بیمہ گیری

امرجلیل

تسیں بیمہ دار او؟ میرا مطلب اے تسیں بیمہ پالیسی کرائی ہوئی اے؟ تسیں بیمہ سمجھدے او ناں؟ بیمہ دا مطلب اے انشورنس‘ انشورنس نوں کئی لوک Assurance وی کہندے نیں۔ بیمہ ویچن والے تہانوں خاطری دیندے نیں کہ بیمہ پالیسی دی مدت دوران تسیں اللہ سائیں نوں پیارے نہیں ہوو گے تے تسیں ہر مہینے پالیسی ویچن والی کمپنی نوں بیمہ دی مقررہ رقم دیندے رہوو گے۔ پالیسی دی مدت دوران جے تسیں اللہ سائیں نوں پیارے ہو گئے تے فیر تسیں بیمہ پالیسی دی مقرر قسط ادا نہیں کرو گے کیوں جے تسیں مر چکے ہوو گے ایہدے الٹ بیمہ کمپنی تہاڈے وارثاں نوں بیمہ دی رقم سود سنے دیوے گی۔ تسیں بیمہ پالیسی لئی ہوئی اے؟ جے نہیں تے بھائی دیر نہ کرو۔ تہاڈے وارثاں دے وارے نیارے ہو جان گے پر ایہدے لئی تہاڈا اللہ سائیں نوں پیارا ہو جانا ضروری اے۔ اوج جوانی وچ‘ میں جدوں پہلی واری بیمہ پالیسی لینی چاہی سی اودوں مینوں نہیں سی ملی۔ بیمہ پالیسی دے فارم وچ اندراج کردے ہوئے تہانوں بیمہ پالیسی دی مدت لکھنی ہوندی اے کنے عرصے دی پالیسی تسیں لینا چاہندے او۔ مثلاً دس‘ ویہہ‘ پنجی ورھے؟ مدت پالیسی لئی مختص کالم وچ میں لکھیا مینوں تریجی جنگ عظیم تک دی پالیسی چاہیدی اے۔ بیمہ کمپنی والے بوکھلا گئے۔ مینوں پالیسی دین توں انکار کردے ہوئے اوہناں آکھیا کہ ایس قسم دی بیمہ پالیسی دنیا دی کوئی انشورنس کمپنی بیمہ دار نوں نہیں دیندی۔
میں پاگل نہیں تے نہ ای میں پاگل پنے دی گل کیتی سی۔ بہت پہلے اک نجومی نے میرا ہتھ ویکھدے ہوئے آکھیا سی: تہاڈے پیدا ہون دے کجھ عرصے بعد دنیا نوں دوجی جنگ عظیم بھگتنی پئی سی۔ تسیں تریجی جنگ عظیم دوران مرو گے۔ میں اپنے مرن تک بیمہ پالیسی لینا چاہندا سی جہڑی بقول نجومی دے تریجی جنگ عظیم دوران واقع ہونی سی۔ بیمہ کمپنی نے مینوں پالیسی دین توں انکار کر دتا سی۔ اودوں مینوں پتہ لگا سی کہ بیمہ کمپنیاں سٹھ ورھے دی عمر تک تہانوں پالیسی دیندیاں نیں۔ ایس توں اگے نہیں۔ نجومی دی پیشگوئی نوں انج تے میں بھل بھلا گیا سی پر ایہ جو اک ورھے توں دنیا نوں پراسرار کرونا وائرس نے گھیر رکھیا اے مینوں لگدا اے ایہ تریجی جنگ عظیم اے جہدے فریقین وچ اک پاسے پوری دنیا اے تے دوجے پاسے نامعلوم‘ الوپ‘ غایب‘ نظر نہ آن والا دشمن اے۔ پہلی جنگ عظیم پنج ورھے چلی سی۔ دوجی جنگ عظیم چھ ورھے چلی سی۔ کوئی نہیں سی جان دا کہ تریجی جنگ عظیم کدوں تک چلے گی۔ پچھلے اک ورھے دوران دنیا پراسرار بیماری دا علاج لبھن وچ نکام رہی اے۔ سارا زور ایس او پی تے اے۔ گھراں چوں مجبوری دی حالت وچ نکلو‘ نہیں تے گھراں وچ بیٹھے رہوو۔ بار بار ہتھ دھوو بھاویں تسیں نفسیاتی مریض ہو جائو۔ اک دوجے توں چھ فٹ دور رہوو۔ اک کمرے والے گھر وچ دس بندیاں تے مشتمل ٹبر دے لوک کیہ کرن؟ ایس او پی والے کجھ نہیں دسدے۔ ماسک تے سینٹی ٹائزر بنان والیاں دی موج ہو گئی اے۔ دنیا دے سائنس داناں نے علاج لئی دوا بنان وچ نکامی دے بعد بیماری دی روک تھام لئی ویکسین‘ اک قسم دا ٹیکہ بنا لیا اے۔ پراسرار وائرس نال دنیا تے حملہ کرن والے پراسراردشمن خلاف ہن تک تے دنیا بھر دے دوست دشمن ملک اکمٹھ نیں پر روک تھام تے بچائو دی ویکسین آن مگروں ملکاں دے اتحاد وچ ویکسین سیاست سرایت کر گئی اے۔ جے ملکاں دے وچکار اتحاد ٹوٹ پھوٹ دا شکار ہو گیا تے فیر کرونا وائرس وچ مبتلا مریضاں لئی علاج کدی وی دریافت نہیں ہووے گا۔ تریجی عالمی جنگ دنی دی آخری جنگ عظیم ہووے گی۔ ساڈی زندگی تے موت دا حساب کتاب اللہ سائیں دے نظام عظیم وچ ہوندا اے پر ساڈے نجومی بھائی وی بڑی کمال دی چیز ہوندے نیں میں کیوں جے اجے تک زندہ واں ایس لئی کرونا وائرس دی تریجی جنگ عظیم نہیں جے میں مر گیا تے کرونا وائرس تریجی جنگ عظیم ہووے گی۔ ایسے پاروں بیمہ کمپنی نے مینوں بیمہ دار بنان توں انکار کر دتا سی۔
اک واری فیر میں بیمہ دار بنن دی کوشش کیتی سی پر اودوں وی بیمہ کمپنی نے مینوں تکنیکی بنیاداں تے بیمہ دین توں انکار کر دتا سی۔ بیمہ فارم وچ تہانوں اپنے کسے وارث نوں نامزد کرنا ہوندا اے تاں جے پالیسی دی مدت دوران جے تسیں اللہ سائیں نوں پیارے ہو جائو تے بیمہ دی رقم سود سنے تہاڈے وارث نوں دتی جاوے۔ میں بڑا لبھیا پر مینوں وارث نہیں ملیا۔ ہن میں اجہی کسے بیمہ کمپنی دی تلاش وچ آں جو لاوارثاں دے کفن دفن دا بیمہ کردی ہووے۔ پالیسی وچ مدت دی معیاد نہ ہووے۔ اسیں لاوارث کمپنی نوں بیمہ پالیسی دی مہینہ وار قسط مردے دم تک دیندے رہواں گے۔ جدوں اسیں اللہ سائیں نوں پیارے ہو جائیے۔ اودوں سانوں کفن پہنان مگروں مناسب قبرستان وچ دفن کر دین۔ کراچی دے قبرستاناں وچ قبر دی قیمت لکھاں روپیے توں ودھ گئی اے۔ بیمہ پالیسی موجب ایہ رقم بیمہ کمپنی بھرے گی۔ ایس بیمہ پالیسی دا مجوزہ ناں ہووے گا‘ آخری رسماں دی بیمہ گیری‘ تسیں تیار ہو جائو بیمہ دار بنن لئی۔٭٭