’’سینٹ انتخابات، حکومت ،اپوزیشن دا کڑا امتحان‘‘
سینٹ انتخابات وچ وڈے اپ سیٹ دا امکان اے تے
ایس لئی اپوزیشن تے حکومت نوں چوکنا رہنا ہوئے گا
تحریر اکرم عامر سرگودھا
حکومت 3 مارچ نوں ہون والے سینٹ انتخابات اوپن بیلٹ یعنی شو آف ہینڈ دے تحت کرانا چاہندی اے۔ ایس ضمن وچ صدر مملکت اسلامی جمہوریہ پاکستان عارف علوی نے 2021 دا پہلا صدارتی آرڈیننس سینٹ الیکشن دے حوالے نال جاری کر دتا سی، جس دے تحت سینٹ الیکشن اوپن بیلٹ دے ذریعے کران دا کہیا گیا، پر ایس آرڈیننس نوں سپریم کورٹ دے فیصلے توں مشروط رکھیا گیا سی، حکومت نے ایس حوالے نال سپریم کورٹ آف پاکستان نال رجوع کیتا، عدالت وچ ہن ایس معاملے دی سماعت ہو رہی اے۔ حکومت دے وکیل آرڈیننس دے حق وچ تے الیکشن کمیشن آف پاکستان دے وکیل آرڈیننس دی مخالفت وچ دلائل دے رہے نیں، عدالت ولوں ایس کیس دا جلدی فیصلہ متوقع اے۔ کیوں جے ویلا لنگھن دے نال سینٹ الیکشن دی پولنگ دے دن وی نیڑے آ رہے نیں، عدالت عظمیٰ جے صدر مملکت دے جاری کردہ آرڈیننس نوں معطل کر دیندی اے تے فیر الیکشن خفیہ بیلٹ دے ذریعے ہون گے تے جے آرڈیننس نال اتفاق کردی اے تے فیر ملک وچ سینٹ الیکشن پہلی وار اوپن بیلٹ دے ذریعے ہون گے تے کسے پارٹی دا سربراہ نمائندہ یا امیدوار نوں بیلٹ پیپر تیکر رسائی دا حق ہوئے گا تے پتہ چل سکے گا کہ کس رکن اسمبلی نے کس پارٹی یا امیدوار نوں ووٹ دتا اے۔ حکومت کہندی اے کہ ماضی وچ سینٹ الیکشن وچ امیدوار ارکان اسمبلیز دی بولی لا کے ایہناں دے ووٹ خرید کے سینیٹ دے ممبر بن دے آئے نیں ہن دی وار ارکان اسمبلی دی ہارس ٹریڈنگ روکن لئی آرڈیننس جاری کیتا گیا اے۔ اپوزیشن خاص طور تے مسلم لیگ ن تے پیپلز پارٹی دی قیادت جیہڑی ماضی وچ سینٹ انتخابات وچ اپ سیٹ دے بعد عندیہ دیندی سی کہ سینٹ الیکشن شفاف کران لئی انتخابی طریقہ کار وچ تبدیلی دی لوڑ اے۔ ہن حکومت نے ایس حوالے نال آرڈیننس جاری کیتا اے تے اپوزیشن حکومت دے جاری کردہ آرڈیننس نوں سینٹ انتخابات وچ دھاندلی دا منصوبہ قرار دے رہی اے تے مطالبہ کر رہی اے کہ ایس آرڈیننس نوں واپس لے کے انتخابات سابقہ طریقہ کار دے مطابق خفیہ بیلٹ دے ذریعے کرائے جان، ہن حکومت تے اپوزیشن وچ ایس بابت قانونی جنگ جاری اے ایس طرح حکومت، اپوزیشن دی قیادت، سینٹ انتخابات وچ کاغذات جمع کران والے امیدوار تے سینٹ الیکشن نال دلچسپی رکھن والے عوام عدالت عظمیٰ دے فیصلے دے منتظر نیں، عدالت جیہڑا فیصلہ کرے گی ایس دے تحت سینٹ انتخابات ہو جان گے، پی ڈی ایم وچ شامل اپوزیشن جماعتاں جیہڑی کہ کپتان دی حکومت ڈیگن لئی 26 مارچ نوں اسلام آباد وچ لانگ مارچ دی تیاریاں وچ مصروف سن۔ نے سردست اپنے ڈویژنل مقامات اُتے احتجاجی جلسے ریلیاں منسوخ کر دتیاں نیں تے حکومت مخالف ایہناں جماعتاں دے قائدین نے سینٹ الیکشن وچ حکومت نوں ٹف ٹائم دین لئی سر جوڑ لئے نیں ایس طرح سینٹ الیکشن جتن لئی اپوزیشن تے حکومت نے کمر کس لئی اے تے اپنے اپنے امیدوار میدان وچ اتار دتے نیں ہن دی وار وی سیاسی جماعتاں دے امیدواراں دی اکثریت کاغذات واپس لے لوے گی تے مقابلہ سیاسی جماعتاں دے امیدواراں وچ ہو گیا، تاں ایہہ منظر آئندہ کجھ دن وچ کاغذات دی چھان بین دے بعد واضح ہو جائے گا تاں سینیٹ انتخابات دا میدان خوب سج چکیا اے تے تن مارچ نوں سیاسی جماعتاں تے سیاست داناں دا امتحان ہوئے گا تے ایس وچ کون پاس ہوئے گا تے کون فیل ایہہ فیصلہ تے پولنگ دے بعد ای ساہمنے آئے گا ایس بارے ویلے توں پہلاں کجھ نہیں کہیا جا سکدا کیوں جے سیاست بے رحم شے اے، جیہڑی ہوا دے جھونکے وانگوں بدلدی رہندی اے۔
