چمٹہ ماسٹر پنجاب فوک دی شیرنی مینا صدف نال ملو

اوہناں دنیا بھر وچ ماں بولی دے جھنڈے گڈے نیں

سری دیوی نے اوہناں نوں ناروے وچ اپنے گانے تے پرفام کرن اتے انعام دِتاسی

رپورٹ: رضوان اصغر بٹ

فن کسے دی وراثت نہیں ایس لئی باقاعدہ جدو جہد کرنی پیندی اے۔ مینا صدف دی ساری زندگی اپنی مدد آپ دے تحت کامیابی نال عبارت اے اوہناں دی پیدائش راولپنڈی دی اے۔ والد اک تھیٹر دے آرگنائزر سن۔ اس تھیٹر وچ مینا نے چھ سال دی عمر وچ جمناسٹک توں اپنی شو بز زندگی داآغاز کیتا اس دے بعد اوہناں دے والد لا ہور آگئے تے ایور نیو اسٹو ڈیو دے سامنے سید پور وچ گھر لے لیا۔ اوہناں دے والد نے لاھور آکے فنکار دے ناں نال اک فلم شروع کیتی مگر کسے وجہ نال او فلم مکمل نہ ھو سکی مگر مینا نے اپنے والد نال صبح شام آنا شروع کر دِتا۔ اس نوں چھوٹے موٹے کردار وی ملنے شروع ھوگئے۔

او سر سُٹ کے اسٹوڈیو نگر وچ کوشش کر دی رہی۔ اس نے اپنے اخلاق تے پیار نال شوبز دے چوکھے لوکاں نال منہ پیار پا لیا۔ اس اوہناں دا کہنا اے کہ سید پور وچ اس ویلے فلم دے بہت سارے لوک رہندے سی جناں وچ نرگس خو شبو روپ فیملی حبیب جالب غلام عباس عارف لوھار فیملی عاشق جٹ فیملی رقاص حمید چوھدری فایٹ انسٹرکٹر مجی شاہ حاجی احسن(سلطان راہی دا سیکر ٹری فیملی )تے مصنف ھدایتکار موجودہ روزوار بھلیکھا دے شوبز ایڈیٹر اشفاق کاظمی توں علاوہ وی بہت لوگ جیڑے بعد وچ وڈے ناں بنےاوتھے رہندے سی ۔مینا دا کہنا اے کہ میری پہلی ملاقات شاہ جی نال اپنے والد دے نال ھوہی جیڑے وقفے وقفے نال میری رہنمائی کر دے رہے بلکہ میرے والد دے بعد وی اوہناں دا دست شفقت میرے سر تے رھیا۔ مینا دا کہنا اے کہ مینوں پہلا چانس ظفر شباب دی فلم وچ ملیا جس وچ میں سلطان راہی دی بھین بنی سی ، وسری فلم نزرالسلام دی پلکوں کی چھائوں تیسری جاوید فاضل کی دھنک سی ۔ایس دے بعد مینوں مزاحیہ کرداراں وچ کم ملنا شروع ہو گیا تے میں رنگیلا البیلا خالد سیلم موٹا نال کئی فلماں کیتیاں۔ بعد وچ میرے شوق نوں ویکھدیاں کوریو گرافر حمید چوھدری نے مینوں اپنی شاگردی وچ لے لیا ۔اوہناں دے حکم تے میں ایم اے رشید دی فلم قاتلوں کے قاتل دا اک گانا وی پکچرائز کروایا جیڑا سلمی آغا تے سی ۔اسے طرح اک دن کوریو گرافر اشرف شیرازی نے وی مصروفیت دی وجہ نال مینوں نیلی دا اک گانا پکچراز کروان لئی بھیج دِتا ۔

اے سمجھ لوو کہ میں ایمر جنسی کوریو گرافر بن گئی۔ ایس دوران کسے دے حوالے نال مینوں فائٹ انسٹرکٹر قیصر مستانہ کولوں فائٹ دے گر سیکھن دا موقعہ ملیا جس دا فائدہ مینوں شمیم آرا دی بابرہ شریف نال بنن والیاں فلماں مس ھانگ کانگ مس کولمبو وچ ھویا جس دیاں فائٹاں وچ میں بابرہ شریف دے ڈوپلی کیٹ کیتے اس دوران مینوں بطور گلوکار تے ڈانسر غیر ممالک دے شو وی ملنے شروع ھو گئے جناں وچ ریما شو سپر سٹار شو وغیرہ شامل سی۔ میں ایس دوران امریکہ کنیڈا آسٹریلیا لندن جرمن چائنہ تے دوجے کئی ملکاں وچ پرفام کیتا ایتھے اک دلچسپ گل دا ذکر بہت ضروری اے، ناروے وچ میں تے شوکی خاں شو کر رہے ساں اوہناں دناں وچ انڈین فنکارہ سری دیوی وی اپنے یونٹ نال آئی ھوئی سی۔ اک دن او ساڈا شو ویکھن آگئی تے اس فرمائش کیتی کہ میری حال وچ ریلیز ھون والی فلم نگینہ دا گانا میں ناگن توں سپیرا تے ڈانس وکھائو۔ میں اللہ دا ناں لے کے وچ جمنا سٹک مکس کر کے او گانا پیش کیتا تے اوہناں نے اسٹیج تے آکے مینوں ناروے دی کرنسی وچ انعام دِتا تے آکھیا کہ توں واقعی کلا کار ایں 1992 وچ مینوں تھیٹر دی ببر شیرنی بالی جَٹی نے چمٹے نال پرفام کر دیاں ویکھ کے اپنی شاگردی وچ لے لیا تے مینوں وصیت کیتی کہ توں ایس فن نوں ملک توں باہر کر کے میرا ناں اُچا کرنا اے ۔

اس دے بعد قذافی سٹیڈیم وچ پنجاب فوک تے اک بہت وڈا شو ھویا جس وچ ملک دے تقریباََ تمام فوک سنگر نے شرکت کیتی تے پنجاب بھر توں اے لوکاں حال وچ شیرنی شیرنی دے نعرے لائے ۔

اس طرح مینوں لاھور وچ شیرنی دے خطاب توں نوازیا گیا بعد وچ میں لندن شفٹ ھوگئی ایتھے میں تے میرا شوہر صفدر حیدر جیڑے کہ بیک وقت مصنف ھدایتکار تے ادا کار نیں۔ اسی دونویں خوشحال زندگی بسر کر رے آں اساں ایتھوں دے مشہور تھیٹر شرمین نال معاہدہ کیتا ھویا اے۔ اس توں علاوہ میں لندن وچ پاکستانی بچیاں نوں پنجاب کلچر دی وی تربیت دینی آں ۔ میں دنیا بھر وچ پنجابی زبان وچ پروگرام کیتے تے ماں بولی پاروں بہت سارے ایوارڈوی اپنے ناں کیتے یا تسی کہ سکدے او کہ اے ایوارڈ مینوں نہیں میری ماں بولی نوں میرے پنجاب فوک نوں میرے وطن نوں ملے نیں۔ جس مٹی وچ جنم لیا او مٹی لئی میری جان وی حاضر اے میرا سارے پنجابی بھین بھراواں نوں اے پیغام اے دنیا وچ اپنی ماں بولی دا پرچار کر کے وطن دی شان اُچی کرو۔