جان کاشمیری شعر وادب دی یونیورسٹی

دنیا وچ جتھے جتھے اردو پڑھی تے لکھی جاندی اے اوتھے دے علمی و ادبی حلقیاں وچ جان کاشمیری دا ناں جگمگ جگمگ کردا رہے گا

غلام عباس

ڈارلنگ نال ایوبیہ گیا، سورج بدلاں دی اکھ مچولی جاری سی، چلدے چلدے اچانک بانو شہزادی دی نظر عریاں درخت دے سینے اُتے ٹک گئی۔ خوبصورت شعر کنندہ سی، کنندہ حصے نوں لہو دی روشنائی نال بھریا گیا سی۔
اب تک وہاں اترتے ہیں خوشبو کے قافلے
بھولے سے لکھ دیاتھا تیرا نام جس جگہ
شعر اُتے خوب داد دتی پرکسے نوں، علم نہیں سی کہ ایہہ دل وچ اتر جان والا شعر کس دا اے۔ 29جولائی جمعۃ المبارک پنجاب ہائوس وحدت روڈ لہور، جان کاشمیری دی کتاب ”شالا خیر،،دی رونمائی ہوئی۔

خوبصورت تقریب دے خوب سیرت دبنگ سوہنے مکھڑے والے سینئر جرنلسٹ مدثر اقبال میزبان سن۔ چیئرمین پنجابی میڈیا گروپ مدثر اقبال بٹ نے متکذرہ بالا شعر سنایا، بوہت خوشی ہوئی ایہہ کنہاں وچ رس گھولن والا باکمال شعر جان کاشمیری دی تخلیق اے۔ بٹ صاحب دی ایس دلپذیر تقریب نے جان کاشمیری دی شخصیت نوں چار چن لا دتے بلکہ کئی چن جڑ دتے کیوں جے چار چن تے بوہت پہلے ایہناں دی شعروشاعری، ادبی حیثیت نوں لگ چکے۔ جان کاشمیری دا ناں کسے تعارف دا محتاج نہیں۔ دنیا وچ جتھے جتھے اردو پڑھی تے لکھی جاندی اے اوتھے دے علمی و ادبی حلقیاں وچ جان کاشمیری دا ناں جگمگ جگمگ کردا رہے گا۔ تقریب دے مہمان خصوصی صوفی دانشور سید انصر سبطین نقوی سن۔ صدارت بابا نجمی نے کیتی۔ پروین ملک، اکرم شیخ، عصمت نذیر، پروفیسر نائلہ ریاض بٹ، عتیق انور، غلام شبیر نے جان کاشمیری دی شاعری تے شخصیت اُتے خوب روشنی پائی۔ شعرب و ادب دے ساگر دے کلام نوں گلوکار عنایت عابد، فیصل بٹ، سجاد، سرمد خان اور الطاف نے گائیکی دے ذریعے محفل نوں لُٹ لیا۔ پروفیسر نائلہ بٹ نے جان کاشمیری دے فن تے شخصیت اُتے ناقدانہ اظہار خیال کیتا۔ انج جان صاحب دی شاعری تے شخصیت بارے حاضرین بخوبی آگاہ ہوئے۔ باوقار تقریب کئی گھنٹے جاری رہی خوشگوار حیرت ایہہ ہوئی کہ سامعین دا جوش و خروش دیدنی سی۔ نہایت پیارے انسان مدثر اقبال بٹ دا دستر خوان اپنی مثال آپ سی۔ بٹ صاحب اپنے قلم پھڑن والے اجلے ہتھاں نال لنگر میز اُتے سجا رہے سن۔ کھانے دی لذت انج دی کہ لوک انگلیاں چٹ دے رہ گئے۔ جان کاشمیری دا اک اعزاز ایہہ وی اے کہ سابق وزیر اعلیٰ پنجاب شہباز شریف ایہناں دا ایہہ شعر دھواں دار تقریب وچ سنایا کردے سن۔ ملاحظہ کرو۔

