فلم دی فلاح دے سو کروڑ کتھے گئے؟
لكهت:اشفاق کاظمی
کوئی چھ ست مہینے پہلے وزیر اعظم پاکستان جناب عمران خاں ھوراں فلم دی فلاح لئی سو کروڑ روپے دے فنڈ دا اعلان کیتا سی جس دا انچارج محترم میجر جنرل عاصم باجوہ نوں بنایا گیا سی۔ آکھیا جاندا اے کہ وزیر اعظم دے دورہ ترکی دے موقع اتے اوہناں نوں مشہور ڈرامہ ارتغرل غازی ویکھایا گیا سی جیہڑا کے سلطنت عثمانیہ دے مذہبی تے تقافتی ورثہ دی عکاسی کر دا سی۔ وزیر اعظم نوں اوڈرامہ پسند آیا تے اوہناں اوس نوں پاکستانی عوام نوں ویکھان دا بندوبست کیتا۔ وزیر اعظم نے وزارت ثقافت نوں آکھیا کہ اوہ وی اسلامی ثقافتی ورثہ تے فلماں بنائون جس لئی اے فنڈ وقف کیتا گیا سی۔ بھُک دے مارے کئی سالاں توں بے روزگار شوبز لوکاں پہلے تے ایہ سمجھیا کہ اے امداد دا اعلان ساڈی مدد لئی کیتا گیا، بعدوں اوپر والی گل نکل آئی، فلمی سیانے تے فلمی تنظیماں نے جنرل صاحب نال رابطہ کیتا ایتھوں تک کے متعلقہ وزراء نال وی رابطے کیتے گئے لیکن بعد وچ اے گل وی سچی ثابت نہ ہوئی ۔ہُن اے آکھیا گیا کہ حکومت خود سرمایہ کاری کر کے فلماں بنائے گی تے ایس توں جیہڑا منافع ہوئے گا اس نال ماڑے تے بیمار لوکاں دی مدد کیتی جائے گی ویسے تے میاں نواز شریف حکومت وی شوبز لوکاں دی ہلکی پُھلکی مدد کر دی رہی مگر موجودہ حکومت نے ایس وچ وی کمی کر کے ہر تن مہینے بعد پندرہ ہزار دے رہی اے یعنی اونٹ دے منہ وچ زیرہ دین والی گل اے جد کہ نامور لوک نوں سفارشی سطح تے پنج لکھ توں لے کے اِک کرورڑ تک وی دے دِتے جاندے نیں جیہڑے کہ پہلے ای امیر کبیر نیں۔ویسے کجھ لوکاں نوں اک اک لکھ وی دِتا گیا مگر اوتھے وی حقدار دی شناخت دا نظام نہ ہون پاروں بعض غیر متعلقہ لوگ وی فائدہ چک رہے نیں۔ ایسے طرح جس کدی کسے نوں ملن آئیاں فلم دے کسے سین وچ شوقیہ اینٹری کیتی ہوئی اے او وی پنج ہزارمزے نال لے رہے نیں تے جناں ساری عمر فلم نوں دے دِتی اوہناں نال رابطہ نہ ہون پاروں او سسک سسک کے زندگی گزارن تے مجبور نیں۔ پاکستان وچ قائم تمام حکومتاں نے ہر دور وچ فلم نال مترئی ماں والا سلوک کیتا اے۔ چار واری ایس نوں صنعت تسلیم کر کے او سہولتاں نہیں دِتیاں جہڑیاں کہ دوجیاں صنعتاں نوں حاصل نیں۔ پیپلز پارٹی نے نیفڈک ناں دا ادارہ بنایا مگر اوتھے وی مامے چاچے نوازے جاندے ، فیر کیش نیشنل ایوارڈ دا اجرا کیتا گیا مگر چند سال بعد ایہنوں وی بند کر دِتا گیا ۔سچی گل ایہ وے کہ ہر حکومت نے ثقافت دے محکمے نوں فالتو جانیا اے تے اس نوں او اہمیت نہیں دِتی جس دا اے حقدار اے حالانکہ ثقافت ملک دا چہرہ ہوندی اے جس توں پتہ چلدا اے کہ کسے ملک دا رہن سہن ،کھان پین ،زندگی گزارن دا ڈنگ کیاے۔ مگر ایتھے تے آوے دا آوا ای وِگڑیا اے ،البتہ وفاق تے سارے صوبیاں وچوں خیبر پختون خواہ فنکاراں نوں بہتر طور تے ڈیل کر رہیاں اے ۔رہ گئی گل سو کروڑ دی تے اجے تک کسے پراجیکٹ دا اعلان نہیں کیتا گیا نہ کسے شوبز دے فلمساز یا ٹیکنیشن نال رابطہ کیتا گیا اے۔ ہُن ویکھنا اے وے کہ حکومت ایس فنڈ نوں فلم لئی استعمال کر دی اے یا ایس نوں ماضی دی طرح فالتوں جان کے اس فنڈ نوں کسے ھور کم وچ استعمال کر لیندی اے کیونکہ اجے تک او فنڈ لا پتہ اے۔
