جے سوچیا جاوے!
ارشاد بھٹی
جے سوچیا جاوے تے ایہ ضمنی انتخاب ساریاں دیاں اکھاں کھولن‘ ساریاں نوں نیند توں جگان تے ساریاں نوں جھنجھوڑن لئی کافی اے۔ سب توں پہلاں حکومت تے ساریاں سیاسی جماعتاں نوں شاباش‘ ہر الیکشن دے بعد رونا پٹنا‘ لٹے گئے‘ مارے گئے‘ دھاندلی ہو گئی‘ ساڈا مینڈیٹ چوری ہو گیا‘ کن پک گئے ایہ سن سن کے‘ پر مجال اے سارے مل بیٹھ کے کوئی حل کڈھن‘ انتخابی اصلاحات کرن‘ فول پروف انتخابی نظام بنان‘ اجیہا میکنزم بنان کہ انتخابی عمل شفاف ہو سکے‘ کرنا کجھ نہیں‘ بس رونا پٹنا اے‘ ایسے لئی ہن ایہ رونا پٹنا سن کے رتی برابر دکھ نہیں ہوندا اندازہ کرو اڑھائی ورھے ہو گئے تحریک انصاف نوں‘ 2013ء دے انتخابات‘ تحریک انصاف سڑکاں تے سی‘ دھاندلی ہوئی‘ چار حلقے کھولو‘ جلسے جلوس‘ احتجاج‘ لانگ ڈائون‘ سول نافرمانی‘ لانگ مارچ‘ دھرنے‘ اقتدار ملیا‘ تریہہ مہینے ہو گئے اجے تک اجیہا کم نہ کیتا کہ اگلے الیکشن وچ دھاندلی رک سکے۔ فیر سڑکاں تے نہ آنا پوے‘ جے اگلے اڑھائی ورھے ایسے طرح گزار کے تحریک انصاف‘ اپوزیشن کسے دن فیر روئے دھوئے کہ دھاندلی ہو گئی ‘ کون دھیان دیوے گا ایس رون دھون تے۔
اپوزیشن جہڑی اڑھائی ورھیاں توں کہہ رہی اے دھاندلی ہوئی اے ایہ مینڈیٹ جعلی اے ایہ اسمبلیاں جعلی نیں‘ 11 جماعتی پی ڈی ایم بن چکیا‘ پر سارے دے سارے نہ صرف ایہناں جعلی اسمبلیاں وچ بیٹھے نیں ایسے جعلی نظام دا حصہ سگوں اڑھائی ورھیاں وچ اک اجیہا کم نہ کیتا کہ اگلے الیکشن وچ دھاندلی نہ ہووے ایس لئی حکومت‘ اپوزیشن دوویں سگوں ایہدے وچ الیکشن کمیشن نوں وی شامل کر لوو‘ نتیجہ صفر بٹا صفر‘ ایہ ضمنی الیکشن‘ بھاویں سچ‘ جھوٹ سامنے آنا باقی‘ پر جو خبراں‘ جیویں پریذائیڈنگ افسر غایب‘ ووٹاں دے بیگ اگے پچھے‘ پولنگ سٹیشن یرغمال‘ باقاعدہ منصوبہ ب ندی نال پولنگ سلو‘ نتیجیاں وچ تاخیر‘ جھگڑے‘ فسادات‘ مارکٹ‘ فائرنگ‘ دو ہلاک‘ اٹھ زخمی‘ حکومت کہہ رہی اے اسیں جت چکے‘ نتیجہ دتا جاوے۔ اپوزیشن کہہ رہی اے دھاندلی ہوئی‘ پولنگ فیر کرائی جاوے حکومت کہہ رہی اے ساڈا صبر نہ ازمایا جاوے۔ دھاندلی ن لیگ نے کیتی اے۔ اپوزیشن کہہ رہی اے کہ پہلی واری الیکشن کمیشن دا عملہ وی چوری ہو گیا۔ مینڈیٹ چوری ہویا‘ کوئی کہہ رہیا اے ووٹ پان دی شرح تریہہ چالھی فیصد سی۔ اوہنوں دھاندلی نال اسی نوے فیصد بنا دتا گیا مطلب حکومت‘ اپوزیشن دوویں دہائیاں دے رہیاں نیں جد کہ الیکشن کمیشن بے بسی دی تصویر بنے بیٹھا کہہ رہیا اے ساڈی پولیس‘ انتظامیہ کسے نے سنی نہ مدد کیتی۔ ایہ ڈسکہ دے اک حلقے دا حال‘ ہن ایسے نظام‘ ایسے الیکشن کمیشن نے پورے ملک وچ بلدیاتی انتخابات وی کرانے نیں تے اڑھائی ورھے بعد پورے ملک وچ قومی تے صوبائی انتخابات وی‘ آپ ای سوچو‘ اک حلقے وچ دو موتاں تے ایہ حال‘ پورے ملک وچ انتخابات ہوئے تے اللہ نہ کرے کیہ کجھ نہیں ہو سکدا ایس لئی حکومت‘ اپوزیشن‘ الیکشن کمیشن نوں چاہیدا اے اجے وی ویلا‘ کجھ اجیہا کر لوو کہ انتخابات شفاف ہون‘ پرامن ہون‘ ایتھے جہڑ یدو بندے جانوں گئے اوہناں دے ٹبر نال دلی تعزیت‘ اللہ مرحومین دی مغفرت کرے‘ اللہ اوہناں دے ٹبر نوں صبر عطا فرمائے۔
