!!!خان صاحب گھبرانا نئیں

وقار احمد وقار

جدوں وی لگدی ا ے میرے دل تے کوئی سَٹ نَویں
میری سوچاں نُوں چوکھا نکھار دیندی اے
خزاں دے کرب تُوں آشنا ہووے جہڑاشخص
بڑا ای لطف فیر اوہنوں بہار دیندی اے
عمران خان چنگا ایس لئی لگدا اے کہ اوہ کرپٹ سسٹم دے خالق چور،ڈاکوتے لٹیریاں اگے سینہ تان کے کھلوتا اے تے بھیڑا ایس لئی لگدا اے کہ اوہنیں پاکستانی سیاست وچ ڈھیر سارا وقت گذارن والے صاحبِ فہم و فراست تے بصیرت و بصارت تجربہ کار دانشور طاھرالقادری صاحب دی گل نئیں منّی تے میدان سیاست نُوں کرکٹ دے میدان نال جوڑ کے نویں سِر اپنا وکھرا تجربہ کرن دی کوشش کیتی اے تے ڈھیر سارا وقت برباد کر لئیا اے۔
طاھرالقادری صاحب عمران خان صاحب نوں سمجھایا سی کہ ایہ سسٹم نمک دی اوہ کان اے جس وچ ہیرا وی رکھو گے تے اوہ کجھ دیر بعد نمک ای جاپن لگ پوے گا تے دُوجی گل ایہ کیتی سی کہ ایس سسٹم نوں تبدیل کیتے بغیر ہزار الیکشن وی جِت کے حکومت بنا لو نتیجہ صفر ای رہنا۔خان صاحب تبدیلی ضرور چاہندے ساہن تے چاہندے نیں پَر جنج چاہندے نیں اُنج آئونی کوئی نئیں۔
مینوں ایہ وی یاد اے کہ طاھرالقادری صاحب ایہ وی دعوے نال آکھیا سی کہ
٭۔میتھوں موٹے مارکر نال لکھوا کے تے دستخط کروا کے رکھ لو کہ کجھ دیر گذرن دی دیر اے ایہ تبدیلی ہوا وچ اُڈ جانی اے۔
سلام اے مردِ درویش دی دُور بینی نُوں جس نے ہمیشہ آن والے وقت لئی جو وی دسیا اوہ حرف بہ حرف تقدیر دے صفحے دے سینے تے لکھیا نظر آیاتے جنج ماضی وچ عمران خان نُوں کہنا پئیا سی اُنج ای لگدا اے کہ تھک ہار کے آخر اک واری فیر خان صاحب دلوں آکھن تے مجبور ہو جان گے کہ
Dr.Qadri was Right
کاش وقت برباد کرن بعدوں پاکستانی رہنما تے پاکستانی قوم Dr.Qadri was Right آکھن والے سارے ای ایس حقیت نُوں من لین تے ایہ کہنا شرو ع کردین کہ
Dr.Qadri is Right
جس دِن قوم Dr.Qadri is Rightمن لئیا اوہ دن ای تبدیلی دے آغاز دا پہلا دن ہونا اے بھانویں منّو یا نہ منّو۔
سینیٹ دے الیکشن وچ حسبِ روائت جو کجھ ویکھن نوں ملیا اے اوہ سوچ کے کم از کم میرا دل تے دکھی نئیں کہ ایہ سبھ کجھ ایس سسٹم وچ رہ کے انج ای بھگتنا پینا سی کہ جس عمارت نُوں گرانا مقصود ہووے کدی وی اوہدے اندر نئیں بیٹھیا جاندا۔کوئی فرق نئیں کل جہڑے کھوتیاں دا مُل لا کے جہانگیر ترین صاحب کامیاب ترین ساہن اج اوہ ای کھوتے زرداری صاحب خریدکے ایس سسٹم تے واری تے قربان جاندے تے میسی ہسنی ہسدے نظر آرہئے نیں تے اج قومی خزانے وچوں ہار چوری کرن والا نون لیگ دی ماضی دی اکھوں اتھرو بن کے ڈِگن والا یوسف رضا گیلانی سارے سسٹم دی اکھ دا تار ا بنیا کھلوتا اے۔
