پروین سجل دے پنجابی شعری پراگے ’’جاچڑ‘‘ دا مُکھ وکھالی اِکٹھ
اِکٹھ دا پربند پنجابی تنظیم دل دریا پاکستان ولوں میونسپل لائبریر ی کنجاہ گجرات وچ کیتا گیا
رپورٹ: محمد اویس باسل
ملک گیر پنجابی و ثقافتی تنظیم دل دریا پاکستان دی چھتر چھاویں مہان شاعرہ پروین سجل لہور ہوراں دے پنجابی شعری پراگا جاچڑ دی مکھ وکھالی دا میونسپل لائبریری کنجاہ گجرات وچ پربند کیتا گیا۔
پروگرام دی پردھانی ڈاکٹر پروفیسر عصمت اللہ زاہد ہوراں کیتی۔حنفی دیداری ہوراں پروین سجل ہوراں دی تاج پوشی کیتی۔ پروین سجل ہوراں ولوں عصمت اللہ زاہد تے علی احمد گجراتی توں تحفے پیش کیتے گئے۔اُچیچے پروہنیاں وچ پیر عبدالخالق اوکاڑہ، زیڈ اے ذلفی وزیرآباد،حنفی دیداری گجرخان،مقصود یاور گجرانوالا تے ارشد مخلص پھالیہ ہوراں دے ناں شامل سن۔علی احمد گجراتی،عمران سہیل،راشدمنصور،شبیہہ مظہر رانجھا،زیڈ اے ذلفی،حنفی دیداری تے عصمت اللہ زاہد ہوراں کتاب تے گل بات کیتی۔علی احمد گجراتی ہوراں دا آکھنا سی کہ جاچڑ اک رمزاں بھریا شعری پراگا اے جس دیاں رمزاں دے گنجل کھولدیاں عقلاں دے پوٹے چھلے جاندے نیں۔
سوانیاں ولوں پنجابی شعری کھیتر وچ جاچڑ کتاب دا آنا اک بھلی گل اے۔اس دا بھرواں سواگت اے۔اس توں وکھ پروگرام وچ شعراء دی وڈی گنتی نے رلت کیتی۔ جنہاں وچ زیڈ اے ذلفی،مقصود یاور،عمران سہیل،عصمت اللہ سیکھو،مرزا سیف اللہ ساجد، انعام اللہ ناصر مان،عدنان قلزم رانجھا،جمیل ساحل،منیر چشتی کنجاہی،منیر صابری کنجاہی،بابا بشیر ملنگ،راشد منصور،عین عمر،عروس فاروقی، الفت عباس الفت،عمرحیات وسیم،شبیہہ مظہر رانجھا، عالم حسن،اسدعباس راز،عامر حسین عامر، احسان فیصل کنجاہی، شہزاد بزمی،نعیم الدین فاروقی، بنارس عاجز ہوراں دے ناں شامل سن۔عمران سہیل ہوراں آن والے پروہنیاں دا شکریہ ادا کیتا۔ شام دے کھانے تے گُڑ والی چاہ نال پروہنیاں دی سیوا کیتی گئی۔
پنجابی زبان ادب تے ثقافت لئی دل دریا پاکستان دا کردار سلاہن جوگ اے۔شعراء نوں اوہناں دیاں کتاباں چھپن تے ہلا شیری دینا نویں ادب دی تخلیق لئی راہ پدھری کردا اے۔
