سائبان ویلفیئر سوسائٹی ولوں ARTEA کیفے گوجرانوالہ وچ ’’ BOOK READING‘‘ بیٹھک
رپورٹ:آفاق بٹ
کیفے ARTEAوچ سائبان ویلفیئر سوسائٹی رجسٹرڈ دے زیر اہتمام کتاب پڑھن دی عادت ’’”BOOK READINGدے عنوان نال اک بیٹھک دا انعقاد الحاج سعید احمد تاج دی صدارت وچ کیتا گیا جد کہ میزبانی دا فریضہ عتیق انور راجہ نے بخوبی انجام دتا۔ بیٹھک وچ شہر دے تعلیمی اداریاں تے سماج دے مختلف طبقیاں نال تعلق رکھن والے علم دوست تے کتاب دوست لوکاں نے شرکت کیتی تے اظہار خیال کردے ہوئے کہیا کہ دنیا وچ اج اوہ ای ملک ترقی یافتہ اکھوا رہے نیں جنہاں نے اپنے نوجواناں دی بہتر تربیت کیتی۔
تربیت دا بہترین طریقہ ایہہ وے کہ نوجواناں نوں مسلسل انج دی سرگرمیاں دا حصہ بنان دی کوشش کیتی جائے جنہاں وچ اوہ اپنے جذبات دا اظہار کرسکدے نیں۔ کھل کے مسکرا سکدے نیں۔
گنگا سکدے ہون تے قہقہے وی لا سکدے نیں۔ اج دے ترقی یافتہ ملکاں وچ ہر سال نہ صرف کتاباں شائع ہو رہی نیں بلکہ اوتھے دے لوک جدوں ایہناں نوں ویلا ملے کتاب دی ورق گردانی کرن لگدے نیں جد کہ ساڈے کول بچے، نوجوان بزرگ تے خواتین ہر ویلے فیس بک اُتے مصروف رہندے نیں۔ کتاب پڑھن دا رواج گھٹ ہوندے ہوندے ختم ہو چکیا اے۔ لائبریریاں وچ جان دی یعادت ختم ہو چکی اے۔
بے شک ایس ویلے دنیا دی ہر کتاب پی ڈی ایف دی شکل وچ ساڈے موبائل وچ دستیاب اے پر کتاب نوں کھول پڑھن تے ورق الٹن وچ جیہڑا رومانس اے ایہنوں اوہ ای جاندا اے جس نے سردیاں دی لمبی راتاں تے گرمیاں دی تپتی دوپہراں وچ سایہ دار درخت تھلے بہہ کے کتاب پڑھی ہوئے۔ بدقسمتی نال پاکستان وچ مجموعی طور اُتے کتاب پڑھن دی عادت ختم ہو چکی اے۔ ایسے لئی ساڈا اج دا نوجوان ذہنی گھٹن دا شکار اے۔ ایہہ گھٹن ساری زندگی ایس دے نال چلدی اے۔ اسیں پچھلے پنج ورھیاں توں لوکاں دی رویاں وچ بہتری لئی ادبی و ثقافتی تقریباں تے سیمینارز دا اہتمام کرن دی کوشش کر رہے آں تے ساڈی کامیابی ایہہ وے کہ ساڈے ایس کارواں وچ ہر طبقہ فکر دے لوک شامل ہو رہے نیں۔ سعید احمد تاج سابق صدر چیمبر نے کہیا کہ لکھنا مشاہدے تے احساسات دا ناں اے جس قلم کار نوں مشاہدہ چنگا ہوئے گا جس دے اندر دا انسان جنہا باشعور ہوئے گا جیہڑا جنہا اخلاقی قدراں دا پاسدار ہوئے گا ایس دے قلم دی کٹ اینی طاقتور ہوئے گی۔ اوہ شروع دن توں عتیق انور راجہ تے ایہناں دی ٹیم دی کوششاں دے معترف رہے نیں۔
ایہہ لوک حقیقی معنیاں وچ اپنی زبان، روایات تے ثقافت دے فروغ لئی کم کر رہے نیں۔ ایہہ لوک ویلے دی پابندی دی کوشش کردے نیں، ایس لئی میں اپنے مصروفیات وچوں ویلا کڈ کے ایہناں دے مشاعریاں تے سیمینارز وچ شرکت کرن دی کوشش کرنا واں۔ ایس بیٹھک وچ سعید احمد تاج،ڈاکٹر محمد اکرم ورک،خواجہ شجاع اللہ،عرفانہ امر،روبینا ناز،سونیا ناز،حنا بخاری،ثمینہ عرفان،مرزا اشتیاق،چوہدری سجاد مشتاق،سہیل بشیر،عثمان اشرف،یسین گجر، خرم بھٹہ،عمر فاروق،عاطف ربانی،اظہر رانا،رانا اسرئیل، مطلوب حسین مطلوب تے دیگر شامل سن۔
