سماج نوں چانن وکھان والیاں دی لوڑ اے

لكهت:رابعہ رحمٰن

قتل و غارت نے خوف و ہراس دی فضا گرم کر رکھی اے۔ انسان نہ اپنے گھر دی چار دیواری وچ محفوظ اے نہ چار دیواری دے باہر ‘ تنگ گلیاں‘ فٹ پاتھ‘ کھلے رستے‘ چوراہے تے چوک کیہڑی تھاں محفوظ اے۔ زندگی انسان توں امتحان لیندی اے۔ جیہڑا انسان اپنے خواباں دی تعبیر لبھن اپنی ساری صلاحیتاں نوں بروئے کار لیان لئی گھر توں نکلدا اے طبقاتی تقسیم فرقے بازیاں تے غیر منصفانہ رویے ایہنوں کسے گندے نالے دے کونے وچ نشہ کرن والے مایوس انسان وچ بدل دیندے نیں۔ کردار انسان دی پیدائش دے نال جنم نہیں لیندا بلکہ اک معصوم مسکراہٹ ، زمانے دے دل چیرن والے قہقیاں دی بدولت اپنی معصومیت کھو دیندی اے۔ ذمہ دار کوئی وی ہوئے پر اک انسان ناکام و نامرد دنیا توںچلا جاندا اے راقمہ نے بوہت سارے انج دے خانداناں وچ انتہائی ذہین و فطین لوکاں نوں ذہنی مریض بن دے ویکھیا اے۔ تحقیق دے بعد معاملات ساہمنے اآندے رہے ایہناں وچ والدین دی ناچاقیاں، ایہناں وچ صبرو برداشت دی کمی، باہر دے لوکاں تے دیگر رشتہ داراں دی بلاوجہ مداخلت۔ ایہہ کہن نوں یا سمجھن نوں شاید لوکاں نوں معمولی گل لگے پر یقین جانو ایہہ گلاں معمولی نہیں۔ ایہہ اک انسان دی زندگی ای نہیں مکمل خاندان نوں تباہ کر دیندی اے۔ انج کرن والے تماشائیاں وچوں سب توں اگے تالیاں وجاندے نیں پر زبان نال اظہار ہمدردی کردے نظر آندے نیں۔ انسان معاشرتی جانور اے ایہنوں ہر حال وچ معاشرے نال رابطہ تے میل جول ودھانا ہوندا اے پر ایس لئی جدوں تیکر اوہ اک خاندان سنبھالن دی صلاحیت نہ رکھ سکے اپنے بالاں، بیوی تے والدین دے علاوہ دیگر رشتہ دی اہمیت تے خاص مقام نوں نہ سمجھ سکے اوہ اک معاشرے دا مفید فرد کنج بن سکدا اے۔ ایسے لئی تے ہر رشتے دا مقام اسلام نے وی کھول کھول کے دس دتا اے تاں جے ایہناں دے حقوق دی ادائیگی وچ کوتاہی دی بنا اُتے مسائل پیدا نہ ہون۔ قلم دوات تے کاغذ ادیب دے بہترین ہتھیار ، اوزار تے دل نال جڑے ہوندے نیں۔ ایسے طرح خاندان دا ہر بندا ایس خاندان دے ذمہ دار دا قلم دوات تے کاغذ ہوندا اے۔ اوہ اپنی جذبات وابستگی ، محبت دی گہرائی اپنے کردار دے اعلیٰ ظرف ہون دا ثبو ت ایہناں دی زندگیاں کامیاب بنا کے دیندا اے۔ بوہت گھٹ ہوندا اے کہ اپنے فرائض دی مکمل ادائیگی تھوڑے جلال تے زیادہ جمال دے نال کرن والے خانداناں وچ کوئی فرد معاشرے دا ناکارہ حصہ بن دا ہوئے۔ ایہناں ای خانداناں توں بنن والے بندے سیاست، بزنس، تعلیم تے مختلف شعبیاں وچ جاندے نیں۔ چنگی تربیت ایہناں نوں وطن دی خدمت کرن وچ مدد دیندی اے۔ ساڈے معاشرتی طور اُتے بوہت مضبوط تے طاقتور انسان کنج وی حالات توں لنگھ رہے ہون اوہ اپنے کسے ساتھی نوں کدی نقصان نہیں اپڑاندے۔ انج دے بندے وطن دی طاقت بن دے نیں نہ ایہناں دے ہتھ وچ کشکول ہوندا اے نہ ایہنا دی زبان اُتے شکوہ نہ ایہناں دی نظر وچ لالچ نہ سینے وچ کینہ انج دے بندے ساڈے وچن دی لوڑ نیں۔ایہناں نوں بنان لئی معاشرے دی مدد نہیں اک خاندانی نظام دی مدد دی لوڑ اے کیوں جے اک انسان نوںمکمل تے بھرپور کردار دا حامل کر کے خاندان ای معاشرے دے حوالے کردا اے تے کیوں اسیں اینے قیمتی خزانیاں نوں بے سبب ساڑ کے راکھ کر دین۔
سانوں ایہناں معصوم بالاں نال اپنی زندگی نوں خوبصورت بنانا ای اے کیوں نہ ایہناں دے معصومیت دے دور وچ ای ایہناں دی زندگیاں نوں محبت اعتماد خلوص تے دوستی دے نال پروان چڑھان دا فیصلہ کر لین مسکرانا اسیں وی اے تے جینا اسیں وی اے پر اپنی اولاداں دے نال تے فیر اک ویلے دے بعد ایہناں اُتے وطن دا حق وی شروع ہو جاندا اے۔ ایس نوں ادا کرن لئی جے اسیں ایہناں دی تربیت وچ اپنا ایمانداری دا خون پسینہ شامل کر دین گے تے ای اوہ وطن دی خاطر کرپٹ، سیاستدان نہیں بنن گے۔ کاروبار وچ ریاکاری نہیں کرن گے، تعلیم نوں علم دے معیار اُتے لیا کے اپنے کردار دا حصہ بنان گے تے شعور و اآگہی دی جس طرح آپ منزلاں طے کیتیاں ہون گیاں اونج ای امانت تے ایمانداری دے نال ایہناں نوں اگے لے کے چلن گے۔ گہری ہنیری گھاٹیاں یا یخ بستہ بلند و بالا چوٹیاں اُتے وطن عزیز دی خدمت اوہ ای بندے کر سکدے نیں جنہاں دے والدین تے استاداں نے ایہناں دی تربیت اُتے جان ماری ہوئے۔ نہیں تے ساڈے معاشرے دے بے شمار جوان بچے تے بچیاں نہ صرف اپنی زندگیاں برباد کردے نظر آ رہے نیں بلکہ خاندان دے نال نال ملک دی بدنامی دا باعث وی بن رہے نیں۔ ایس نوجوان نسل توں مایوس نہیں ہونا چاہیدا اے ایہناں نوں جدوں کدی ساڈی محبت دوستی تے اعتماد ملے گا ایہہ کردار دی ڈگی ہوئی سطح توں وی باہر نکل کے اٹھ کھڑے ہون گے۔ ایہہ ثابت کروان لئی کہ اوہ کسے توں گھٹ نہیں۔ساڈا ودھیا ہویا دوستی دا ہتھ اپنے ناکام بالاں ول اوہ مضبوط سہارا بن سکدا اے کہ اوہ بچہ وطن دا چمکدا ہویا ستارہ بن سکدا اے۔ نوجوان نسل کوئی مایوس نسل نہیں۔ بس ایہناں دی تربیت گاہواں دی ذمہ دار شخصیات نوں اپنی بصیرت تے سیرت دے آئینےوچ ایہناں نوں ڈھالنا اے نہیں تے سیرت دا شیشہ وی ٹٹ جائے گا۔ بصارت وی کھو دین گے تے سفید لاٹھی ایہناں دے ہتھاں وچ تھما کے اسیں اپنی ضعیفی دی بنا اُتے ایہناں نوں سڑک وی پار نہیں کرا سکن گے۔ فیر حادثے تے ہون گے، قتل و غارت دا بازار تے گرم ہوئے گا خوف و ہراس دی فضا تے ودھے گی۔ ایہہ کوئی معمولی گل نہیں ایس لئی ایس نوں لمحہ فکریہ سمجھ کے لمحہ موجود توں ایس دی منصوبہ سازی کرنی شروع کر دین۔