کیہ عروج‘ کیہ زوال!
لكهت:ارشاد بھٹی
ساڈے ساریاں دیاں اکھاں وچ اتھرو سن‘ وہیل چیئر تے بیٹھے کدی اوہ سخاوت ناز دا سر سینے نال لا کے پیار کردے اچی آواز وچ ہسن لگ جاندے‘ کدی اوہ حسن مراد دا منہ دوہاں ہتھاں نال پھڑ کے چمدے ہوئے رون لگ جاندے‘ کدی اپنے دوہاں ہتھاں نال اپنا منہ لکا کے نہ سمجھ آن والیاں آوازاں کڈھدے ہوئے سسکیاں بھرن لگ جاندے۔ پچھلے دس منٹ توں ایہو چل رہیا سی جدوں اوہناں نے اپنے نال تھیٹر وچ کم کرن والے سخاوت ناز تے اپنے فلماں دے ساتھی حسن مراد دے سر تے منہ واری واری سینے نال لا کے ڈھیر پیار کر لیا فیر اوہ وہیل چیئر تے بیٹھے بیٹھے دوہاں بانہواں نوں اٹھا اٹھا کے‘ گھما گھما کے سگوں اُتلے دھڑ نوں گھما گھما کے وہیل چیئر تے بیٹھے نچن لگ جاندے‘ سخاوت ناز‘ حسن مراد وی اوہناں دا ساتھ دے رہے سن سخاوت ناز تے حسن مراد دے نال منٹ دو منٹ نچن مگروں منہ چوں عجیب و غریب آوازاں کڈھدے ہوئے اوہناں نے سانوں اپنے فارم ہائوس ول اشارا کرکے ایہ دسنا‘ سمجھانا شروع کیتا کہ ویکھو ایہ سارا فارم ہائوس میرا اے‘ ویکھو میرا فارم ہائوس کناں وڈا اے‘ جدوں گل سمجھ آن دے بعد اسیں سارے ہس ہس کے تاڑیاں مار مار کے کہیا ماشاء اللہ خوبصورت فارم ہائوس اے۔ فیر پہلے اوہ ہسے تے فیر جدوں اٹھ دس کوششاں دے باوجود کوئی اک گل چھڈو‘ اک لفظ وی سانوں نہ کہہ پائے تے اچانک ہسدے ہسدے رون لگ پئے تے اسیں سارے اوہناں نوں چپ کران‘ اوہناں دا دھیان کسے ہور ول لان لگ گئے۔
دوستو! پتہ اے ایہ کون نیں جو فالج ہون تے پچھلے 20 ورھے توں وہیل چیئر تے نیں‘ ایہ کون نیں جو اشاریں دی گل سمجھ لیندے نیں‘ گل سمجھا لیندے نیں پر اک لفظ نہیں بول سکدے‘ پتہ اے ایہ کون نیں جہناں نوں بیوی‘ دھیاں چھڈ کے جا چکیاں‘ جہناں نوں مرشد مرشد کہن والے ہن پرت کے خبر نہیں لیندے‘ جہناں نوں ہر ویلے شاہ جی شاہ جی کہن والے ہن بھل چکے جو اج اپنے تھیٹر‘ فلم دے ساتھیاں نوں ویکھ کے خوشی تے غم دا اظہار کردے ہوئے بے قابو ہوئی جا رہے سن ایہ سید افضال احمد‘ افضال چٹا مطلب نامور اداکار افضال احمد نیں جھنگ وچ پیدا ہوئے‘ سید گھرانہ‘ ایچی سن توں تعلیم‘ پرکشش شخصیت شوبز دا شوق‘ گھرانہ کیوں جے مذہبی‘ خاندان دی مخالفت‘ گھر بار چھڈ کے شوبز دی دنیا وچ آنا‘ اشفاق احمد دے ڈرامے ’’اُچے برج لہور دے‘‘ کارواں سرائے وچ 18 سالہ افضال احمد دا 50 سالہ بڈھے دا کردار ادا کرنا‘ فیر منو بھائی دے ڈرامے جزیرہ وچ کمال اداکاری‘ دھڑا دھڑ فلماں ملنیاں شروع ہو گئیاں‘ تریہہ پینتی سالہ فلمی کیریئر‘ اردو‘ پنجابی‘ پشتو‘ اڑھائی سو فلماں‘ بنارسی ٹھگ، جیر ابلیڈ، سید ھا راستہ، نوکرو وہٹی دا، شریف بدمعاش، وحشی جٹ، چن وریام، ملے گا ظلم دا بدلہ ورگیاں ان گنت سپرہٹ فلماں‘ 90 دی دہائی عروج دا زمانہ‘ مذہب‘ صوفی ازم نال لگائو‘ حج‘ درجناں عمرے‘ فیر اک دن فالج دا اٹیک ہویا‘ جان بچ گئی پر بولنا گیا‘ معذور ہو گئے‘ وہیل چیئر تے آ گئے تے پچھلے 20 ورھے توں وہیل چیئر تے‘ حکومتی بے حسی‘ سب ادارے اوہناں نوں بھلائے بیٹھے‘ رہ گئی فلم انڈسٹری‘ ایہنے کسے لئی کیہ کرنا اے آپ کدوں دی مرحمہ‘ مغفورہ ہو چکی اے۔ ہاں اوہ اداکار‘ ہدایتکار‘ فلم ساز جہڑے کدی افضال احمد دے گھروں اٹھدے نہیں سن اج اوہناں دا راہ بھل گئے‘ افضال احمد دی بھین دس رہی سی کہ اداکار محمدعلی جدوں تک زندہ رہے‘ ہفتے وچ اک کھانا افضال احمد دے نال کھاندے‘ اداکار ندیم لہور آن تے ملن آئوندے نیں نہیں تے کوئی نہیں۔
