بلھے شاہ اساں مرنا ناہیں
لكهت: سعد اللہ شاہ
دعا کرو میں تمہارے حصار سے نکلوں
رہ جمال کے زریں غبار سے نکلوں
یہ جسم و جاں تو کسی نشہ نمود میں ہیں
خزاں کو قید کروں تو بہار سے نکلوں
ایہ حصار جمال کیسا اے کسے نوں سمجھایا نہیں جا سکدا۔ ایہ اصل وچ محبت اے تے محبت وچ وحشت ‘ اس نے اپنا بنا کے چھوڑ دیا‘ کیہ غلامی اے کیہ رہائی اے۔ ایہ تعلق خاطر فطرت دے مظاہر وچ ڈھل جاوے تے دوآتشہ ہو جاندا اے شاید ایہ دل کشی تے دلبری اک حساس بندے لئی کجھ زیادہ ضروری ہوندی اے کہ ایہدے نال صلاحیتاں اجاگر ہوندیاں نیں۔ چھپے ہوئے جوہر ظہور کردے نیں تے لکیاں خوبصورتیاں صورت دکھاندیاں نیں۔ سیف الدین سیف یاد آ گئے:
ان کے جوہر بھی کھلے اپنی حقیقت بھی کھلی
ہم سے کھنچتے ہی وہ تلوار نظر آنے لگے
ایہ صورتحال انج دی اے کہ حسرت موہانی ورگے چپکے چپکے رات دن آنسو بہاندے رہے تے اوہناں نوں کیہ کیہ اچیاں اچیاں یاداں آئوندیاں رہیں۔ پر مینوں اچانک یاد آیا کہ ایہ شاعر درویش وی کیسا سی کہ سیاست وچ اجیہا شعور رکھدا سی کہ بس۔ ویلے دا گورنر مشورے لئی آئوندا اے تے پروٹوکول باہر چھڈ کے حسرت دے محلے وچ اپڑدا اے۔ قبلہ ملدے نیں تے ایس عالم وچ کہ جھولی وچ سبزی پائے گھر ول جا رہے نیں۔ گورنر انتظار کردا اے تے فیر گھر وچ تے چھپ تپکدی رہندی سی۔ نشست کھوکھے تے کپ آف ٹی ہوندی اے۔ یقین منو میں ایہ سب کجھ بالکل ارادتاً نہیں لکھ رہیا بس جو کجھ ذہن وچ آیا تہاڈے نال شیئر کر لیا۔ چلو تہانوں ایس درویش سیاستدان دا اک ہور واقعہ وی دسدا جاواں کہ کیسے کیسے پیارے تے درد دل رکھن والے ساڈے رہنما تے اکابرین ہوندے سن۔ اللہ نے اوہناں نوں بڑی شہرت دتی سی تے اوہ اوس ویلے رئیس المتغزلین کہلاندے سن۔ سیاست وچ وی جیل دی ہوا کھانی پیندی کہ ترے آزاد بندوں کی نہ یہ دنیا نہ وہ دنیا۔ آپ فرماندے نیں:
ہے مشکل سخن جاری چکی کی مشقت بھی
اک طرفہ تماشہ ہے حسرت کی طبیعت بھی
مشاعرہ پڑھن آئے تے خدمت لئی اک بندہ متعین سی۔ اوس بندے نے ایہ واقعہ لکھیا کہ حسرت صاحب نے ای مشاعرے دا اعزازیہ منگ لیا تے اوہدے دل وچ آیا کہ ایناں وڈا شاعر تے شخصیت کنی لالچی اے اوہنے اوسے چبھدی سوچ وچ نہ چاہندے ہوئے وی اوہناں دی معیت وچ وقت گزارے۔ اوہنے دسیا کہ جدوں مشاعرے دے بعد اوہناں نے واپس جاندے ہوئے اوس نوجوان نوں کسے دینی مدرسے ول لے جان نوں کہیا تے مختصر ایہ کہ اوہ اعزازیے دی رقم حسرت صاحب نے اوس مدرسے دے مہتمم توں رجسٹر لے کے لکھ دتی تے اپنا ناں وی نہیں لکھیا۔ لکھن دا مقصد ایہ کہ اوس کردار تے حوصلے دا تصور وی ہن نہیں کیتا جا سکدا کہ اوہ لوک اصل وچ اک مقصد دے تحت جیندے سن۔ اوہ اپنیاں لوڑاں وی ایس دنیا توں پوری کردے سن پر اوہناں نے دنیا نوں مقصد نہیں بنایا۔ اج وی اوہناں دا تذکرہ کرو تے دل خوش ہو جاندا اے۔ بلھے شاہ اساں مرنا ناہیں گور پیا کوئی ہور۔