ایہ ضمنی انتخابات‘ حکومت دیاں اکھاں کھولن لئی کافی‘ حکومت اپنے گھر نوشہرہ وچ ہار گئی‘ خیبرپختونخوا جتھوں ساڑھے ست ورھے تحریک انصاف دا راج ہووے اوتھے گروہ بندی سگوں اک خاندانی جھگڑے دی وجہ نال ہار جانا‘ ایہ ایس لئی چنتاجوگ دی گل اے کہ اجہیاں گروہ بندیاں‘ اختلافات تحریک انصاف دے ہر دوجے حلقے وچ موجود‘ نوشہرہ پرویزخٹک دا آبائی شہر‘ پرویزخٹک جہڑے کجھ دیہاڑ پہلاں اک جلسے وچ کہہ رہے سن میں تیلے نوں وی کھڑا کراں تے اوہ وی جت جاوے اوسے پرویزخٹک دا امیدوار ہار گیا‘ بھائی لیاقت خٹک جہناں نوں سیٹ ہروان دے بعد صوبائی وزارت توں ہتھ دھونے پے گئے اوہ اپنے پُتر نوں ایم پی اے دا ٹکٹ دوانا چاہندے سن جدوں پُتر نوں ٹکٹ نہ ملیا تے باپ بیٹے نے رَل کے حلقے وچ اجہیاں چالاں چلیاں کہ پی ٹی آئی دا امیدوار ہار گیا۔ خیر نال پرویزخٹک دے بھتریئے نوں ٹکٹ مل جاندا تے اوہ خاندان دا چھیواں بندہ ہوندا‘ ایس توں پہلاں پرویزخٹک دے خاندان دے پنج بندے اقتدار وچ‘ بہرحال تحریک انصاف وچ اجے وی بڑیاں دھڑے بندیاں‘ اختلافات ختم کر لوو نہیں تے نوشہرہ دی کہانی باقی حلقیاں وچ وی دہرائی جا سکدی اے۔
ایہ ضمنی انتخابات‘ مسلم لیگ (ن) دیاں اکھاں کھولن لئی کافی‘ بلاشبہ مسلم لیگ نے نوشہرہ وچ تحریک انصاف دی سیٹ جت لئی پر مسلم لیگ دی طاقت پنجاب‘ سنٹرل پنجاب مسلم لیگ دا گڑھ‘ بھاویں مسلم لیگ نے وزیرآباد ایم پی اے دی اپنی سیٹ فیر جت لئی پر مسلم لیگ نے 2018ء دے انتخابات وچ ایہو سیٹ تقریباً 28ہزار ووٹاں دی لیڈ نال جتی۔ 2018ء دے انتخابات وچ تحریک انصاف دے امیدوار نے 21 ہزار 792 جد کہ مسلم لیگ (ن) دے امیدوار نے 59 ہزار 267 ووٹ لئے ایس واری اوہ سیٹ جہڑی مسلم لیگ نے تقریباً 28 ہزار ووٹاں دی لیڈ نال جتی سی اوہو سیٹ ایس واری چار ہزار ووٹاں دی لیڈ نال جتی۔ ایتھے تحریک انصاف نے 2018ء دے انتخابات دے مقابلے وچ دونے ووٹ لئے جد کہ مسلم لیگ (ن) نے تقریباً چھ ہزار ووٹ گھٹ لئے‘ ایسے طرح ڈسکہ وچ ہویا‘ بھاویں ڈسکہ وچ دھاندلی دے الزامات تے نتیجہ روک دتا پر ایتھے وی تحریک انصاف نے 2018ء دی نسبت زیادہ ووٹ لئے۔ 2018ء وچ ایہ سیٹ مسلم لیگ نے 40 ہزار ووٹاں دی لیڈ نال جتی سی ایس واری حالات ایہہ کہ پی ٹی آئی دعویٰ کر رہی اے کہ اوہ جت چکی اے۔ جت ہار نوں اک پاسے رکھو پر اپنی تھاں ایہ وی حقیقت اے کہ تحریک انصاف دا ڈسکہ وچ 2018ء دی نسبت ووٹ بینک ودھیا۔
ایہ ضمنی انتخابات جمعیت علمائے اسلام (ف) دیاں اکھاں کھولن لئی وی کافی‘ جمعیت خیبرپختونخوا دے ضلع کرم وچ اپنی جتی ہوئی سیٹ تحریک انصاف دے ہتھوں ہار گئی۔ پی ڈی ایم دے صدر مولانا فضل الرحمن ڈھائی ورھیاں توں ایہو کہہ رہے نیں کہ 2018ء وچ اوہناں نوں کے پی وچ زبردستی ہروایا گیا۔ 2018ء دے انتخابات دھاندلی زدہ‘ مطلب انتخابات جعلی‘ مینڈیٹ جعلی‘ اسمبلیاں جعلی‘ اوہ ایس ضمنی انتخابات وچ کے پی وچ اپنی جتی سیٹ ہار گئے۔ کیہ ایس واری وی دھاندلی ہوئی‘ کیہ ایہ سیٹ وی اوہناں نوں ہروائی گئی۔ کیہ ایس واری وی کوئی داستاں ہے سنان لئی‘ ایہ سب کجھ سامنے رکھ کے سوچیا جاوے تے ایہو ضمنی انتخابات ساریاں دیاں اکھاں کھولن لئی‘ ساریاں نوں نیندر توں جگان لئی‘ ساریاں نوں جھنجھوڑن لئی کافی اے۔
(بشکریہ روزنامہ جنگ)
