جتھے مہنگائی اوتھے بھکھ دے ڈیرے

طلعت عباس خان

جتھے مہنگائی ہووے‘ غربت ہووے اوتھے بھکھ ڈیرے پانا شروع کر دیندی اے۔ دنیا وچ کینسر‘ کرونا وائرس نال اینے لوک نہیں مر رہے جنے بھکھ نال مر رہے نیں۔ ایس ویلے وی ساڈے آل دوالے اجہے لوک نیں جہڑے بھکھ تریہہ نال مر رہے ہون گے۔ بدقسمتی نال جہناں کول دولت اے اوہناں نوں پنے توں اڈ کسے دی فکر نہیں۔ زیادہ کھان نال وی بیماریاں لگدیاں نیں۔ فیر وی ایہ اپنا کھانا شیئر نہیں کردے۔ ایہ اللہ توں نہیں بیماریاں توں ڈردے نیں۔ کدی کسے نے کرونا بیماری دا نہیں سی سوچیا کہ ایہدے توں اجہے حالات جنم لین گے۔ کرونا لوکاں نوں گھراں تک محدود کر دیوے گا۔ گھر دا بزرگ جدوں اپنے خاندان دے کسے بندے توں بھیڑے کردار دی وجہ توں تنگ کے اوہنوں کہندا اے گھروں نکل جا‘ فیر میرے سامنے نہ آنا۔ دور ہو جا میرے توں‘ انساناں دے کرتوت دی وجہ نال جیویں کہہ دتا ہووے نکل جائو عبادت گاہواں توں‘ مینوں تیری عبادت دی لوڑ نہیں۔ میں تہاڈے چہرے نہیں ویکھنا چاہندا۔ فیر ساریاں عبادت گاہواں ای نہیں دنیا دے کلب‘ کیسینو‘ ہوٹل‘ شاپنگ مال‘ فیکٹریاں‘ کارخانے‘ سکول کالجز‘ یونیورسٹیاں‘ سارے تعلیمی ادارے‘ سینما ہائوسز‘ ساریاں فلم انڈسٹریاں بند ہو گئیاں۔ دنیا دی ایئرلائنز بند ایئرپورٹ بند‘ بس ٹرمینلز بند‘ ایسے طرح کسے نے خوشیاں منانیاں ہون یاں اپنیاں نوں دفنانا ہووے تے تھوڑی گنتی وچ احباب نوں شامل کردے نیں۔ اجہے سین ویکھے گئے جہناں دا کوئی تصور نہیں سی کر سکدا۔ اینی وڈیاں آفتاں دے باوجود اسیں انسان نہیں بنے۔ اپنیاں اپنیاں تجوریاں بھرن لئی‘ اسمان ورگیاں اچیاں اچیاں عمارتاں کھڑیاں کرن لئی اپنے ای بھراواں دا لہو کرن توں گریز نہیں کردے۔
ایہ ظالم امیراں دی کہانی اے۔ عام بندے دے کرتوت وی اوہناں ظالم امیراں توں گھٹ وکھائی نہیں دیندے جو ددھ‘ مرغی گوشت ویچ رہیا اے۔ اوہ وی پیسے دی ریس وچ انسانی جاناں نال کھیڈ رہیا اے۔ اوہدے وچ وی کوئی خوف خدا نہیں کوئی شرم نہیں۔ کیمیکل ملیا ددھ ویچدا اے۔ مردہ ککڑیاں کھواندا اے گھٹ تولدا اے۔ حرام جانوراں دا گوشت ویچ کے اپنے بچیاں تے اپنا ڈھڈ بھردا اے جہنوں ویکھو اوہو وگڑیا ہویا وکھائی دیندا اے۔ انج دا ای حال ساڈے بہت سارے اداریاں دا اے جوڈیشری تے وکلاء تے انگلیاں اٹھ رہیاں نیں جس رفتار نال کرائم ودھ رہے نیں جس رفتار نال کیس فائل ہو رہے نیں اوسے رفتار نال کیس نکلدے نہیں؟ جہدے توں انگلیاں بار تے بنچ تے اٹھ رہیاں نیں انج کدی پہلے نہیں سی جو ہن ویکھ رہے آں۔ امیراں دے کیس چھیتی لگ جاندے نیں غریباں تے بے سہارا لوکاں نوں کوئی پچھن والا نہیں۔ جیلاں وچ سزائے موت دے ملزم کال کوٹھڑیاں وچ کئی ورھیاں توں اڈیک وچ نیں۔ اجے فیصلہ ہونا باقی اے کہ ایہ بے گناہ نیں یاں نہیں۔ ذہنی تے جسمانی طور تے بیمار نیں‘ مجبور نیں۔ اوہناں دا اک اک لمحہ اذیت نال گزر رہیا اے۔ جج دس باراں کیس سن کے گھراں نوں ٹر جاندے نیں جد کہ لوڑ روزانہ چار سو پنج کیساں نوں سنن دی اے۔ کجھ عدالتی فیصلیاں دے انتظار وچ جیندے جی مر رہے نیں۔عدم انصاف دا ایہ وائرس ہن تک کئی بے گناہ لوکاں دیاں جاناں لے چکیا اے۔ ذلیل کر چکیا اے ایس وائرس نے غریب دی نک وچ دم کر رکھیا اے۔ جیلاں‘ کچہریاں‘ عدالتاں‘ بارز کرپشن دا گڑھ سمجھے جان لگ پئے نیں جہدے نال عام بندے دے مسئلیاں تے نفرت وچ وی وادھا ہو رہیا اے۔
