عوام چارا‘ نظام نکارہ ‘غریب وچارا،اہل فکر پارا پارا
لكهت: سعد الله شاه
آج بھی میرا نہیں اور میراکل بھی نہیں
سچ تو یہ ہے کہ مرے ہاتھ میں اک پل بھی نہیں
وہ کہ تسلیم تو کرتا ہے محبت میری
میں ادھورا بھی نہیں اور مکمل بھی نہیں
کیہ کہہ دتا وزیراعظم نے الیکشن کمیشن نے جمہوریت نوں نقصان اپڑایا۔ لبھن والی گل تے ایہہ وے کہ کنہے فائدہ اپڑایا یاں کنہے نقصان نہیں اپڑایا۔ بندیاں نوں گنیا جاندا اے تولیا نہیں جاندا۔ ہن تے گنن توں وی گئے تے فیر لودے نیں تے پیسیاں دے نال‘ یعنی ہن تے حسب نسب وی دولت۔ اقتدار دے حصول لئی کسے وی سطح تے جایا جا سکدا اے تسیں نظریاتی تے ایماندار لوکاںدی ٹیم دے نال میچ نہیں کھیڈ سکدے کہ ایہ کھیڈ ای اجیہا اے الیکشن کمیشن لوکاں نوں ایماندار تے دیانتدار نہیں بنا سکدا۔ ایہہ گلاں تے پہلاں سوچن والیاں سن۔ ایماندار لوک اسمبلی وچ آئوندے ای نہیں کہ اوہ عام الیکشن لڑن دی سکت ای نہیں رکھدے انج وی ایہہ کم عزت داراں دا نہیں رہیا۔ اوتھے وی تے لوک قیمے والا نان یاں بریانی کھا کے ووٹ دیندے نیں تے امیدوار تے قربانی دا گوشت وی ایسے مقصد لئی استعمال کردے نیں۔ اوہو گل کہ اُتے محنت ہون والی اے ایہ محنت پر کون کرے کہ اسیں تے غریباں تے مزدوراں دی محنت وی کھا جانے آں۔ جون ایلیا یاد آئے۔
حرف کن سے بنا جہاں خراب
یہی ممکن تھا اتنی عجلت میں
کسے نے قوم تے محنت ای نہیں کیتی قائداعظم دے بعد کجھ چنگیاں جھلکیاں ضرور ملیاں پر فیر ڈھلوان توں اسیں تلکدے گئے۔ جمہوریت نوں کسے نے اگے ودھن نہیں دتا کدی جمہوریت جورو بنی تے کدی موقع ملن تے اوہنے آمریت دی شکل اختیار کر لئی۔ سب توں اہم گل کہ ادارے ملک دا نظام چلاندے نیں تے بندے نوں تحفظ دیندے نیں۔ پر کیہ کیتا جاوے کہ خاندانی تے موروثی سیاستداناں نے صرف اپنی آل اولاد تے برادری نوں ای قوم تے مسلط نہیں کیتا سگوں اپنے حاشیہ برداراں تے خوشامدیاں دے ادارے حوالے کر دتے۔ جو طاقتور سن اوہناں دی نظر اپنے حصے تے رہی کہ اوہدی ترسیل نہیں رکنی چاہیدی کناں المناک سفر اے ساڈا۔
چلو چھڈو میں کجھ زیادہ ای سنجیدہ ہو گیا تے ایہ رویہ اجے احمقانہ اے ایتھے کسے نوں کسے دا درد نہیں۔ بنیادی گل اینی کو اے کہ سیاستدان اصل وچ گھوڑے نیں تے عوام اوہناں دا چارا‘ نظام نکارہ غریب وچاراتے اہل فکر پارا پارا یعنی ایناں کو کھیڈ اے۔ سارا اصول قنون تے اخلاقیات صرف اوہنوں یاد رہندیاں نیں جو حکومت وچ ہووے یاں حکومت جا رہی ہووے نہیں تے پی ڈی ایم وچ سب دے سب دانشوران شہر نیں۔ ایہ تے ممکن نہیں کہ جناب چاہن یوٹرن لیندے جان تے اوہنوں حکمت تے دانائی نال جوڑدے جان تے اپنے منن والیاں توں صراط مستقیم تے چلن دی امید رکھن۔ دوجی گل ایہہ وے کہ بے پیندے لوٹے تے ساریاں دے استعمال دیاں چیزاں نیں۔ ایہ گھمن دے عادی ہو چکے نیں تہانوں سوچنا چاہیدا سی کہ ایہناں دی گھٹی وچ کیہ اے۔ یعنی ایہناں نوں جہناں نوں الیکٹ ایبلز کہندے نیں گڑھتی کنہے دتی ہوئی اے ایہ پرندے نیں‘ کدی ایس چھتری تے تے کدی اوس چھتری تے فیر کجھ چھاتہ دار نیں جو اوہناں توں وی اُتے دا کھیڈ اے۔ اوہ جو الیکشن توں وی دور نیں۔ جو طوق دی صورت کدھروں حکمراناں دے گلے وچ پا دتے جاندے نیں کنی مضحکہ خیز تے شرمناک ایہ منظر سی کہ اک بیمار بندا بریف کیس پھڑ کے وائسرائے دے طور تے آیا وزارت عظمیٰ دا لطف اٹھایا تے فیر اپنا بریف کیس چک کے حکم حاکم تے واپس پرت گیا۔ باقی ڈرے ہوئے تے سہمے ہوئے کہ چور نیں۔
انج ایہ بڑی دلچسپ گل اے کہ پہلے عمران خان نے کہیا اے کہ اوہ چوہے وانگوں حکومت نہیں کرن گے تے ہن ایہدے وچ آپ فواد چوہدری نے وی سنگت کیتی تے ایہو اشارا دتا۔ میں سوچدا رہیا کہ کیہ اتفاق اے کہ شیر تے چوہے دی کہانی ساڈی ثقافت و ادب دا حصہ اے۔ ظاہر اے شیر دے مقابلے وچ شیر ای ہونا چاہیدا اے کہ شیر مردانہ وار مقابلہ کردا اے جدوں اوہنوں لگڑ بگڑ پے جاندے نیں تے اوہ نسدا نہیں سگوں لڑدے لڑدے مر جاندا اے۔ چوہا تے لڑائی وچ کدھرے ہے ای نہیں۔ چوہے تے شیر دا ممنون احسان سی تے اوہنے بھیڑے ویلے تے شیر تے پیا جال کٹ دتا۔ ایہ لہجہ بڑا غور طلب اے تے سوال اٹھاندا اے کہ ایس بیان دا کیہ مطلب اے کہ اوہ چوہے وانگوں حکومت نہیں کرن گے۔ تسیں ایہ کنہوں کہہ رہے او؟ صباحمید نے بڑی خوبصورت گل کیتی کہ پاکستانی ڈرامہ تباہ نہیں ہویا تبدیلی آئی اے۔ ویکھیا جاوے تے بس ایہو کجھ اے تہانوں تھوڑا جیہا جھٹکا دے دتا گیا اے۔ اوہ ستمگر مرے مرن تے وی راضی نہ ہویا۔ اپوزیشن سر چڑھ کے بول رہی اے کہ عدم اعتماد کدوں تے کتھے ہووے گا۔ اسیں دساں گے اجے تے اوہ جشن منان وچ مصروف آں انج اوہناں دی نذر اک شعر ضرور کراں گا:
ایسے لگتا ہے کہ کمزور بہت ہے تو بھی
جیت کر جشن منانے کی ضرورت کیا تھی
سنجیدہ لوک تے ایس سارے گندے منظرنامے توں لاتعلق تے اداس نظر آئوندے نیں کہ بنے گا کیہ پر کجھ لوک محظوظ وی ہو رہے نیں۔ اپنے نظریاتی تے محبت کرن والیاں توں منہ موڑن دا نتیجہ۔ ناز مظفرآبادی کہندے نیں اوہنے یوٹرن لے لیا نہیں تے دو قدم تے غریب خانہ سی ہن الیکشن کمیشن نوں برا کہن نال کیہ ملے گا۔ دوجی گل ایہہ کہ الیکشن کمیشن نے کہڑا کوئی نواں کم کیتا۔ درخشندہ روایت دے مطابق الیکشن کروا دتا۔ ایہ ٹھیک اے کہ سارے ایکسپوز ہو گئے تے سب وچوں حکومت باہر نہیں کیہ اسیں انھے تے نہیں کہ حکومت وقت وچ وی اوہ سارے کم ہوئے جو پچھلیاں حکومتاں نے کیتے۔ حکومت لوکاں نوں خوش کرن وچ نکام رہی لوک ڈاڈھے رِنج نیں۔ حکومتی پالیسیاں نے لوکاں نوں ایناں مدھیا کہ اک واری فیر ڈاکوئواں تے چوراں نوں نجات دہندہ سمجھن لگ پئے نیں۔ اُتے دا رویہ تھلے آ گیا اے صبح دے درس وچ ساڈے دوست سعید ملک نے سارے لوکاں نوں اعلیٰ نسل دی مٹھائی کھوائی تے ایہ گل پھیلا دتی کہ ساڈے اک دوست خان صاحب نے جہڑے پی ٹی آئی دے نیں نے یوسف رضا گیلانی دی جت دی خوشی وچ کھوائی اے۔٭٭
