پنجابی ثقافت لئی بھرواں کم کیتا جائے گا، پلاک تے ڈی جی پی آر دا اعلان

رپورٹ: آفاق بٹ

پنجاب انسٹیٹیوٹ آف لینگوئج، آرٹ اینڈ کلچرتے ڈی جی پی آر پنجاب وچ اک مفاہمتی یاداشت اُتے دستخط کیتے گئے۔ ڈائریکٹر جنرل پلاک ڈاکٹر صغرا صدف تے ڈی جی پی آر پنجاب ثمن رائے نے یادداشت اُتے دستخط کیتے۔ ایس موقعے اُتے ڈاکٹر صغرا صدف نے کہیا کہ مفاہمتی یادداشت دا مقصد زبان، فن تے ثقافت دا فروغ اے۔ پلاک دے زیر انتظام ایف ایم 95 پنجابی زبان دے فروغ دا بہترین ذریعہ اے۔

ڈی جی پی آر پنجاب ثمن رائے نے کہیا کہ ایف ایم 95 پنجاب رنگ عوام وچ مقبول ریڈیو اسٹیشن اے جیہڑا حکومتی فلاح و بہبود دے منصوبیاں دی عوام تیکر رسائی وچ اہم کردار ادا کر رہیا اے۔ایس مفاہمتی یادداشت دے تحت دونویں ادارے پنجاب دی زبان، فن تے ثقافت دے فروغ دے نال نال حکومتی فلاحی اقدامات متعلق معلومات وی ریڈیو پروگراماں دے ذریعے عوام تیکر اپڑان دا ذریعہ بنن گے۔