچ ڈی ریگولیشن اکانومی دے تحت پروٹیکشن اکنامک آرڈیننس جاری ہویا ایتھوں منی لانڈرنگ دی شروعات ہوئی اک قنون ہوندا سی کہ پاکستانی بیرون ملک اثاثے نہیں رکھ سکدے فیر ایہ قنون کتاباں وچ دب گیا۔ مالیات وچ چالھی ورھے دا تجربہ رکھن والے شبرزیدی دیاں گلاں دا بغور جائزہ لیا جاوے تے اوہناں دیاں کئی گلاں ٹھیک نیں پر کجھ گلاں اجہیاں نیں جہناں نوں اوہ بڑا سادہ سمجھدے نیں حالاں کہ اوہ مشکل ترین مرحلے نیں۔ ایہناں سادہ گلاں توں پہلے اوہناں نوں ایس گل دا پتہ ہونا چاہیدا اے کہ اسلامی تریخ وچ کامیاب ترین خلیفہ حضرت عمرفاروق نوں سمجھیا جاندا اے۔ ایہدی واحد تے وڈی وجہ حضرت عمرفاروق دا سخت گیر ہونا ای اے۔ معاشرے وچ جدوں تک لوکاں نوں سزاواں دا ڈر نہ ہووے لوک جرماں توں باز نہیں آئوندے۔
جے پاکستان وچ لوکاں نوں سزاواں دا ڈر ہوندا تے اوہ کاروبار دی ڈاکومینٹیشن ضرور کردے سزاواں توں بچن لئی ای تے پاکستان دے وڈے سیاستدان اجہے کاروبار کردے نیں جہناں دی ڈاکومینٹیشن نہیں۔ شبرزیدی نے ٹھیک کہیا کہ ساڈے کاروباری بندے خریداری نوں ظاہر نہیں کرنا چاہندے‘ اوہ چاہندے نیں کہ اوہناں دی پچھان نہ ہووے۔ ایہ وڈی بددیانتی صرف ایسے لئی اے کہ ساڈے ایتھے لوکاں نوں ایس گل دا ڈر ای نہیں کہ جے اوہناں نے خریداریاں نوں چھپایا تے ایہدا خمیازا سخت سزاواں دی صورت وچ بھگتنا پوے گا۔ شبرزیدی دی ایہ گل وی ٹھیک اے کہ بلاول بھٹو زرداری تے مریم نواز تنقید تے بڑی کردے نیں پر کوئی منصوبہ پیش نہیں کردے۔ شبرزیدی دی ایہ گل وی ٹھیک اے کہ ایف آئی اے‘ فوج‘ نیب‘ ایف بی آر‘ بیوروکریسی تے عدالتاں راہیں کرپشن نہ پھڑی جاوے سگوں مالیاتی ماہرین دے راہیں کرپشن پھڑی جاوے۔ شاندار آڈیٹرز دے راہیں کرپشن پھڑی جاوے۔ گلاں تے ٹھیک نیں پر ساڈے ایتھے مافیاز اینے مضبوط نیں کہ سانوں کرپٹ بندیاں دا راہ روکن لئی ایہناں اداریاں دا رخ کرنا پیندا اے۔ جے ساڈے کول ٹریس اینڈ ٹریک پالیسی بن جاندی تے لوک ایہدے تے عمل کردے تے یقینی طور تے بہتری ہوندی پر بدقسمتی دا سفر تے اوس ویلے ای شروع ہو جاندا اے جدوں ٹیکس لین والے ای ٹیکس چوری دا راہ وکھاندے نیں۔ ساڈے ماہرین کرپشن دے ثبوت ای نہیں رہن دیندے شاید وائٹ کالر کرائمز دے وڈے کردار ساڈے ایتھے ای نیں۔
ساڈیاں حکومتاں کرپشن نوں تحفظ دیندیاں رہیاں نیں ساڈے کاروباری بندے انتظامیہ نوں چکر دیندے نیں اپنے لوکاں تے ریاست نوں وکھرا دھوکھا دیندے نیں ساڈے ایتھے جھوٹ دے راہیں کاروباری عروج حاصل کیتا جاندا اے بجلی تے گیس چوری نہیں ہوندی؟ کیہ ٹیکس چوری نہیں ہوندا؟ کیہ جائیداداں نوں نہیں چھپایا جاندا؟ اوہ قنون کنہے دبایا کہ پاکستانی بیرون ملک جائیداداں نہیں رکھ سکے۔ ایہ ٹھیک اے کہ سرکاری ملازماں دیاں تنخواہواں گھٹ نیں پر کیہ ایہ ٹھیک نہیں کہ ساڈے سرکاری ملازم چوری چکاری روکن وچ نکام ہوئے نیں ساڈے سرکاری ملازم اپنے فرائض ٹھیک طریقے نال ادا کر رہے نیں؟
دوستو! مسئلیاں دی نشاندہی کر دینا سوکھا اے مزا تے فیر اے کہ مسئلیاں نوں ختم کر دتا جاوے۔ اسیں سارا دن ایہو گردان سن دے آں پر کوئی مداوا نہیں کردا۔ مداوا اوس ویلے ہووے گا جدوں قنون دی نظر وچ سارے اک ہون گے جدوں میرا بندہ تے تیرا بندہ دی گردان نہیں ہووے گی۔ مداوا اوس ویلے ہووے گا جدوں کوئی اپنے کرپٹ بھائی نوں وی رگڑ دیوے گا۔ پورے یورپ وچ شام ساڑھے پنج وجے دکاناں بند ہو سکدیاں نیں پر تہاڈا تاجرانج نہیں کردا۔
ایس چلن نے پورے معاشرے دی صحت نوں خراب کر دتا اے نبی پاکؐ ہوراں فرمایا سی کہ سویر وچ برکت اے ساڈی ادھی توں ودھ قوم ستی رہندی اے اسیں سویرے جلدی نہ اٹھن نوں بہت وڈا فیشن سمجھنے آں۔ اسیں عدالتاں وچ جھوٹ بولنے آں۔ ساڈے لیڈر ایہناں جلسیاں وچ جھوٹ بولدے نیں‘ ٹی وی چینلاں تے جھوٹ بولدے نیں تے جے کوئی سوال اجیہا آ جاوے تے فیر آئیں بائیں شائیں کردے نیں۔ تہاڈے معاشرے وچ ملاوٹ عام اے جے کہیا جاوے تے جواب آئوندا اے ایہ کاروبار صاحب جی!۔