واضح رہوے کہ ماضی دے ہر سینٹ انتخابات وچ اپ سیٹ ویکھن وچ آیا اے دوجے پاسے حکومت تے اپوزیشن ولوں اک دوجے اُتے ارکان اسمبلی دی خرید و فروخت دے الزامات دا سلسلہ طول پھڑدا جا رہیا اے تے عوام دی اکثریت جنہوں دو ویلے دی روٹی دی فکر کھادے جا رہی اے آئے دن ایس حوالے نال نویں نویں کہانیاں تے افسانے سن کے بیزار ہو چکے نیں، ملک دے سیاسی ایواناں وچ حزب اقتدار تے حزب اختلاف نے ارکان اسمبلی توں ووٹ لین لئی جوڑ توڑ پیشے دی ریل پیل شروع کر دتی اے تے پچھلے ادوار وانگوں ہن دی وار وی کئی اپ سیٹ ہون دا امکان اے۔ ماضی وچ ارکان دی لگن والی ایس منڈی دے سیاست وچ حیران کن نتیجے ساہمنے آ ندے رہے نیں۔ 2018ء وچ وڈے ایوان دے انتخابات وچ وڈے اپ سیٹ ہوئے سب توں وڈا اپ سیٹ پی ٹی آئی دے موجودہ گورنر پنجاب چودھری محمد سرور نے کیتا۔ جنرل نشست اُتے چودھری سرور نوں 34 ووٹ ملنے سن پر غیر متوقع طور اُتے اوہ سب توں زیادہ 44 ووٹ لے کے سینیٹر منتخب ہو گئے۔ پنجاب وچ 10 ن لیگی ارکان اسمبلی نے ضمیر دا سودا کیتا تے خفیہ رائے شماری وچ اپنے ووٹ دا وزن چودھری سرور دے پلڑے وچ پا دتا، ایس طرح مسلم لیگ ن دے زبیر گل ٹکٹ ہولڈر ہون دے باوجود سینٹ الیکشن ہر گئے۔ ایہناں دی تھاں مسلم لیگ ن دے متبادل امیدوار رانا محمود الحسن جت گئے ایسے طرح 2018 وچ سندھ وچ ایم کیو ایم دے نال وی ہتھ ہویا تے مفاہمت دی سیاست تے سیاست وچ بازی پلٹن دے ماہر آصف علی زرداری دی سیاست نے جادو وکھایا تے ایم کیو ایم دو امیدواراں دے بجائے اپنا صرف اک سینیٹر فروغ نسیم ای کامیاب کروا سکی۔ پیپلز پارٹی ایوان وچ ووٹاں دے تناسب نال نو سینٹر دوبارہ منتخب کروا سکدی سی پر آصف زرداری دی سیاسی حکمت عملی دی وجہ نال پیپلز پارٹی دے 10 امیدوار سینیٹر منتخب ہو گئے۔
سو گل کتھوں کتھے نکل گئی گل ہو رہی سی سینٹ الیکشن وچ ارکان اسمبلیز دے ووٹاں دی خریدو فروخت دی تے ایہہ سلسلہ شروع ہو چکیا اے ووٹاں دی خریدو فروخت روکن لئی عدالت کیہ فیصلہ کردی اے ایہہ تے ویلا ای دسے گا پر دوجی صورت وچ ایہہ سلسلہ صرف ایسے صورت وچ رک سکدا اے کہ سیاسی پارٹیاں انج دے امیدواراں نوں سینٹ دے ٹکٹ جاری کردیاں جیہڑی سرمایہ دار، جاگیردار ہون دی بجائے نچلے طبقے نال تعلق رکھن والے مخلص پارٹی ورکر ہوندے، تاں جے سینٹ انتخابات وچ ووٹاں دی خریدو فروخت رک سکدی، ایسے صورت وچ ملکی سیاست وچ استحکام آئے گا انج کدوں ہوئے گا؟ انج جدوں ہوئے گا ، عوام ، وڈیرہ ازم، ذات برادری تے سرمایہ دار دی بریانی دی پلیٹ کھا کے ووٹ دین دی بجائے انج دے نمائندے منتخب کر کے ایواناں وچ بھجوان جیہڑے ملک و قوم دا درد رکھدے ہون نہیں تے ہر سینٹ قومی، صوبائی، الیکشن وچ منڈی لگدی رہوے گی ارکان اسمبلیز اپنے ضمیر دا سودا کردے رہن گے۔ حالات ہن دی وار وی دس رہے نیں کہ سینٹ انتخابات وچ وڈے اپ سیٹ دا امکان اے تے ایس لئی اپوزیشن تے حکومت نوں چوکنا رہنا ہوئے گا۔
