قصہ مستقبل دے سمندر دا

اکبر وڑائچ

پاکستان وچ کروڑاں لوک روزانہ محنت مزدوری کرکے دو ویلے دی روٹی کماندے نیں تے آن والا کل ڈگمگاندی آس تے چھڈ دیندے نیں۔ رات گئے تک ریڑھیاں تے سبزی‘ گنڈیریاں‘ مونگ پھلی‘ پرانے کپڑے تے پرانیاں جتیاں ویچدے پھردے نیں۔ جے دوجے دن ہڑتال ہو جاوے‘ دھرنا دین والے روڈ بند کر دین تے اجہے حالات وچ کروڑاں لوک دوجا دن فاقیاں وچ گزاردے نیں۔ خفیہ طریقیاں نال لٹ مار کرن والی مافیا دے لوک مر مر کے جین والیاں نوں وی نہیں بخشدے۔ ایہناں مسکیناں توں تن طرح دا بھتہ وصول کردے نیں۔ روزانہ بھتہ‘ ہفتہ وار بھتہ‘ مہینہ وار بھتہ۔ ایہناں لاوارثاں توں روزانہ‘ ہفتہ وار تے مہینہ وار کروڑاں روپے وٹے جاندے نیں تے وصولی دے بعد مافیا دے خفیہ کرتا دھرتا تک کافی رقم اپڑائی جاندی اے۔ پہلے دن توں‘ 1947ء توں ایہ گھنائونا جرم کیتا جا رہیا اے۔ حکمران آئوندے نیں‘ ٹر جاندے نیں پر ملک دے کروڑاں مسکین لوکاں نوں طاقتور بھتہ مافیا توں نجات نہیں دوا سکدے۔ تسیں کجھ کرو سرکار۔ خفیہ اداریاں دی مدد نال تسیں بھتہ مافیا دے خفیہ سرداراں تک اپڑ سکدے او۔ تبدیلی لے آئو سرکار۔ تسیں پاکستان نوں ریاست مدینہ دیاں گلاں کردے رہندے او۔ تسیں بھتہ مافیا دا خاتمہ کرکے روزی روٹی لئی گلی کوچیاں وچ دھکے کھان والے کروڑاں لوکاں نوں بھتہ خوراں دے عذاب توں نجات دوائو۔ یقین منو اک جست وچ تسیں ریاست مدینہ دی دہلیز تک اپڑ جائو گے۔ ایس توں وڈی تبدیلی لے آن دا تسیں تصور نہیں کر سکدے۔
تہانوں سیاستداناں نوں اقتدار وچ آئون‘ اقتدار نال چمڑے رہن توں اڈ کجھ نہیں سُجھدا۔ ملک خوفناک مافیا دے ہتھ چڑھ چکیا اے۔ صرف کرپٹ لوک کالادھن باہر نہیں گھلدے۔ محنت تے ایمانداری نال کمان والے وی اپنی جمع پونجی باہر گھل رہے نیں۔ ایہناں نوں ڈر اے کہ مافیا دے چنگل وچ پھسے ہوئے معاشرے وچ کجھ وی ہو سکدا اے۔
لوک فقیر توں پچھدے نیں کہ سرکار نے اپنے دور حکومت دے دو ڈھائی ورھے کیویں ضائع کر دتے؟ تبدیلی دی گل وی کدھرے دور دور تک وکھائی نہیں دیندی ایہ سب کجھ کیویں ہویا؟
ہن تسیں فقیر دا جواب سن لوو۔ ذرا دھیان نال سنیا جے۔ تسیں جدوں وی کسے اجہے کم وچ الجھ جاندے او جو کم تہاڈے وَس دا نہیں ہوندا اودوں تسیں کسے کم دے نہیں رہندے۔ تسیں وقت دے نال نال بہت کجھ ضائع کر دیندے او۔ جے تسیں جانوراں دے ڈاکٹر او تے فیر تسیں اپنے آپ نوں جانوراں دے علاج تک محدود رکھو۔ انساناں دا علاج کرنا تہاڈے وَس دی گل نہیں۔ جے تسیں انساناں دے امراض دا علاج کرن والے ڈاکٹر او تے فیر تسیں انساناں دے علاج تک اپنے آپ نوں محدود رکھو۔ انجینئر بنن دی غلطی بالکل وی نہ کرو۔ بند مشیناں چلانا تہاڈا کم نہیں۔ تسیں زندگی بھر کرکٹ کھیڈدے رہے او ایس عمر وچ تسیں باکسر نہیں بن سکدے۔ باکسنگ تہاڈے وَس دا کھیڈ نہیں۔ جے تسیں باکسر بنن دی غلطی کیتی تے فیر تسیں ناک آئوٹ ہو جائو گے۔ چارے شانے چت ہو جائو گے۔ تسیں اپنی مدت دے ابتدائی دو ڈھائی ورھیاں وچ اوہ کم کردے رہے او جو کم تہاڈے وَس دا نہیں سی۔ اوہ کم تہاڈے کرن دا ہے ای نہیں سی۔ چور‘ ڈاکو پھڑنا تہاڈا کم نہیں ایس کم لئی پولیس‘ سی آئی اے‘ ایف آئی اے‘ خفیہ ادارے نیں۔ تسیں ایہناں اداریاں دے سربراہ نہیں۔ تسیں سرکار ملک دے سربراہ او۔ دن وچ دس ہزار واری چیک چیک کے کہنا کہ میں کسے نوں نہیں چھڈاں گا۔ تہاڈے چاہن والیاں نوں چنگا نہیں لگدا۔ ویہہ تریہہ ورھے تسیں بے تکی سیاست دی نذر کر دتے پر اج وی لوک تہانوں سیاستدان دی تھاں کرکٹ کھڈاری دے طور تے اپنا ہیرو من دے ینں۔ جنرل حمید گل نے تہانوں سیاست دی ڈگر تے پا کے ملک نوں اک اعلیٰ سوشل رفارمر توں محروم کر دتا۔ فقیر نوں حیرت اے کہ ایہ ساریاں گلاں نت کھٹ ایڈوائزراں نے تہانوں کیوں نہیں دسیاں؟۔
میں تہاڈا نٹ کھٹ ایڈوائزر نہیں۔ میں تہاڈے توں تنخواہ نہیں لیندا۔ ایس لئی مفت وچ صلاح دینا واں۔ میرا مشورہ اے سرکار کہ تسیں‘ اپنے آپ نوں ملک دا سربراہ سمجھو تے کسے نوں نہیں چھڈاں گا والے سینڈ روم چوں نکل آئو۔ فقیر نوں ڈر اے کہ کسے دن تسیں سرکار سپریم کورٹ جا کے چیف جسٹس دی کرسی تے نہ بہہ جائو تے لوکاں نوں سزاواں سنانا شروع کر دیو تے میز تے ہیمر مار مار کے کہندے رہوو کسے نوں نہیں چھڈاں گا۔ کسے نوں نہیں چھڈاں گا۔ میں تہانوں سرکار مفت مشورہ دینا واں کہ تسیں اپنے سوشل رفارمر تے ملک وچ تبدیلی لے آن دے دعوے ول پرت آئو۔ تسیں اپنے دور حکومت دے باقی رہندے ورھیاں وچ ملک وچ یادگار تبدیلیاں لیا سکدے او۔ فہرست لمی اے‘ میں صرف گنتی دے کجھ ناسوراں ول تہاڈا دھیان کروانا چاہنا واں۔ ایہناں بظاہر ناقابل علاج ناسوراں نے ملک نوں کمزور تے مستقل مریض بنا دتا اے۔