تیری پسند تیرگی، میری پسند روشنی
تو نے دیا بجھا دیا میں نے دیا جلا دیا
جان کاشمیری دے اعزاز وچ دو چند وادھا اودوں ہویا جدوں ایہناں دا شعر کربلا وچ اک ذاکر نے سنایا تے مزے دی گل ایہہ وے کہ ایہہ بے مثال شعر کئی وار سنیا گیا تسیں شعر ویکھو تے داد دے ڈونگرے دل کھول کے نچھاور کرو۔
ہر ایک عہد ہی مصروف آہ وزاری ہےغم حسینؐ کی
کتنی قبیل داری ہےکروڑوں انسانوں میں
ایس شعر دا پڑھیا جانا اعزاز توں گھٹ نہیں بلکہ بوہت وڈا اعزاز اے۔ جان صاحب دے علم و عرفان دے کیا کہنے۔ تصویر اُتے تن سو توں ودھ اشعار تخلیق کیتے۔ دیگ دے چاولاں بارے جانکاری کرن دی غرض نال دو اک دانے ای دیگ دی لذت تے معیار دا پتہ دیندے نیں تصویر بارے شعر ویکھو۔
پس پردہ بھی تکلم سے گریزاں رہنا
لوگ آواز سے تصویر بنا لیتے ہیں
جان کاشمیری دے ادبی سفر توں پہلاں عرض اے کہ ایہناں دا پیدائشی ناں محمد نصیرت بٹ، اسنادی اسم محمد نصیر احمد، دفتری ناں محمد نصیر جان تے قلمی ناں جان کاشمیری اے۔ اٹھارہویں گریڈ توں ریٹائر ہون والے سپوت نے واپڈا وچ ملازمت عبادت سمجھ کے کیتی۔

ایہناں دی شعر و شاعری، خاکے، کالم، بالاں دی شاعری، قطعہ نگاری وغیرہ 22 گریڈ توں وی اُچا اے۔ ایہناں دے ادبی رسالہ ”قرطاس،، اُتے تن وار ایم فل ہو چکیا۔ ایہناں دی شخصیت تے شعر و ادب اُتے تحریر کرنا سورج نوں موم بتی وکھان دے مترادف اے۔ 231 اشعار اُتے مبنی غزل کہن دا اعزاز ایہناں نوں حاصل اے تے دو ہزار اشعار دی غزل کہنا وی ایہناں ای دا کمال اے۔ پی ٹی وی لہور سنٹر نے قرطاس دے حوالے نال پروگرام کیتا۔ پنجاب ٹی وی نے ،قرطاس، دا سالنامہ اُتے ڈاکٹر محمد اجمل نیازی دی میزبانی وچ خصوصی تقریب دا اہتمام کیتا۔ قرطاس، دی ضخامت 220 توں 960 صفحیاں تیکر ہوئی۔ 960 صفحیاں دا قرطاس بطور آلہ ضرب استعمال ہو سکدا اے۔ اک ای دن 10 کتاباں شائع کر کے انہونی کر وکھائی۔ شالا خیر، پنجابی نظم و غزل اُتے مبنی اے جس وچ پنجابی دی مختصر تے لمبی ترین غزل وی شامل اے۔ سچ ایہہ وے کہ شعر و ادب دی جان بارے خامہ فرسائی کرنا تے اوہ وی لاٹھی چارج، وچ ممکن نہیں کیوں جے ایس دے دامن وچ اینی وسعت ہر گز نہیں۔ دفتر چاہیدا اے جان صاحب اُتے تحریر کرن لئی، خاکسار دریا نوں کوزے وچ بند کرن دا ہنر جاندا تے فیر ایہہ کہ جان کاشمیری شاعری دا سمندر نیں۔ علم و عرفان تے شعرو شاعر دا برگد، شالا خیر تے چشم بد توں محفوظ رہن۔ایہناں دے کلام اُتے قوالیاں گائیاں گئیاں۔ حمد و نعت ٹی وی تے ریڈیو اُتے پیش کیتیاں جاندیاں نیں۔ماں دی عظمت اُتے ایہناں دا قطعہ لازوال تے بے مثال اے۔ راقم الحروف اُتے ایہناں دا قطعہ جس اُتے ہمیشہ لئی ایہناں دا مقروض ہو کے رہ گیا ہون ملاحظہ کرو۔
 پڑھتا ہے آنسوؤں کی زباں میں مسا لمہ
ماتم کی رت کو جانے وسیلہ وہ چین کا
تصویر دل میں رکھے سدا
ذوالجناح کی عباس اک ملنگ ہے مولا حسین ؐ کا