ایپکا احتجاج تے حکومتی رویہ

حکومت خورے ایہہ گل بھل گئی اے کہ ” تحریکاں جنیاں دبائیاں جان اونیاں ای پروان چڑھدیاں نیں

لكهت:اے ڈی شاہد

ایپکا احتجاج تے حکومتی رویہفیر اوہ ای ہویا جیہندا دل نوں پہلاں توں ای دھڑکا سی ۔ اسلام آباد وچ اپنے حق دی خاطر احتجاج کرن والیاں معصوم مظلوم تے پر امن لوکاں تے حکومت نے طاقت دا کھل کے استعمال کیتا ۔ جویں جویں پورے ملک وچوں کلرکاں دے قافلے اپنے جائز مطالبات منوان لئی اسلام آباد وچ داخل ہوئے تاں کیپیٹل سٹی دی پولس نے بیچارے معصوم تے ہتھڑ متھڑ قلم دے مزدوراں اتے آنسو گیس دے گولے سٹے تے ڈنڈے سوٹے مارے ۔ درجناں تے سواں دی تعداد وچ احتجاجی ملازماں نوں بھیڑ بکریاں وانگوں چک چک کے بکتر بند گڈیاں وچ بند کر کے مختلف تھانیاں وچ ڈھک دتا تے اونہاں تے تشدد وی کیتا ۔ایہہ کوئی نوی گل نہیں ایس توں پہلاں وی ایس موجودہ حکومت نے اسلام آباد وچ اپنا حق منگن والیاں نال ایہو جیہا سلوک ای کیتا اے ۔ سال 2019 وچ سردی دے سخت موسم وچ مقدس مقصد لئی احتجاج کرن والے تحریک لبیک دے رہنماواں تے ورکراں تےآنسو گیس دے گولے سٹے تے واٹر کینن نال ٹھنڈا پانی سٹیا جس دی وجہ توں کافی تعداد وچ لوک زخمی تے بیمار ہوگئے ۔ حکومت دے ایس کرتوت دے بعد پورے ملک وچ افراتفری مچ گئی تے پاکستان دے ہر شہر وچ احتجاج ہوئے ۔ ایس توں بعد کساناں نال وی ایہو کجھ ای ہویا ۔ کسان اتحاد دے لیڈراں تے ورکراں کساناں اتے وی تشدد کیتا تے اونہاں نوں تھانیاں دیاں حوالاتاں وچ بند کر دتا ۔ سال 2020 وچ محکمہ بہبود آبادی دیاں ہیلتھ ورکراں ، سپروائزراں نال وی حکومتی سلوک کوئی ایڈا چنگا نہیں سی ۔اونہاں بیچاریاں زنانیاں دا گناہ ایہہ سی کہ اوہ کیہندیاں سن کہ سانوں کنٹریکٹ دی بجائے ملک دی مستقل طور تے خدمت کرن دا موقع دتا جاوے تے ساڈیاں نوکریاں پکیاں کیتیاں جان ۔ ایس دے بعد ریڈیو پاکستان دے نوکریاں توں فارغ کیتے ہوئے ملازماں دے احتجاج ، اسلام آباد دے سرکاری ہسپتالاں دے ینگ ڈاکٹراں دے احتجاج تے محکمہ تعلیم دے استاداں دے احتجاج تے وی ایہو جیہا ای حکومتی رویہ ویکھیا گیا ۔ جس دا ذکر ملک دے معروف تے سینئر کالم نگار محمد اکرم عامر نے کجھ دن پہلے اردو اخباراں وچ چھپن والے اپنے کالم کھوج حکومت ،اپوزیشن اور ایپکا احتجاج ،وچ چنگی طرحاں کیتا سی کہ ایس حکومت دی تاریخ احتجاج کرن والیاں لئی کوئی چنگی نہیں اے ۔ حالانکہ کسے وی جمہوری ملک وچ اپنے حق منگن والیاں نال حکومتاں دا ایہہ رویہ ٹھیک نہیں ہوندا ۔ پر بدقسمتی نال ساڈے ایس پورے معاشرے وچ ای انج لگدا اے جویں حق منگناں تے حق جتاوناں کوئی جرم ای بن گیا اے ۔ پاکستان تحریک انصاف دی حکومت نوں اپنے ایس تشدد پسند تے جارحانہ رویے وچ تبدیلی لیاونی چاہیدی اے تے اپنے اوس ویلے نوں یاد کرنا چاہیدا اے کہ جدوں اوہ پچھلی حکومت وچ اسلام آباد وچ دھرنا دے کے بیٹھے رہے تے اونہاں نال تاں ایناں برا سلوک کسے نے وی نہیں کیتا سی جیہڑا تحریک لبیک ، کسان اتحاد ، بہبود آبادی دیاں ہیلتھ ورکراں ، ریڈیو پاکستان دے نوکریاں توں فارغ ملازماں ، ینگ ڈاکٹراں تے محکمہ تعلیم دے استاداں نال تے پورے ملک دے کلرکاں نال کیتا گیا اے ۔ حکومت خورے ایہہ گل بھل گئی اے کہ ” تحریکاں جنیاں دبائیاں جان اونیاں ای پروان چڑھدیاں نے ۔
حق منگناں جرم ھے ایتھے حق جتاوناں وی اے پاپ
اک دن دشمن بن جاوے گی تیرے بلھاں دی ایہہ چاپ
ظلم دا سینہ چیر دے بکل ہتھ لکو نہ اڑیا
تقدیر دے رونے رو نہ اڑیا
ہنجواں دے ہار پرو نہ اڑیا