کیہ وزیراعظم داخلی تے خارجی محاذ تے کامیاب ہون گے؟
مطلوب وڑائچ
اج توں 24 ورھے پہلاں عمران خان نے جدوجہد دا آغاز کیتا تے 22 ورھے ڈاڈھی سخت جدوجہد کرن دے بعد وزارت عظمیٰ دی شیروانی تے پا لئی پر ایس ساری تیاری وچ عمران خان نے صرف خیبرپختونخوا دے ساتھیاں تے ای اکتفا کیتا۔ پنجاب جہدے سورمیاں نے سکندراعظم تے افغان طالع آزماواں نوں دھوڑ چٹا دتی اوس پنجاب نوں اک درویش دے حوالے کر دتا گیا۔
جتھوں تک پنجاب وچ پچھلے پنجاہ ورھیاں وچ ہون والیاں معاشرتی تبدیلیاں دا تذکرہ اے کہ ضیاء الحق دے ساڑھے یاراں سالہ جبری دور وچ پنجاب نوں ذات تے برادری تے قومیت ول دھکیا گیا اے پنجاب دے اکثر وسنیک خاص کر غیرزمین دار چھوٹی قومیتاں ضیاء الحق دور دے بعد اپنے آپ نوں عرب خانداناں تے برگزیدہ ہستیاں ہن پنجاب وچ پنجابیت نوں جگان لئی پنجاب نیشنل پارٹی جو پاکستان نوں اپنا محور من دے ہوئے میدان عمل وچ آئی اے فروری دے آخری ہفتے وچ پنجابی زبان دی ترویج لئی لہور تے ملک بھر وچ ریلیاں کڈھیاں گئیاں تے ہن 14 مارچ نوں لہور سنے پنجاب بھر وچ پنجابی کلچر ڈے منان دا پروگرام تشکیل پایا اے تے جدوں تک پنجاب دے حقوق نوں ہائی لائٹ نہیں کیتا جاوے گا اودوں تک پنجابیاں نوں اوہناں دے حقوق نہیں ملن گے۔ پنجاب دی سیاست توں پیپلزپارٹی دے آئوٹ ہو جان دی وجہ نال اک وڈا سیاسی خلاء موجود اے جے پنجاب نیشنل پارٹی دے ورکراں نے جدوجہد تے محنت کیتی تے اوہ پیپلزپارٹی تے پی ٹی آئی دیاں خامیاں نوں کور کردے ہوئے پنجاب وچ اپنا مقام بنا سکدے نیں۔
دوستو! ڈسکہ وچ الیکشن کمیشن نے پورے حلقے وچ دوبارا پولنگ کران دا فیصلہ دتا اے۔ مینوں نہیں لگدا کہ نتیجے وچ کوئی وڈا بریک تھرو ہووے گا۔ معاملہ اجے سپریم کورٹ جانا اے فیر دیکھو اوتھوں کیہ فیصلہ آئوندا اے۔ الیکشن والے دن مسلم لیگ (ن) تے پی ٹی آئی دوہاں دا مطالبہ ایہناں حلقیاں وچ دوبارہ الیکشن کران دا سی جہڑے پولنگ اسٹیشناں توں پریذائیڈنگ افسر لاپتہ ہو گئے سن فیر مسلم لیگ (ن) ولوں پورے حلقے وچ انتخاب دا مطالبہ سامنے آیا جنہوں الیکشن کمیشن نے من لیا۔ فریقین ولوں دتے گئے فارم 45 الیکشن کمیشن دے جاری کردہ فارم 45 نال میچ ہوندے نیں تے سپریم کورٹ نتیجہ جاری کرن دا حکم دے سکدی اے۔ دوجی صورت وچ ایہناں پولنگ سٹیشناں تے ری پولنگ دا حکم دے سکدی اے۔ پولنگ پورے حلقے وچ ہووے یاں کجھ پولنگ سٹیشناں تے‘ ایس عمل وچ خرچے تے ہون گے اوہ اوہناں لوکاں توں وصول کیتے جان تے بہتر اے جہناں دی وجہ نال ایہ عمل ممکنہ طور تے دہرایا جاندا اے۔
عمران خان کرکٹ وچ نیوٹرل ایمپائرنگ دا کریڈٹ لیندے نیں۔ عمران خان سینٹ وچ وی ایسے طرح اوپن بیلٹ لیانا چاہندے سن پر آئین وچ تبدیلی دے بناں ایہ منزل حاصل نہیں ہو سکدی۔ پی ٹی آئی حکومت آئین وچ ترمیم کرن دی پوزیشن وچ نہیں تے اپوزیشن نے ایہنوں حکومت دی بدنیتی قرار دے کے تعاون توں انکار کر دتا۔ نیوٹرل ایمپائرنگ دی گل کیتی جاوے تے ایہدی لوڑ 1986ء وچ اوس ویلے شدت نال محسوس کیتی گئی جدوں عمران خان دی قیادت وچ ٹیم سری لنکا ئی جتھے ایمپائراں دی مدد نال سری لنکا دی نویں ٹیم نے پاکستان توں اک ٹیسٹ میچ جت کے سیریز برابر کر دتی سی۔ ایہدے بعد عمران خان نے نیوٹرل ایمپائرنگ تے زور دتا تے پاکستان وچ ایہنوں متعارف کرایا تے نیوٹرل ایمپائرنگ پاروں پاکستان نے بھارت توں بھارت وچ جا کے سیریز جت لئی۔
عمران خان نے کجھ دیہاڑ پہلاں سری لنکا دا دورا کیتا۔ عمران خان نوں سری لنکا وچ کرکٹ لیجنڈ دے طورتے پذیرائی ملدی اے۔ اج پاکستان تے سری لنکا بھارت دیاں شرارتاں پاروں کافی نیڑے آ چکے نیں۔ ایہ سری لنکا دی ٹیم ای سی جہدے تے لہور وچ بھارت نے حملہ کروایا تے پاکستان وچ کھیڈ دے میدان سُنجے کرن دی سازش کیتی تے ایہ فیر اوہو سری لنکا اے جنہے پاکستان دا سب توں پہلے دورا کرکے پاکستان وچ کھیڈاں دے میدان آباد کرن وچ اپنا بہترین کردار ادا کیتا۔ پاکستان نے سری لنکا نوں تامل باغیاں دی شدت پسندی تے دہشت گردی توں نجات دوائی۔ سری لنکا ایس حوالے نال جتھے پاکستان دا ممنون اے اوتھے ڈینگی وباء دے پھٹن تے سری لنکا نے پاکستان دی مدد کیتی سی جہدے تے پاکستان سری لنکا دا احسان مند اے۔٭
