فوجی افسر کنج بن دا اے؟

محمد اجمل

تاریخ گواہ اے کہ پاکستان فوج نے وطن عزیز دے دفاع وچ دشمن نوں ہر جنگ تے محاذ اُتے منہ توڑ جواب دے کے دشمن دے دند کھٹے کیتے۔ پاک فوجاں نے نہ صرف براہ راست جنگ دے میدان وچ اپنا لوہا منوایا بلکہ پاکستانی عوام دے بھرپور تعاون نال دہشت گردی دے ناسور نوں وی جڑ توں اکھاڑ سٹیا۔ اپنی ساری سازشاں وچ ناکامی دے بعد دشمن نوں ایس گل دا ادراک چنگی طرح ہو گیا کہ جدوں تیکر پاکستانی عوام تے پاک فوجاں دے وچکار اعتماد تے محبت دا تعلق قائم اے اودوں تیکر ایس عظیم قوم نوں براہ راست شکست دینا ناممکن اے۔ فیر مکار دشمن نے اپنا پینترا بدلیا تے پاکستانی عوام تے فوج دے وچکار خلا پیدا کرن دی غرض نال نفرت بھرے بیانیے تے جان بجھ کے غلط خبراں نوں ودھانا شروع کر دتا تے اپنے ایس گھائونے مقصد دی تکمیل دی خاطر کجھ کچے ذہناں تے خود کار تجزیہ نگاراں نوں استعمال کر کے فوج مخالف بیانیے نوں ودھانا شروع کر دتا جس دے زیر اثر کجھ کم فہم لوک ایہناں افواہواں تے غلط خبراں نوں درست من کے دشمن دے آلہ کار بن بیٹھے تے اج کل ٹی وی اُتے اکثر بندیاں نوں فوری افسراں دی سول انتظامیہ وچ تعیناتیاں دے بارے بحث و تکرار کردے سنیا جا سکدا اے کہ سارے اہم تقرریاں وچ ریٹائرڈ آرمی افسر کیوں تعینات کر دتے جاندے نیں؟
افسوس دے نال کہنا پیندا اے کہ ساڈے ملک وچ کجھ خود کار تے نام نہاد تجزیہ کاراں نے بنا تحقیق دے دشمن دے ایس بیانیے نوں تقویت دین وچ مصروف عمل نیں تے اکثر انج دے بندیاں نوں ایہہ کہندے ہوئے سنیا جا سکدا اے کہ فوج دے افسراں نوں صرف جنگ وجدل دی ای تربیت دتی جاندی اے۔ ایتھے ایہہ گل قابل غور اے تے میں انج دے لوکاں توں پچھنا چاہنا واں کہ اپنے محدود علم، بغیر کسے منطق تے بنا تحقیق دے فوج مخالف بیانیے دی اندھی تقلید کیوں کردے نین؟ انج دے خود کار تجزیہ نگاراں نوں ایس دے بارے وچ وی سوچنا چاہیدا اے کہ اپنی کم علمی پاروں اوہ کس دے بیانیے نوں مضبوط کرن وچ مصروف عمل نیں؟ سورہ الحجرات آیت نمبر 6: ارشاد باری تعالیٰ اے کہ : اے ایمان والو جے کوئی فاسق تہاڈے کول کوئی خبر لیائے تے ایس دی تحقیق کیہ کرو کدھرے (انج نہ ہوئے) کسے قوم نوں نادانی توں نقصان اپڑا دیو فیر تہانوں اپنے کیتے اُتے نادم ہونا پئے۔ 17 سال دی عمر دا منڈا آرمی وچ شامل ہوندا اے تے تقریباً 25 توں 35 سال تیکر دور دراز سرحدی علاقیاں، ریگستاناں، دشگوار گزار پہاڑی علاقیاں تے سخت ترین موسمی حالات دا ساہمنا کردے ہوئے وطن عزیز دے دفاع نوں یقینی بنان لئی ہمہ تن مصروف رہندا اے۔ اکثر ملکی دفاع تے اپنی پیشہ ورانہ تربیتی کورسز دی خاطر کدی بیرون ملک تے کدی ملک دے دوجے علاقیاں وچ تبادلیاں پاروں اپنے پیاریاں توں دوری دا کرب وی بخوبی برداشت کر لیندے نیں ۔ ایتھے اک گل قابل غور اے!ذرا سوچو جے لہور جہے شہر وچ تسیں رہائش پذیر ہون تے تہاڈے بچے ایتھے سکول، کالج یا یونیورسٹی وچ زیر تعلیم ہون تے تسیں رہائش پذیر ہون تے تہاڈے بچے ایتھے سکول، کالج یا یونیورسٹی وچ زیر تعلیم ہون تے تہانوں کسے دوجے شہر بالاں سنے منتقل ہونا پئے تے کنیاں مشکلاں درپیش ہون گیاں؟ جد کہ ہر فوجی افسر بلکہ ایس دے خاندان نوں 2 یا 3 سال دے دورانیے دے بعد ہون والے تبادلیاں پاروں وطن عزیز نال کیتے گئے عہد دی خاطر انج دے مسائل دا ساہمنا کرنا پیندا اے۔
تے ایتھے ایہہ گل وی ذہن نشین کر لین کہ ایہہ اوہ افسر نیں جنہاں دی تعلیم تقریبا 18-20 سال تیکر ہوندی اے تے اوہناں نے پی ایم اے ، آرمی پروفیشنل سکول، کمانڈ اینڈ سٹاف کالج، نیشنل ڈیفنس یونیورسٹی تے غیر ملکی کورسز وچ تربیت تے تعلیم حاصل کیتی ہوندی اے۔ جے مجموعی طور اُتے ویکھیا جائے تے ایہناں دی تعلیم 18-20 سال توں زاہد ہو جاندی اے تے ایہہ اوہ افسران نیں جیہڑی انتہائی سخت عسکری مہمات وچ بچ جان والے غازی نیں۔ ایہہ اوہ لوک نیں جیہڑے جان و مال تے ملک نال پیار دا مطلب سمجھدے وی نیں تے جان دے وی نیں۔ ایہہ اوہ افسر نیں جیہڑے سینکڑے سپاہیاں دی کمانڈ کردے نیں تے ایہناں دی رہنمائی وچ مصروف عمل رہندے نیں۔ اینی کثیر تعداد وچ سپاہیاں دے انتظامی امور چلانا، ایہناں دی پیشہ ورانہ صلاحیتاں نوں نکھارنا تے ملازمت دے معاملات نوں ویکھنا وی پوری زندگی لئی اک وسیع تجربے نوں جنم دیندا اے۔ ایہہ افسر اقوام متحدہ دے امن مشنز وچ حصہ لین دے نال نال بین الاقوامی کورسز، مشقاں تے ڈیپوٹیشن دا وسیع تر تجربہ رکھدے نیں تے جنہاں نوں سول حکومت ہر سماوی تے زمینی آفت دے دوران لوکاں دی امداد تے داخلی امن و امان نوں قائم رکھن لئی طلب کردی اے۔
اک آرمی افسر کنہا قیمتی اے؟ ایس دے بارے وچ مذکورہ تجربات تے خدمات دے صرف کجھ اہم پہلوئواں توں بخوبی اندازہ لایا جا سکدا اے۔ ایہو وجہ اے کہ دنیا دے ہر ملک وچ سابق فوجی افسران بطور سیاستدان، بیورو کریٹس، سفارتکار تے منتظمین دے عہدیاں اُتے تعینات ہو کے ملک و قوم دی ترقی لئی سول حکومت دے نال اپنی خدمات سرانجام دے رہے نیں۔ آئین و قانون دی رو نال تے متعلقہ تجربے دے حامل اوہ ایس عہدے لئی موزوں نیں۔