ہن آ جائو ذرا اپنے عہد وچ تے خاص طور تے موجودہ دور وچ تے انج لگدا اے کہ ایہناں دے وجود توں ای کرپشن دا تعفن اٹھن لگدا اے۔ شاید ایہناں دا وی قصور نہیں کہ ہن اقتدار دی خاطر طریقہ کار یاں نظام ای اجیہا اے کہ ایہدے وچ کوئی شریف تے باوقار بندہ نہیں آ سکدا۔ وجہ ایہہ کہ لیاقت عقل تعلیم تے شائستگی ضروری نہیں کہ دولت تے وسیلیاں دے نال دستیاب ہووے۔ الیکشن دے پراسس نوں ایناں مہنگا تے مشکل بنا دتا جاندا اے کہ کروڑاں روپیے چاہیدے ہوندے نیں۔ ایتھے بندہ کردار تے پاکیزگی یاں تقویٰ نال قیمتی نہیں بن دا سگوں اثاثے تے جائیداداں ویکھیاں جاندیاں نیں۔ اوہ بندہ جہڑا ساریاں نوں مدھ کے یعنی لوکاں دے حقوق مار کے جائیداداں ہتھیا کے تے زمیناں تے قبضے کرکے امیر کبیر بن کے الیکشن لڑ کے اقتدار وچ آئوندے نیں تے اوہ ظلم دے خلاف کیہ کرن گے۔
دوجی گل ایہہ کہ دوہاں پاسے اکو جہے چٹے بٹے نیں۔ اوہو کہ جو روحی کنجاہی نے کہیا سی خبر گرم لایا ہوں روحی‘ چور چوروں کے ہاتھ کاٹیں گے۔ اختیارات تے ذمہ داری تے اللہ ولوں اک امتحان ہوندا اے کہ اوہ اپنے اقتدار تے اختیارات نوں اللہ دے بندیاں دی سہولت تے خوشحالی لئی ورتیا جاوے۔ ملک لئی فلاحی کم کیتے جان پر ایتھے احتساب دے ناں تے انتقام لیا جاندا اے۔ اوہناں لئی تے ایہ وی سزا اے کہ اوہناں نوں اقتدار توں محروم کر دتا جاوے فیر تسیں اوہناں نوں ویکھو کہ ایہ کیویں تلملاندے نیں تے ہکلاندے نیں۔ وجہ ظاہر اے کہ اوہ خدمت کرن لئی آئوندے سگوں لٹ مار کر کے اپنے اثاثے ڈبل شاہ بن کے دگنا چوگنا کردے نیں۔ افسوس ایہ کہ لوک وچارے کجھ وی کرن دے قابل نہیں تے ہن تے اوہناں دی ایہ غلط فہمی وی واہوا حد تک دور ہو گئی اے کہ ایہ لوک اوہناں دے ووٹاں نال آئے سن کیسی دکھ دین والی گل اے کہ جے کوئی جماعت وچ ناں نہیں لیندا دین دی گل کرنی ہووے یاں سچ مچ دا خوف رکھن والی تے خدمت کرن والی ہووے تے اوہ سانوں پسند نہیں کہ ایہ لوک تے اپنا کجھ نہیں بنا سکے۔ اوہ ساڈا کیہ کم کرن گے ایس لئی اسیں وی انج ای آں۔
میں بھی بہت عجیب ہوں اتنا عجیب ہوں کہ بس
خود کو تباہ کر لیا اور ملال بھی نہیں
سارے تجزیہ کار تے دانشور چیک رہے نیں کہ بھائی جان رپورٹ نوں پڑھ لوو۔ رپورٹ دین والیاں نوں بار بار اعلان کرنا پیندا اے کہ ایہ رپورٹ ایسے حکومت دے حوالے نال اے پر کاں تے چٹا ای رہوے گا ہور تے ہور فارن فنڈنگ دی جہنوں چھ ورھیاں توں جان بجھ کے لمکایا گیا سی ہن مجبوراً سامنے آ گیا تے اوہ ایہناں دے حق وچ چلا گیا۔ کیویں چلا گیا ایس لئی کہ ایہ آپ کہہ رہے نیں کیس کرن والا کس باغ دی مولی اے بس مستند اے ایہناں دا فرمایا ہویا۔ لوک سب دیکھ رہے نیں وچارے مہنگائی دے پھنڈے فیر توں دل پھڑ کے بہہ گئے نیں کہ چھیتی پٹرول فیر ہور مہنگا ہو جاوے گا تے بجلی وی ڈگے گی۔ کوئی ایہ وی نہیں سوچدا کہ لوکاں نوں قسطاں وچ انج نہ ماریا جاوے۔٭٭