انج لگدا اے سسٹم چلان والے امیراں دے ای ہمدرد نیں جد کہ غریباں نوں کوئی پچھن دسن والا نہیں۔ آئے دن مہنگائی دے بمب غریب لوکاں تے کدی پٹرول تے کدی بجلی دی شکل وچ چلائے جاندے نیں۔ غریب جان وی تے کتھے جان؟ ہن صورتحال ایہہ وے کہ مہنگائی دس ورھے دی بلند ترین سطح تے آن کھلوتی اے۔ ایس ورھے مہنگائی دا آغاز پٹرول تے بجلی دیاں قیمتاں وچ وادھے نال ہویا اے۔ سنیا اے ہن مہنگائی دے بمب باقاعدگی نال چلائے جان دے منصوبے بنائے جا رہے نیں۔ جے اج ٹریڈ یونین تے طلباء یونین بحال ہوندیاں تے مہنگائی دے بمب انج نہ ڈگدے۔ عوامی ایشو تے گل کرن نوں کوئی تیار نہیں۔ پہلے اکھاں بند کر کے پیسہ لٹدے نیں فیر کمیشن بنا کے پیسے تے وقت دا ضیاع کردے نیں۔ سابق سپریم کورٹ جج شیخ عظمت سعید نوں اجے ریٹائر ہوئے دو ورھے نہیں ہوئے۔ اوہناں نوں فیر نوکری دا شوق پیدا ہویا اے جد کہ اپوزیشن دیاں جماعتاں‘ وکیل تے بارز سراپا احتجاج نیں کہ شیخ صاحب آپ ای کہہ دین کہ نامنظور نامنظور۔ پر دسیا جاندا اے اوہناں دی قسمت وچ آرام کرنا نہیں لکھیا سگوں پریشان ہونا لکھیا اے۔ ماضی وچ جے کسے جج تے انگلی کوئی چکدا تے جج فوری اوس بنچ توں وکھ ہو جاندا سی پر ہن انج نہیں۔ ہن لگدا اے زمانہ بدل چکیا اے۔ ہن عزت دی تھاں پیسے نے لے لئی اے۔ ہن کوئی عوامی لیڈر نہیں رہیا جہڑا مہنگائی دے بمب سٹن والیاں نوں روک سکے۔ لوک مہنگائی نال چیکاں مار رہے نیں اڈیاں رگڑ رگڑ کے مردے جا رہے نیں۔ کوئی ٹس توں مس نہیں ہو رہیا عوام وبائی امراض نال اینے نہیں مردے جنے وچارے بھکھ نال اڈیاں رگڑ رگڑ کے مردے نیں۔ اوہناں نوں پانی ملدا اے تے روٹی نہیں ملدی جے روٹی ملدی اے تے پانی نہیں ملدا ہن نہ تے اوہناں نوں چھت ملدی اے تے نہ زمین۔
دولت دے پجاری پیسے دی ایس ریس وچ ایس طرح نال نس رہے ہوندے نیں جیویں اوہناں نوں کجھ پتہ ای نہیں کہ ایس ریس وچ کنے غریب اوہناں دے پیراں تھلے آ کے مدھے جاندے نیں۔ ایہ بھل جاندے نیں کہ جس طرح ایہ غریب لوک بھکھ نال مر کے دنیا توں ٹر جاندے نیں اسیں وی اک دن ایس دنیا توں انج ای ٹر جانا اے۔ اوتھے اپڑ کے ایہناں بھکیاں دیاں ہاواں تے سسکیاں دا اوہناں نوں جواب دینا ہووے گا۔ فیر شرمندگی ای نہیں سزا دا وی سامنا کرنا ہووے گا۔ ایہ کیوں سمجھدے نیں کہ اوہناں نوں مرنا ای نہیں۔ جے مر گئے تے ایہ سب کجھ نال لے کے جان گے۔ حضرت عمر فاروقؓ فرماندے سن کہ جے دریائے فرات دے کنڈھے اک کتا وی تریہہ نال مر گیا تے اوہدا وی میں جوابدہ آں۔ ایتھے تے انسان بھکھ تریہہ نال مر رہے نیں کسے نوں کوئی پرواہ نہیں کیہ ایہ نہیں سمجھدے کہ اوہناں توں وی پچھ گچھ ہووے گی‘ سزا ہووے گی‘ اسلام کہندا اے سب توں وڈی عبادت انسان نال پیار کرنا اے۔ جے اوہناں نوں سمجھ آ گئی تے فیر ایہ بار بار مہنگائی دے بمب لوکاں تے سٹنا بند کر دین گے۔ غریباں دے جین دا سہارا بنن گے۔ کسے غریب نوں اپنی ریاست مدینہ وچ بھکھ تریہہ نال مرن نہیں دین گے۔ مہنگائی تے کنٹرول رکھن‘ سرکاری ملازماں دیاں تنخواہواں ودھان‘ غریباں دیاں دعاواں لین گے۔٭٭