حکومتی پالیسیاں نال کاروبار وچ بہتری آئی: طارق محمود
داروغہ والا انڈسٹری اونرز ایسوسی ایشن24 ، 25 مارچ نوں ’’ میڈ اِن داروغہ والا‘‘ صنعتی نمائش کروا رہی اے
تحریر :بدر ظہور چشتی
کسے وی ملک دی معیشت اوہدوں تیکر ترقی نہیں کر سکدی جد وں تیکر اودھے تاجر،صنعت کار تے حکومت اک پیج تے نہ ہون۔ ایسے واسطے ترقی یافتہ ملکاں وچ حکومتاں ایہناں نال صلاح مشورہ کر کے اقتصادی پالیسیاں بنائوندیاں نیں۔ پاکستان وچ بدقسمتی دے نال ایہہ عمل زیادہ نہیں ہویا تے سرکاراں تے مشیراں نے کاغذی فارمولیاں تے پالیسیاں بنائیاں جہدے وچ درآمدات تے برآمدات دا فرق ودھ گیا تے ملک قرضے ہیٹھاں چلا گیا پر موجودہ عمران خان سرکار نے شروع دیہاڑ توں ای تاجراں تے ملزمالکان دے نال ہر سطح تے مشاورت دا عمل شروع کیتا۔
اج ایسے وجہ توں کرونادے باوجود تباہ حال ملکی معیشت دوبارہ عروج ول ٹر پئی اے تے درآمدات گھٹ رہیاں نیں تے ملکی انڈسٹری نوں فروغ حاصل ہو رہیا اے۔ معاملات ٹیکس دے ہون یا ڈالر دی اُڑان دوناں معاملات تاجراں تے صنعت کاراں نوں براہ راست متاثر کردے نیں حکومتی پالیسیاں اُپرگل بات کرن لئی روزوار بھلیکھا نال اک خصوصی بیٹھک وچ اپنے خیالات دا اظہار کردے ہوئے صوبائی دارالحکومت دے صنعت کاراں دی اک وڈی تنظیم داروغہ والا انڈسٹری اونرز ایسوسی ایشن دے آگواں جنہاں وچ ایہدے چیئر مین طارق محمود صدر رانا شعبان اختر سابق سیکرٹری جنرل سلیم احمد فاضل سابق سیکرٹری جنرل محمد عاصم رفیق نے آکھیا کہ درآمدات تے برآمدات وچ توازن حکومتی کامیابی اے پر مقامی انڈسٹری نوں ایہدے براہ راست ثمرات نہیں اپڑ رہے۔
کورونا دے دوران حکومت دی صنعت کار دوست پالیسی توں بعد ساڈے کول بے پناہ آرڈر نیں پر سکریپ چائنہ ایکسپورٹ ہون دی وجہ نال ساڈے لئی خام مال بہت مہنگا تے نایاب ہو گیا اے۔ جہدی وجہ نال آرڈر ڈلیوی ناممکن ہو چکی اے۔ داروغہ والا انڈسٹری اونرز ایسوسی ایشن دے چیئر مین طارق محمودہوراں ایس موقعے تے اپنا موقف رکھدیاں آکھیا کہ ڈالر دی قیمت وچ اضافے تے صنعتکاراں نوں بہت فائدہ ہویا اے۔دنیا بھر دے انڈسٹری دے آرڈر سانوں مل رہے نیں ساڈی تنظیم وچ شامل فائونڈریز نہ صرف کہ ایس ویلے دن رات کم کر رہیاں نیں بلکہ اپنے یونٹس دی تعداد وچ وی اضافے دا سوچ رہے نیں ایس سلسلے وچ دنیا نوں اپنی پراڈکٹس وکھان لئی 24 تے 25 مارچ نوں اسیں اک بوہت وڈی نمائش دا اہتمام کردے ہاں جہدا ناں Made in Daroghawalaرکھیا۔ ایس نمائش وچ اسیں ملک بھر توں تاجر تے صنعتکار مدعو کیتے نیں تاں جے اوہ آ کے ویکھ سکن کہ اسیں موٹر سیکل، کار تے ٹریکٹر دے پرزیاں دے نال نال دفاعی سازو سامان، چینی تے سیمنٹ دی صنعتاں وچ استعمال ہون والی مشینری دے پرزے (Shave Parts) وی تیار کرنے آں جیہڑا ساڈے ملک لئی اعزاز تے ساڈے نال کم کرن والے محنت کشاں دی مہارت دا منہ بولدا ثبوت اے۔ دروغہ والا انڈسٹری اونرز ایسوسی ایشن دے صدد رانا شعبان اختر ہوراں آکھیا کہ ساڈا سارا خام مال گوجرانوالہ توں چائنہ چلا جاندا اے جہدی وجہ نال انڈسٹری مشکلات دا شکار اے ڈالردی قیمت گھٹ ہون نال سانوں غیر معمولی فائدہ ہونا سی سانوں سکریپ ملک وچ لبھدا لیکن چائنہ دے تاجراں نے پاکستانی سکریپ اونے پونے داموں خرید کے اوہنوں گوجرانوالہ، ڈسکہ، تے شیخوپورہ وچ قائم نکی فائونڈریز توں ڈھال کے اپنے ملک لے جا کے اوتھے مشینری دی تیاری وچ استعمال کر رہے نیں۔ جہدی وجہ توں ساڈی ایکسپورٹ متاثر ہون دا خطرہ اے۔ حکومت کولوں مطالبہ کردے ہوئے رانا شعبان اختر نے کہیا کہ ایس ایکسپورٹ تے فوری طور تے ڈیوٹی ودھانی جائے تاں جے ملکی صنعت نوں خام مال بہتر آ سکے اوہناں بجلی تے گیس دی قیمتاں وچ کمی تے اوہناں دی سارا سال فراہمی اُتے وی زور دتا۔
اوہناں آکھیا کہ حکومت بلاتاخیر سانوں LNG گیس کنکشن چالو کر کے دیوے تاں جے ساڈی انڈسٹری فروغ پا سکے۔ حکومتی پالیسیاں دے بارے وچ گل کردے ہویاں سابق سیکرٹری دروغہ والا انڈسٹری اونر ایسوسی ایشن محمد عاصم رفیق نے آکھیا کہ ایہہ علاقہ سمال انڈسٹری حکومتی کاغذاں وچ موجود اے پر ہر حکومت دی طرح بزدار سرکار وی ساڈے نال سوتیلی ماں ورگا سلوک کر رہی اے۔ سانوں سہولتاں دے کے حکومت اپنے خزانے وچ کروڑاں روپئے دا ٹیکس وصول کر سکدی اے تے ہزاراں افراد نوں روزگار دے موقعے مل سکدے نیں۔ ساڈیاں بار بار دتیاں عرضیاں تے گزارشات دا وی کوئی نتیجہ نہیں نکل سکیا۔ محمد عاصم رفیق نے آکھیا کہ دروغہ والا انڈسٹری اونرز ایسوسی ایشن وچ ایس ویلے 10 قسماں دیاں ملاں نیں جہڑیاں حکومتی خزانے وچ نامناسب حالات دے باوجود کروڑاں روپئے دا ریونیو جمع کروارہیاں نیں۔ اوہناں آکھیا کہ ساڈیاں فیکٹریاں، فائونڈریز، ڈھلائی دے کارخانے، ری رولنگ انڈسٹری، انجینئرنگ سروسز، گلاس انڈسٹری، پلاسٹک انڈسٹری، گھریلو صنعتاں تے آٹو پارٹس انڈسٹری شامل اے۔ اوہناں آکھیا کہ ساڈی چمڑا انڈسٹری دفاع وطن لئی وی بے پناہ خدمات سرانجام دے رہی اے۔ایس موقعے تے اُچیچی گل بات کردیاں دروغہ والا انڈسٹری اونر ایسوسی ایشن دے سابق سیکرٹری جنرل تے 24/25 مارچ نوں ہون والی ملکی نمائش دی کمیٹی دے چیئر مین سلیم احمد فاضل ہوراں آکھیا کہ اسیں کوشش کرنے آں کہ تاجراں نے مل مالکان تے حکومت دے وچکار پل دا کردار ادا کر سکیے۔ ہون والی نمائش دے انتظامات بارے اوہناں نے آکھیا کہ ڈپٹی کمشنر لہور نوں نمائش دے انعقاد دی اجازت واسطے عرضی دے دتی گئی اے تے دوجیاں حکومتی اداریاں نال وی گل بات جاری اے۔ ساڈی کوشش اے کہ دروغہ والا وچ بنن والی ساری شیواں ایس نمائش وچ پیش کیتیاں جاون تاں جے زیادہ توں زیادہ پذیرائی مل سکے۔ اوہناں دا آکھنا سی کہ ٹیکساں وچ حکومت کمی کرے تاں جے صنعت کار مزید صنعتاں لیا سکے۔ ساڈی ایسوسی ایشن وچ کم و بیش اک ہزار توں زیادہ صنعتکار شامل نیں پر مقام افسوس اے کہ ساڈا صنعتی علاقہ ہجے تیکر بنیادی سہولتاں توں وی محروم اے اوہناں نے آکھیا کہ شوگر، سیمنٹ تے آٹوز انڈسٹری دے نال نال اسیں گلاس انڈسٹری تے زرعی انڈسٹریز دے مالکان نوں وی دعوت دینی اے تاں جے اوہ بیرون ملک دی بجائے ملکی سطح تے تیار ہون والے سپیئر پارٹس خرید سکن۔ ایس موقعے تے مشترکہ موقف دا اظہار کردے ہوئے دروغہ والا انڈسٹریز اونر ایسوسی ایشن دے عہیدران نے وزیرعظم عمران خان ہوراں کولوں دروغہ والا ایسوسیایشن دے مطالبات تے تجاویز
اوتے ہمدردانہ غور دی منگ کیتی تا جے کہ ملکی انڈسٹری تے نال نال دروغہ والا انڈسٹری تے وی عروج آ سکے اور لوکائی نوں نوکریاں مل سکن۔