خان صاحب مخلص نیں تے 62-63 دے معیار تے پورے وی اتردے نیں پَر ایہ سسٹم؟؟؟کاش خان صاحب کرکٹ جس نوں Cricket is by chance کہندے نیں توں ہٹ کے میدانِ سیاست وچ اک کھلاڑی دی طرحاں نئیں بلکہ اک جینوئن سیاستدان وانگوں قدم رکھدے ۔اوہناں نوں اپنے اوس دھرنے تے وی بڑا مان اے جہڑا طاھرالقادری صاحب دے تربیّت یافتہ پاکستان عوامی تحریک دے کارکناں دے جم کے دن رات بیٹھے رہن پاروں قائم رہئیا تے طاھرالقادری صاحب دے اُٹھ کے چلے جان بعد اک دن وی جاری رہن دی پوزیشن وچ نظر نہ آیا۔
رب سوہنے خان صاحب نوں کافی صلاحیتاں نال نوازیا ہویا اے۔ایہدے وچ شک نئیں کہ اوہ مخلص،ایماندار تے شریف انسان نیں پَر میدانِ سیاست وچ ایہناں خوبیاں دے نال نال قابلیّت تے تجربے دا ہونا ضروری اے ۔کجھ نہ کجھ تجربہ تے خان صاحب نوں ہو ای گیاہونا اے کہ ایس میدان دا اصل ماجرا کیہ اے؟
خان صاحب گل کردے ساہن کہ جے کپتان آپ ٹھیک ہووے تے اوہ ٹیم ٹھیک کر لوے گا پَر سچّی گل تے ایہ کہ سوائے عون عبّاس بپّی صاحب ورگے چند اِک مخلص ،محنتی تے PTI نال ہرحال وچ وفاداری نوں قائم رکھن والے کمٹڈ ساتھیاں دے خان صاحب کول ٹیم وی مکمل نئیں ۔دوجیاں کرپٹ پارٹیاں دے MNAs/MPAs کنے کوں خان صاحب دے ویژن نال وفاداری رکھدے نیں پَتالگ نئیںجے گیا؟
خان صاحب حکومت وچ آن توں پہلاں جسطرحاں پاکستان عوامی تحریک دے کارکناں نال شفقت فرماندے تے سانحہء ماڈل ٹائون دے ذمہ داراں نوں لٹکان دی گل کردے ساہن اوہ گل ای نئیں رہئی پَر سوشل میڈیا تے طاھرالقادری صاحب دے کارکن خان صاحب دے مخالفین نوں اجے تک دو دو ہتھیں لیندے پئے نیں تے خان صاحب نوں ایس سسٹم وچ مجبور تے لاچار سمجھدے نیں کہ خان صاحب اوہناں دے قائد دی گل نہ منن دی سزا بھگت رہئے نیں۔
خان صاحب غریب عوام دی خوشحالی واسطے کوئی وی عملی قدم نئیں چک سکے سوائے ہر وار اک نواں زخم دے کے ایہ کہن دے کہ ۔۔۔گھبرانا نئیں!!!
خان صاحب نوں جے طاھرالقادری صاحب دیاں گلاں بھلیاں نہ ہون تے اجے وی اپنی اختیارکیتی راہ بدل لین کہ ایس سسٹم دی راہ تے پینڈا کرکے منزل دور دور تک نئیں ۔اسیں اج وی خان صاحب دی سپورٹ جاری رکھنا چاہندے آں تے نئیں چاہندے کہ چور،ڈاکوتے لٹیرے فیر ملک تے قابض ہوکے نویں سِر پرانی لٹ مار فیر شروع کر دین۔حالات جو وی نیں اسیں خان صاحب دے ای نال آں تے کل تک اوہ سانوں کہندے ساہن تے اج اسیں رل کے اوہناں نوں کہندے آں کہ
خان صاحب گھبرانا نئیں!!!