ڈیرے داری دی سیاست

وقاص بشیر

لہور دے لوک عشریاں توں ریاست دی تھاں سیاسی بندیاں دی سرپرستی وچ جیندے رہے نیں۔ کسے دے نال دھوکھا ہو جاوے تے اوہ وڈے دھوکھے باز دی مدد منگدا اے۔ کسے دا مکان ہڑپ کر لیا جاوے تے اوہ وڈے قبضہ گروپ توں مدد لیندا اے۔ کسے نوں بدمعاش پریشان کرن تے اوہ اوہدے توں وی وڈے بدمعاش دے پیر پھڑ کے مدد منگدا اے۔ ایہ اوہ نظام اے جہدے وچ ریاست دی کوئی حیثیت نہیں۔ ریاست دے ہتھ پولیس‘ پٹوار تے بلدیہ نیں اوتھے جائو تہانوں ایناں مایوس کیتا جاوے گا کہ گھم پھر کے اوسے نمائندے دے کول مسئلہ لے کے آ جائو گے جہدا ڈیرہ تہاڈے ورگے پریشان حال لوکاں نال بھریا رہندا اے جو اپنے حکم توں مُکرن والے پولیس اہلکاراں نوں جھڑکاں‘ گالھاں دے کے تہاڈا کم کروا لیندا اے۔ ایف آئی اے نے لہور دے کھوکھر برادران نوں نوٹس گھلے نیں۔ رکن قومی اسمبلی افضل کھوکھر‘ اوہناں دے بھرا رکن صوبائی اسمبلی سیف الملوک کھوکھر تے ملک شفیع کھوکھر تے الزام اے کہ اوہناں نے منی لانڈرنگ دا ارتکاب کیتا۔ سرکاری تے غیرسرکاری زمیناں تے قبضے کیتے۔ تناں بھراواں نوں کہیا گیا اے کہ عدالت پیش ہو کے الزامات دا جواب دین۔ الزامات دی فائل وچ اک وڈا معاملہ وی اے اسی کنال اراضی نوں جعل سازی نال کھوکھر برادران نے اپنے فرنٹ میناں دے ناں منتقل کرایا۔ لہور دے مہنگے علاقے وچ اک پارسی ڈنشا رہندے سن مسٹر ڈنشا بے اولاد غلام سن۔ 2014ء وچ اوہناں دا انتقال ہویا تے کھوکھر برادران نے ایہ زمین اپنے قریبی لوکاں دے ناں منتقل کروا لئی۔ ظاہر اے ایس عمل وچ متعلقہ پٹواری تے دوجا عملہ وی شامل ہووے گا۔ کھوکھر برادران دا ناں جاتی امرا دے ڈیرہ داری خرچے چکن والیاں دے طور تے لیا جاندا رہیا اے عام انتخابات وچ ملک سیف الملوک کھوکھر دے پُتر نوں ٹکٹ نہ دین تے قیادت تے دبائو سی پر مریم نواز نے ایہ ٹکٹ فیصل کھوکھر نوں دین دی ہدایت کیتی۔ کھوکھر خاندان دے بہت سارے کاروبار ہو سکدے نیں پر علاقے وچ اوہناں دا سب توں وڈا نیٹ ورک پراپرٹی ڈیلر دا اے۔ ایہ ڈیلر اوہناں دے سیاسی ساتھی تے کاروباری شراکت دار نیں۔ تسیں سمجھو پراپرٹی ڈیلرز نوں کھوکھر برادران سب توں ودھ عزت دیندے نیں۔ کوئی جھگڑے والی جائیداد ہووے تے فیصلہ کھوکھر برادران دے کول ای گھم پھر کے آ جاندا اے۔ سیاسی دھڑے والے نیں تے رکھ رکھائو دا خیال کردے نیں۔ کجھ دیہاڑ پہلاں جدوں پی ڈی ایم دے لہور جلسے لئی مریم نواز نے فنڈ جمع کرن دی مہم شروع کیتی تے کھوکھر خاندان نے سب توں ودھ چندہ دتا۔ مسئلہ ایہ پیدا ہو رہیا اے کہ اوہناں دے خلاف کاروائی اجہے ویلے شروع کیتی گئی جدوں اپوزیشن نوں ایہ کہن دا موقع مل گیا کہ ایہ جلسہ روکن تے مسلم لیگ دی مقامی قیادت تے دبائو پان دا حربہ اے۔ جنوبی لہور دے ایسے علاقے وچ مسلم لیگ (ن) دے ایم این اے رانا مبشراقبال نیں۔ مبشراقبال دا ذریعہ روزگار وی پراپرٹی دا بزنس اے شریف خاندان دی زرعی زمیناں دے غیراعلانیہ منیجر مرزاجاوید ایم پی اے نیں تے اوہناں دا روزگار وی پراپرٹی دا لین دین اے۔ رانا مبشر ای نہیں پچھلے ایم پی اے وحیدگل تے دوجے کئی مقامی رہنما وی زمیناں تے قبضے تے بدعنوانی دے معاملیاں وچ ملوث دسے جا رہے نیں۔
ایہ لہور دے معاملات نیں لہور دے نیڑلے شہر شیخوپورہ وچ زمیناں تے قبضے دے الزام وچ ن لیگی رکن قومی اسمبلی جاویدلطیف دے خلاف پچھلے اک ورھے توں قنونی کاروائی ہو رہی اے۔ اوکاڑہ تے قصور وچ وی اجہے معاملیاں دی بھرمار اے۔ پچھلے دیہاڑیاں میرے اک وکیل دوست دے کول قصور دے اہم ن لیگی سیاستدان ولوں اک بیوہ دی کئی مربع زمین تے قبضے دا معاملہ آیا اے کوئی ادارہ جے سیاست دا ایندھن بنان دی تھاں ملکیت دی دستاویزات نال بیوہ دی مدد کرنا چاہوے تے اوہدے نال تعاون کیتا جا سکدا اے۔ جہڑے لوکاں خلاف ایہ ثبوت تے الزامات سامنے آ رہے نیں اوہناں دے ڈیریاں تے ہر ویلے رونق رہندی اے۔ ریاست دی عام بندے دے نال کوئی ہمدردی نہیں رہی۔ کرپشن نے ہر اوہ ذریعہ خرید رکھیا اے جو عام بندے نوں ریاست نال ملوا سکدا اے۔ تھانہ تے پٹوار دی سیاست ایسے لئی مضبوط اے۔ ریاست جے شہریاں دی سکّی ماں ہوندی تے انج نہ ہوندا ایہ ماں سُتی رہی تے عام بندہ ریاستی اداریاں دی شکل تک بھُل جاوے گا تے معاشرہ شخصیات دا غلام بن کے جمہوری آزادی دا مطالبہ کردا نظر آوے گا۔ میرے آرکیٹیکٹ دوست نے دو فوٹواں سامنے رکھیاں۔ دوویں ملکان اکو جہے‘ اک ای سائز دے سن آمنے سامنے‘ اک دے سامنے رُکھ دا ہرا بھرا وجود نظر نوں لبھاندا سی دوجا ہر لحاظ نال مکمل‘ رنگ و روغن‘ تعمیر‘ نقشہ‘ سب پہلے ورگا پر ویرانی دا تاثر دیندا ہویا۔ دوہاں دی قیمت اکو جہی سی پچھیا کہڑا خریدنا پسند کرو گے میں رُکھ والے مکان تے انگلی رکھ دتی۔ کوئی وی ہوندا انج ای کردا۔ ہن اک دوجا اندازہ لانے آں۔ دو امیدوار نیں۔ اسمبلی دا انتخاب لڑ رہے نیں۔ دوہاں دے نال تہاڈے مرسم اکو جہے نیں۔ اک دے ڈیرے تے چائے بریانی‘ قورمہ‘ بوتل بند مشروبات ملدے نیں۔ فلماں وکھائیاں جا رہیاں نیں علاقے دے ٹیڑھے تے بدمعاش تہانوں جھک جھک کے ملدے نیں۔٭٭