My Speeches on Sufi Thoughts & Society”

خادم حسین سومرو هوراں دی كتاب دی تقریب رونمائی پلاك ولوں كیتی گئی

رپورٹ: آفاق بٹ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام معروف دانشور خادم حسین سومرو دی کتاب “My Speeches on Sufi Thoughts and Society” دی تقریب رونمائی منعقد ہوئی جس دی صدارت جسٹس (ر) سید افضل حیدر نے کیتی جد کہ اظہار خیال کرن والیاں وچ اسلم گورداسپوری، رانا محبوب اختر ، ڈاکٹر افتخار بخاری تے انور عزیز چانڈیو شامل سن ۔ سید افضل حیدر نے کہیا کہ اللہ تعالیٰ نے سارے انساناں نوں برابر بنایا جیہڑا اللہ تعالیٰ دی قربت چاہندا اے ایہنوں چاہیدا اے کہ انسانیت نال پیار کرے۔ ساڈے صوفیا دے چرچے پوری دنیا وچ ایس لئی نیں کہ اوہناں نے انسانیت نال پیار کیتا۔ خادم حسین سومرو نے کہیا کہ پنجاب دی سرزمین محبت کرن والیاں دی دھرتی اے۔ صوفی انسانیت نال محبت دا دوجا ناں اے۔ اسلم گورداسپوری نے کہیا اللہ تعالیٰ نے فرشتیاں توں انسان نوں سجدہ کرایا جیہڑا انسان ہو کے انسان دی قدر نہیں کردا اوہ اللہ تعالیٰ دا قرب حاصل نہیں کر سکدا۔ افتخاری بخاری نے کہیا کہ صوفی ازم اپنی انا نوں ختم کرن دا ناں اے۔ انور عزیز چانڈیو نے کہیا کہ پنجاب وچ مینوں جیہڑی محبت ملی خاص طور اُتے پلاک نے مینوں جیہڑی عزت بخشی میں ایہنوں فراموش نہیں کر سکدا۔ ڈائریکٹر جنرل پلاک ڈاکٹر صغرا صدف نے کہیا کہ صوفیاء دے پیار، محبت تے امن دے پیغام نوں عام کرن لئی پلاک اپنا کردار ادا کر رہیا اے۔ تقریب وچ نظامت دے فرائض خاقان حیدر غازی نے سرانجام دتے۔