افضال احمد ایس حال تک اپڑے کیویں‘ ایہ لمی کہانی‘ خلاصہ ایہ کہ ازدواجی زندگی اینی خوشحال نہیں سی‘ رشتے دار لالچی سن‘ اپنی کل جمع پونجی لا دتی تماثیل تھیٹر دی تعمیر تے‘ ایہ منصوبہ جیویں سوچیا سی‘ انج کامیاب نہ ہویا‘ مزاجاً حساس‘ ہمیشہ دین والیاں وچوں سن‘ مقروض ہوئے‘ لوکاں توں منگنا پیا‘ اپنیاں دیاں اکھاں بدلیاں‘ گل دل و دماغ تے لے گئے‘ برین ہیمرج پلس فالج دا حملہ ہویا‘ اپنے تماثیل تھیٹر دے باتھ روم توں ہسپتال تے ساریاں کوششاں دے باوجود بولنا گیا‘ چلنا‘ پھرنا گیا وہیل چیئر تے آ گئے مزے دی گل سنو‘ ہن حکومت بجائے ایہدے افضال احمد دا خیال رکھدی‘ اوہناں دا ساتھ دیندی‘ پہلے حکومتی اداریاں نے پنج ورھے اوہناں دے تماثیل تھیٹر ہال وچ خاندان نوں رلایا‘ ہن ایل ڈی اے افضال احمد دے فارم ہائوس دی ادھی زمین دبا کے بیٹھا ہویا اے‘ ایتھے مینوں اداکار علی اعجاز مرحوم یاد آ گئے‘ اک واری اسلام آباد وچ اک دوست دے کول ملاقات ہو گئی تھوڑی دیر بعد ایہ دسدے ہوئے پھٹ پھٹ کے رو پئے کہ میرے گھر تے قبضہ گروپ نے قبضہ کر لیا اے تے حکومت یاں حکومتی ادارے کجھ نہیں کر رہے‘ مینوں چنگی طرح اداکارہ‘ ہدایتکارہ شمیم آراء وی یاد نے جہناں نے اتھرو بھریاں اکھاں دے نال اک زمانے دی بے وفائی دے درجناں قصے سنائے‘ تے اوہ اداکارہ روحی بانو گبھرو پتر دی موت‘ حکومتی بے حسی‘ اپنیاں دی منافقت‘ گلی گلی پھری تے اوہ خالدہ ریاست جہنوں بے وفائی نے کینسر بن کے مار دتا۔ افضال احمد کیہ عروج سی‘ کیہ اداکار‘ کیہ اداکاری‘ کئی واری فلمی سیٹ تے اوہناں نوں اداکاری کردے ہوئے ویکھیا‘ آواز‘ ڈائیلاگ‘ ڈلیوری‘ چہرے دے تاثرات‘ بے رنگ سین وچ وی رنگ بھر دیندے سن کیہ گرج دار سگوں پاٹ دار آواز تے بولدیاں اکھاں پائیاں‘ ایہ اودوں دی گل اے جدوں اوہناں دے سٹیج ڈرامے جنم جنم کی میلی چادر دی دھم پئی ہوئی سی۔ ایہ اسلام آباد آئے‘ اک ہوٹل وچ اوہناں نال ملاقات ہوئی ادھے گھنٹے دی ایہ ملاقات اڑھائی گھنٹے تے پھیلی تے ایہناں اڑھائی گھنٹیاں وچ اک موقعے تے اوہناں نے اک جملے نوں پنج واری وکھووکھ انداز نال بول کے وکھایا‘ سنایا‘ یقین کرو‘ ہر واری ایہ اوہو اک جملہ بولدے‘ جملے دے معنی بدل جاندے‘ شاید ایہو وجہ اے کہ میں جدوں اوہناں نوں ملیا اودوں ایہو سوچ رہیا واں کہ ایہناں نوں تحفظ‘ مکالمے دا بادشاہ کہیا جاندا سی اوہ اداکاری کردے‘ لگدا ای نہیں سی اداکاری ہو رہی اے۔ اوہ اجہے مکالمے بولدے‘ مخالف اداکار وی تاڑیاں مارن تے مجبور ہو جاندے۔ اوہو مکالمے‘ ڈائیلاگ‘ ڈلیوری دا بادشاہ افضال احمد اج اک فقرہ چھڈو اک لفظ نہیں بول سکدا۔ بار بار سورئہ رحمن دی آیت یاد آ رہی اے کل من علیہا فان‘ زمین تے جو وی نیں سارے فناہ ہون والے نیں۔ ویبقی وجہ ربک ذوالجلال والاکرام‘ صرف تیرے رب دی ذات جو عظمت تے عزت والی اے باقی رہ جاوے گی۔(بشکریہ روزنامہ جنگ)
