جان کاشمیری ہوراں دی کتاب ’’ شالا خیر‘‘ بارے اِک بیٹھک

عتیق انور راجہ تے ایہناں دے ساتھیاں نے انتھک محنت نال ادب و ثقافت دی خدمت کیتی اے، جان کاشمیری

رپورٹ: آفاق بٹ

شیخ دین محمد لائبریری شیر انوالہ باغ وچ سائبان ویلفیئر سوسائٹی رجسٹرڈ دے زیر اہتمام ملک دے نامور شاعر جان کاشمیری دی پنجابی کتاب شالا خیر اُتے اک بیٹھک دا انعقاد کیتا گیا ۔ بیٹھک دی میزبانی خواجہ شجاع اللہ نے کیتی جد کہ صدارت صاحب کتاب جان کاشمیری نے کیتی جد کہ معزز مہماناں وچ شوکت ڈار،نائلہ ریاض بٹ،ریاض بٹ،محترمہ روبینا ناز ،سوہنیا ناز،سمیرا شجاع،عثمان اشرف،چوہدری سجاد مشتاق،راجہ افضال عزیز ،رانا اظہر،یاسر مشتاق مغل،مہر امین،چوہدری عاصم شہزاد گجر،عبد الخالق بھٹے وڈ،غلام عباس،بلال ثاقب،عمر فاروق،مطلوب حسین مطلوب،ڈاکٹر امین جان،رمضان تائب ،حاجی عبد الغفور باجوہ ،لائبریری انچارج انس جاویدتے دیگر شامل سن۔

جد کہ یٰسین گجر نے مہماناں دی تواضع دا اہتمام کیتا جد کہ خرم شہزاد بھٹہ مہماناں نوں پھُل پیش کردے رہے۔ بیٹھک وچ شہر دے تعلیمی اداریاں تے سماج دے مختلف طبقیاں نال تعلق رکھن والے علم دوست تے کتاب دوست لوکاں نے شرکت کیتی تے اظہار خیال کردے ہوئے کہیا کہ دنیا وچ اج اوہ ای ملک ترقی یافتہ اکھوا رہے نیں جنہاں نے اپنے نوجواناں دی بہتر تربیت کیتی۔ تربیت دا بہترین طریقہ ایہہ اے کہ نوجواناں نوں مسلسل انج دیاں سرگرمیاں دا حصہ بنان دی کوشش کیتی جائے جنہاں وچ اوہ اپنے جذبات دا اظہار کر سکدے۔ اج دے ترقی یافتہ ملکاں وچ ہر سال نہ صرف کتاباؓ شائع ہو رہیاں نیں بلکہ اوتھے دے لوک جدوں ایہناں نوں ویلا ملے کتاب دی و رق گردانی کرن لگدے نیں جد کہ ساڈے کول بچے، نوجوان بزرگ تے خواتین ہر ویلے فیس بک اُتے مصروف رہندے نیں۔ کتاب پڑھن دا رواج گھٹ ہوندے ہوندے ختم ہو چکیا اے۔لائبریریاں وچ جان دی عادت ختم ہو چکی اے۔ بدقسمتی نال پاکستان وچ مجموعی طور اُتے کتاب پڑھن دی عادت ختم ہو چکی اے۔ ایسے لئی ساڈا اج دا نوجوان ذہنی گھٹن دا شکار اے۔ جان کاشمیری نے کہیا کہ عتیق انور راجہ تے ایہناں دی ٹیم دی کوششاں دے معترف نیں۔ ایہہ لوک حقیقی معنیاں وچ اپنی زبان، روایات تے ثقافت دے فروغ لئی کم کر رہے نیں۔