“پنجاب وچ پولیس افسران دیاں ترقیاں نال کھلواڑ”
ساڈی قوم دا ایہہ المیہ رہیا اے کہ اسیں سب توں زیادہ تنقید دا نشانہ وی پولیس نوں بنانے آں
تحریر ،اکرم عامر سرگودھا
آندھی ہوئے یا طوفان، گرمی ہو یا سردی موسم کنج دا وی ہوئے، پولیس فورس دے جوان آپ دی خدمت لئی ہر چوک چوراہے ، گلی محلے، شاہراہ اُتے کوشاں تے متحرک نظر آندے نیں تے ایہناں نوں انج کرنا وی چاہیدا اے، کیوں جے ایہہ ایہناں دے فرائض وچ وی شامل اے تے پنجاب پولیس دا نعرہ وی ایہو اے کہ
’’پولیس کا ہے فرض مدد آپکی‘‘
پولیس دا کم کجھ عرصہ پہلاں تیکر صرف جرائم دا خاتمہ تے جرائم پیشہ عناصر نال آہنی ہتھاں نال نمبڑنا ہوندا سی فیر ملک دے حالات ایس قدر گھمبیر ہوئے کہ ہن سارے مکاتب فکر دی عبادت گاہواں، مسجد ہوئے یا امام بارگاہ، گرجا گھر، مندر ہوئے یا گردوارہ وچ عبادت کرن والیاں توں لے کے بالاں نوں پولیو دے قطرے پلان تیکر دے عمل دی سکیورٹی لئی پولیس دے کانسٹیبل توں لے کے افسراں تیکر ڈیوٹیاں دیندے نظر آندے نیں تے آئے روز فرائض دی بجا آوری دے دوران پولیس دے کانسٹیبل توں لے کے افسران تیکر دی شہادتاں دے واقعے وی رپورٹ ہوندے نیں۔جیہڑے ایس گل دی واضح دلیل اے کہ ملک وچ قانون نافذ کرن والے دیگر اداریاں وانگوں پولیس وی اپنے فرائض توں کسے طرح غافل نہیں تے ملک وچ امن و امان قائم رکھن وچ پولیس فورس دا اہم کردار ادا کر رہی اے۔ ایہہ گل درست اے کہ ایس محکمے وچ وی آٹے وچ لون دے برابر انج دے لوک موجود ہون گے جیہڑے اپنے فرائض وچ غفلت دے مرتکب یا حرص زر وچ مبتلا ہون گے، انج دے لوک ہر سرکاری و غیر سرکاری ادارے وچ موجود ہوندے نیں، ایہناں وچ انج دے اہلکار وی نیں جیہڑے اپنے افسراں دے احکامات نوں وی کجھ نہیں سمجھدے جس دی اک نکی جہی مثال کجھ انج دے رہیا واں کہ ایہناں وچ لہور ٹرانسپورٹ کمپنی وچ 10 سال توں ڈیپوٹیشن اُتے گئے ہوئے پنجاب پولیس دے انسپکٹر وحید الرحمان نیں جنہاں دا اعلیٰ حکام نے کئی وار تبادلہ کیتا پر اوہ افسران توں زیادہ طاقتور ثابت ہوئے تے ہر وار اپنا تبادلہ منسوخ کروالیا، موصوف دے اثاثیاں اُتے نظر پائی جائے تے اوہ ایس دی تنخواہ توں کئی سو گنا زیادہ نیں، ایسے طرح دی سینکڑاں مثالاں پنجاب پولیس تے دیگر محکمیاں وچ موجود نیں، سو راقم نوں ایس نال کوئی غرض نہیں ایہناں دی چھا ن بین کرنا تے نیب تے اداریاں دا کم اے۔
ساڈی قوم دا ایہہ المیہ رہیا اے کہ اسیں سب توں زیادہ تنقید دا نشانہ وی پولیس نوں بنانے آں، حالانکہ اعداد و شمار دے مطابق کرپشن وچ پہلے نمبر اُتے محکمہ ریونیو دوجے اُتے محکمہ انہار، تیجے اُتے زراعت، چوتھے اُتے لائیو سٹاک تے فیر پنجویں اُتے پولیس دا نمبر آندا اے، پر ستم ظریفی ایہہ وے کہ جتھے عوام دی اکثریت ایس محکمے اُتے بے جا تنقید کر کے ایہناں نال زیادتی دی مرتکب ہوندی اے اوتھے حکومت خاص طور تے پولیس دے بنائے گئے آرڈیننس وی پولیس افسران تے اہلکاراں دی حق تلفی دا باعث بن رہے نیں جس دا مختصر خلاصہ کجھ انج بیان کراں گا کہ پولیس سروس رولز 2008ء دے مطابق سپرنٹنڈنٹ آف پولیس (ایس پیز) دی پروموشن لئی 60 فیصد صوبائی سروس دے ڈی ایس پیز دا کوٹہ سی تے 40 فیصد اے ایس پیز دا، ایسے تناسب نال ایہناں دی ترقیاں ہوندیاں سن۔ ہن پولیس ڈیپارٹمنٹ حکومت پنجاب نے جنوری 2021 وچ نوٹیفکیشن دے ذریعے پولیس سروسز رولز 2008 نوں ختم کر کے نویں پولیس سروسز رولز 2020 بنائے نیں جس دے سیکشن 6 دے سب سیکشن 2 وچ کہیا گیا اے کہ ہن سپرنٹنڈنٹ آف پولیس (ایس پیز) دی پروموشن لئی 40 فیصد صوبائی سروس دے ڈی ایس پیز دا کوٹہ ہوئے گا تے 60 فیصد کوٹہ اے ایس پیز دا ہوئے گا جیہڑا ڈائریکٹ اے ایس پی بھرتی ہوندے نیں، یعنی صوبائی سروس دے ملازمین دا 20 فیصد کوٹہ گھٹ کر دتا گیا اے، صوبے وچ امن و امان ، شہریاں دے جان و مال دے تحفظ توں لے کے وی وی آئی پیز دی سکیورٹی تیکر سب کم صوبائی سروس دے ملازمین و افسران دی سروس وچ شامل اے، تے توجہ طلب امر ایہہ وے کہ 60 فیصد دے کوٹہ دے حساب نال ڈی ایس پی بطور ایس پی پروموٹ ہوندے نیں تے ایس توں تھلے سپاہی کیڈر تیکر نوں فائدہ ہوندا اے تے اوہ اپنی سنیارٹی دے مطابق میرٹ اُتے StepNext اُتے اپڑ جاندے نیں، ایسے طرح ایہناں دی دلجوئی ہوندی اے تے پولیس اہلکار دل لا کے اپنے فرائض منصبی انجام دیندے نیں، مزید برآں پولیس آرڈر 2002، ترمیم شدہ 2013 دی دفعہ 165 وچ پولیس دی ترقیاں لئی بورڈ / کمپنیاں دا ذکر موجود اے۔ پر ایس وچ وی ایس پی توں اُتے ترقی دا کوئی ذکر نہیں، ایس طرح عمومی طور اُتے صوبائی پولیس دا افسر ایس پی توں اُتے ترقی نہیں کر سکدا جد کہ پنجاب دے دیگر ہر محکمہ جات ماسوائے پولیس دے وچ گریڈ 21 تیکر ترقی دا طریقہ کار موجود اے، ایسے طرح پولیس ڈیپارتمنٹ دے ایہناں فیصلیاں نال صوبائی سروس دے پولیس کانسٹیبل توں لے کے ایس پی تیکر دے افسران دی حلق تلفی ہوئی اے تے پنجاب وچ سپاہی توں لے کے ایس پی تیکر سب بے دلی تے بے چینی دا شکار ہو کے رہ گئے نیں۔ ایسے طرح 2020 وچ نویں بنن والے قانون دے مطابق ایہناں دا مستقبل تاریک ہوندا نظر آ رہیا اے، ستم ظریفی ہور ایہہ کنہی مضحکہ خیز گل اے کہ ڈیوٹیاں تے صوبائی سروس دے پولیس اہلکار دین، جاناں دے نذرانے پیش کرن تے ایہناں دے حصے دی پروموشن ڈائریکٹر بھرتی ہون والے اے ایس پیز نوں دے دتی گئی۔ ایس توں وڈا ظلم، نا انصافی تے عدم مساوات دی مثال ملک وچ نہیں ملدی، ایہہ معاملہ پنجاب اسمبلی وچ وی چکیا گیا پر ہجے تیکر پورے پنجاب دے پنجاب سروس دے کانسٹیبل توں ایس پی تیکر دی حق رسی لئی کوئی عمل اقدام نہیں چکیا جا سکیا۔جس دی وجہ نال پنجاب سروس دے کانسٹیبل توں لے کے ایس پی تیکر دے ملازمین گومگو دی کیفیت دا شکار نیں۔
کپتان جی تسیں تے میرٹ، ملک توں کرپشن تے اقربا پروری دے نظام دے خاتمے دا نعرہ لا کے اقتدار وچ آئے سی، پنجاب پولیس دے ڈیپوٹیشن اُتے لہور ٹرانسپورٹ کمپنی وچ گئے ہوئے انسپکٹر وحید الرحمان دے معاملے نوں بلاشک پس پشت پا دیو تے ہور 10 سال رہن دیو، موصوف نوں ڈیپورٹیشن اُتے، تاں جے اوہ اپنی تے قوم دی خدمت کردے رہن پر کپتان جی تسیں پورے ملک دے وزیراعظم او، پنجاب وی آپ دی سلطنت وچ شامل اے تے ایس صوبے وچ وزیراعلیٰ عثمان بزدار وی آپ دی پارٹی نال تعلق رکھدے نیں، کپتان جی لوڑ ایس امر دی اے کہ تسیں ایہناں (وزیراعلیٰ پنجاب) نوں حکم صادر فرمائو کہ پولیس افسران دی ترقیاں دے حوالے نال جاری کردہ آرڈیننس 2020 اُتے نظر ثانی کر کے سابقہ حیثیت بحال کرو، تاں جے پنجاب وچ صوبائی سروس دے پولیس اہلکاراں توں ایس پی سطح دے افسران وچ پائی جان والی اضطرابی کیفیت ختم ہوئے تے اوہ دبائو توں نکل کے دلجمعی نال جرائم پیشہ عناصر نال نمٹ کے اپنے فرائض منصبی احسن طریقے نال ادا کر سکن۔
