‘‘سینیٹ انتخابات تے سیاسی چالاں’’

اپوزیشن خرید و فروخت دا عمل ختم نہیں ہون دینا چاہندی

تحریر: اکرم عامر سرگودھا

اپوزیشن جماعتاں دے اتحاد پی ڈی ایم دے سربراہ مولانا فضل الرحمان نے اسلام آباد لانگ مارچ دی تاریخ دا اعلان کر کے حکومت نوں ٹف ٹائم دین دی چال چلی سی، کہ پی ٹی آئی دے صدر مملکت اسلامی جمہوریہ پاکستان عارف علوی نے سینٹ انتخابات، جس دا شیڈول فروری دے ایس ہفتے وچ جاری ہوئے گا دے حوالے نال صدارتی آرڈیننس 2021 جاری کر کے اپوزیشن نوں نویں امتحان وچ پا دتا اے، ہن اپوزیشن نوں اسلام آباد لانگ مارچ نوں کامیاب بنان لئی ایس دی تیاری دے نال سینٹ الیکشن اوپن بیلٹ دے حوالے نال جاری کردہ آرڈیننس دے سلسلے وچ قانونی جنگ وی لڑنی پئے گی، کیوں جے اپوزیشن سمجھدی اے کہ اوپن بیلٹ دے تحت سینٹ الیکشن حکومت دے مفاد وچ ہوئے گا ، گو کہ صدارتی آرڈیننس سپریم کورٹ دے کسے فیصلے اُتے اثر انداز نہیں ہو سکے گا، تے اپوزیشن نے سینٹ انتخابات خفیہ رائے شماری دے ذریعے کران لئی عدالت عظمیٰ نال رجوع وی کر لیا اے۔ جے سینیٹ انتخابات دے حوالے نال جاری کردہ صدارتی آرڈیننس 2021 عدالت معطل کر دیندی اے تے فیر سینٹ الیکشن سابقہ طریقہ کار دے مطابق خفیہ ووٹنگ دے ذریعے ہون گے، جس وچ بقول حکومتی وزراء بے دریغ پیسہ خرچ ہوئے گا یعنی ارکان اسمبلی دیاں ’’موجاں ہی موجاں‘‘ ہون گیاں۔ جیہڑا کہ ماضی وچ ویکھن وچ وی آیا اے حکومت ایہہ وی کہندی اے کہ ارکان اسمبلی دی منڈی لگن توں روکن لئی ایہہ آرڈیننس جاری کیتا گیا، مزید ایہہ کہ پیپلز پارٹی تے ن لیگ لوکاں دے ضمیر کیوں خریدنا چاہندی اے، قوم ویکھ لوے کون کرپٹ نظام دا خاتمہ نہیں چاہندا، وفاقی وزیر خارجہ شیخ رشید احمد اعتراف کردے نیں کہ آئینی ترمیم لئی پی ٹی آئی نوں ایوان وچ دو تہائی اکثریت حاصل نہیں، ایس لئی عدالتی فیصلے نوں قبول کرن گے۔ وفاقی وزیر اطلاعات شبلی فراز نے ایس معاملے اُتے اپوزیشن نوں اک وار فیر آڑے ہتھاں لے لیا اے تے کہیا اے کہ کرپٹ ٹولہ ملک وچ پیسے دی سیاست ختم نہیں ہون دینا چاہندا، وزیراعلیٰ پنجاب دے مشیر شہباز گل نے تے ارکان اسمبلی نوں بکریاں نال تشبیہ دیندے ہوئے کہیا اے کہ اپوزیشن خرید و فروخت دا عمل ختم نہیں ہون دینا چاہندی۔
گل ہو رہی سی صدارتی آرڈیننس دی تے جے عدالت نے ایہنوں بحال رکھیا تے کوئی ووٹ خفیہ نہیں رہوے گا۔ انتخابات وچ حصہ لین والی کسے وی پارٹی دا سربراہ یا نمائندہ کوئی وی ووٹ ویکھ سکے گا، صدر مملکت دے دستخطاں توں جاری ہون والے ایس آرڈیننس نوں الیکشن ترمیمی آرڈیننس 2021 دا ناں دتا گیا اے جس وچ الیکشن ایکٹ 2017 دی شق 81، 122 تے 185 وچ ترمیم کیتی گئی اے۔ آرڈیننس وچ کہیا گیا اے کہ کیوں جے سینٹ تے قومی اسمبلی دے اجلاس نہیں ہو رہے، ایس لئی صدر اسلامی جمہوریہ پاکستان ایہناں حالات وچ سمجھدے نیں کہ ایہہ اقدام فوری طور اُتے ضروری اے، صدر مملکت عارف علوی نے آئین دی آرٹیکل 89 دی ذیلی شق 1 دے تحت ایہہ آرڈیننس جاری کیتا اے، جس دا اطلاق فوری طور اُتے پورے ملک وچ ہوئے گا ، تاں آرڈیننس وچ سینٹ الیکشن وچ خفیہ یا اوپن ووٹنگ دے معاملے نوں سپریم کورٹ دے فیصلے نال مشروط کیتا گیا اے، ایسے طرح عدالت نے جے سینٹ انتخاب نوں آئین دی شق 226 دے تحت کرانا قرار دتا تے خفیہ ووٹنگ ہوئے گی جے عدالت نے سینٹ الیکشن نوں صدارتی ایکٹ دے تحت کران دا حکم دتا تے اوپن ووٹنگ ہوئے گی۔ ایہہ تے سی صدارتی آرڈیننس 2021 دا مختصر احوال، ایتھے توجہ طلب امر ایہہ وے کہ فروری دے جاری ایس ہفتے وچ سینٹ الیکشن دا شیڈول جاری ہون جا رہیا اے تے عین ایسے ویلے حکومت نے صدارتی آرڈیننس جاری کر کے اپوزیشن جماعتاں نوں دوہرے امتحان وچ پا دتا اے۔ ہن اپوزیشن نوں لانگ مارچ دی تیاری دے نال سینٹ الیکشن دے حوالے نال قانونی جنگ اُتے وی پوری توجہ دینی ہوئے گی۔
پی ڈی ایم دے سربراہ مولانا فضل الرحمان تے ایہناں دے اتحادی پر امید نیں کہ اوہ مارچ دے آخری ہفتے وچ اسلام آباد وچ لانگ مارچ کر کے کپتان دی حکومت نوں ڈیگن وچ کامیاب ہو جان گے، بقول اپوزیشن قائدین ایس لئی بھرپور تیاریاں کیتیاں جا رہیاں نیں تے ایہناں (اپوزیشن) دے کول کئی آپشنز محفوظ نیں جد کہ حکومت اپوزیشن قیادت نوں آئے دن آفٹر شاک جھٹکے لا رہی اے ، اپوزیشن قائدین دے پرانے کھاتے کھل چکے نیں جنہاں دا از سر نو حساب کتاب ہو رہیا اے، سالہا سال توں زیر قبضہ اپوزیشن جماعتاں توں رقبے واگزار کرائے جا رہے نیں ایہناں توں اثاثیاں بابت پچھ گچھ ہو رہی اے تے اکثریت اپوزیشن سیاستداناں دے اثاثیاں نوں آمدن توں ودھ قرار دتا جا چکیا اے جس اُتے اپوزیشن دی تلملاہٹ پوری قوم ویکھ تے سن رہی اے، پی ڈی ایم دی قیادت حکومت ولوں ایہنوں بدترین انتظامی کاروائی قرار دے رہی اے تے حکومت ایس بارے کہندی اے کہ اپوزیشن کرپشن تے منی لانڈرنگ وچ ملوث اے ایہناں دے احتجاج دا مقصد صرف محفوظ رستہ منگنا اے، پر کپتان کہندے نیں کہ اوہ کسے صورت کرپٹ اپوزیشن قائدین نوں این آر او نہیں دین گے اپوزیشن قیادت وی ایہو لفظ کپتان لئی دہرا رہی اے کہ اوہ کپتان نوں نسن نہیں دین گے، تے اقتدار توں اتار کے ایس دا احتساب کرن گے ایہنوں (کپتان نوں)این آر او نہیں دین گے، پی ڈی ایم سربراہ تے ایتھوں تیکر کہندے نیں کہ حکومت لانگ مارچ دے اعلان توں خوفزدہ ہو کے بوکھلاہٹ دا شکار ہو گئی اے تے اول فول بول رہی اے، اپوزیشن دے خلاف اوچھے ہتھکنڈے استعمال کیتے جا رہے نیں۔ مولانا فضل الرحمان نے ایہہ وی بڑھ ماری اے کہ اپوزیشن دا احتجاج آئے دن ودھدا جائے گا تے احتجاج دی حکمت عملی وی ویلے دے نال تبدیل کردے رہن گے، ایس توں پہلاں عوام تے حکومت اُتے کجھ اوپن نہیں کرن گے تاں جے حکومت پیش بندی نہ کر پائے، اپوزیشن جلدی حکومت نوں انج دی کاری ضرب لائے گی کہ ایہناں (کپتان تے کابینہ دے کھلاڑیاں) دے پیر اکھڑ جان گے، تے ایس طرح حکومت تے اپوزیشن وچ سیاسی گرما گرمی عروج اُتے اے۔ کالم زیر تحریر سی کہ یاد آیا پچھلے دناں مسلم لیگ ن دے سینئر سابق وفاقی وزیر دانیال عزیز نے ایہناں توں سرکاری رقبے واگزار کران دے حوالے نال جاری حکومتی موقف بارے وضاحت کیتی کہ میرا کسے سرکاری رقبے اُتے کوئی قبضہ نہیں سی تے نہ ای میں کسے سرکاری رقبہ جس اُتے قبضہ ہوئے کابینی فشری (فائدہ چکن والا) واں، حکومت نے میری کردار کشی کیتی اے۔ شاید مسلم لیگ ن دے رہنما دانیال عزیز ایہہ بھُل چکے نیں کہ اینٹی کرپشن سرگودھا پولیس نے 2020 دے شروع وچ جیہڑے سینکڑاں کینال اراضی سرگودھا دی تحصیل سلانوالی دے مختلف علاقیاں توں واگزار کرائی سی ایس دے پٹہ داران دے والد محترم سن، جس دا ٹینڈر ختم ہوئے 12 ورہے توں ودھ لنگھ چکے سن تے قومی خزانے وچ ایہناں ادوار دا کوئی پائی پیسہ جمع نہیں کروایا گیا سی جد کہ رقبہ بدستور دانیال عزیز دے والد محترم دے مزارع کاشت کر رہے سن۔ ایس بارے دانیال عزیز موصوف نے کوئی وضاحت نہیں کیتی کہ ایہناں پٹہ داراں توں سالانہ وصول کون کر رہیا سی؟
جد کہ ملک وچ سیاسی گڑ بڑ پاروں حالات ایس نہج اُتے اپڑ چکے نیں کہ غریب عوام پس کے رہ گئے نیں ، مہنگائی، بیروزگاری، غربت، افلاس تے لاقانونیت نے ملک نوں ایس سطح اُتے اپڑا دتا اے کہ مختصر عرصے دے دوران کئی شہراں توں اجتماعی خود کشیاں دے واقعے رپورٹ ہوئے نیں جیہڑے 2018-10-20 توں کئی گنا زیادہ ہون دے باعث تشویشناک صورت اختیار کر چکے نیں، جے ایہو صورتحال رہی تے خود کشیاں دی شرح بھیانک حالات اختیار کر لوے گی۔
سو گل کتھوں کتھے نکل گئی گل ہو رہی سی حکومت تے اپوزیشن دے اک دوجے نوں ٹف ٹائم دین دی تے دونویں پاسے توں اک دوجے نوں خوب جھٹکے دتے جا رہے نیں، ایہناں دے کرنٹ دے نتیجے وچ کون زیر ہوندا اے یا کون بچ نکلدا اے ایہہ کہنا قبل از وقت اے، بہرحال سیاسی اکھاڑہ خوب سجیا اے۔ سیاسی چالاں خوب چلیاں جا رہیاں نیں جیہڑا عوام لئی بُری طرح نقصان دہ اے کیوں جے ہر دور وچ جاری سیاسی لڑائی نے ہن ملک نوں ایس نہج اُتے اپڑا دتا اے کہ عوام دی اکثریت سیاست تے سیاستداناں توں بیزار نظر آندی اے ۔ لوڑ ایس امر دی اے کہ حکومت تے اپوزیشن تنقید برائے تنقید توں اجتناب کر کے عوام دے بارے وچ سوچن جیہڑے آئے دن اجتماعی خود کشیاں اُتے مجبور نیں نہیں تے فیر ماضی وانگوں عوامی انقلاب آئے گا، جیہڑا حکومت تے اپوزیشن دونواں نوں بہا کے لے جاوے گا تے کوئی تیجی طاقت اقتدار وچ ہوئے گی۔