پنجابی کلچر ڈے، مرکزی اِکٹھ الحمرا آرٹس کونسل، لہور دے باہر ہویا

پنجابی آگواں مدثر اقبال بٹ ہوراں نوں پنجابی پَگ پوا کے پنجاب دا نمائندہ مِتھ لیا

راجہ ہمایوں یاسر ہوراں اُچیچی رَلت کیتی تے پنجابی رہتل اُتے مان کرن دی تلقین کیتی

لہور(پنجابی میڈیا گروپ) پنجابی تنظیماں ولوں پنجابی کلچرل ڈے بھرویں انداز وچ منایا گیا جس وچ اپنی ثقافت نال محبت کرن والیاں وڈی گنتی وچ رَلت کر کے ثابت کیتا کہ ایس دھرتی دی ہزاراں سال پرانی ثقافت اپنے اظہار لئی کسے حکومتی سرپرستی دی محتاج نہیں۔ ایس سلسلے وچ مرکزی تقریب مال روڈ لہور، برنی گارڈن دے سامنے ہوئی جِتھے پولیس تے ضلعی انتظامیہ ولوں رکاوٹاں پائون دی کوشش وی کیتی گئی۔ پر پنجابی ثقافت نال محبت کرن والیاں کسے وی رکاوٹ دی پروا نہیں کیتی تے سڑک اُتے ای اپنی تقریب سجا لئی۔ تقریب دا مُڈھ عارفانہ کلام نال بنھیا گیا، ندیم باہو نے سلطان باہو دا کلام سنایا جد کے بابا گروپ نے ہیر وارث شاہ نہایت عمدہ انداز وچ پیش کیتی۔

ایہدے بعد پنجاب دا لوک رقص بھنگڑا پیش کیتا گیا جد کے جُھمر، سمی، ماہیے، ٹَپے تے گیت وی پیش کیتے گئے۔ حاضرین نے ڈھول دے نال بھنگڑے وی پائے تے جیوے پنجاب دے نعرے وی لگدے رہے۔ پنڈال وچ موجود اجِیاں نے پنجابی پہناوے وی۔

زنانیاں نے روایتی پنجابی کُرتا، چنری تے کھُسے وی پائے ہوئے سن تے مرداں نے لاچے، کُرتے تے پگڑیاں سجا کے اپنے پنجاب دی رہتل نوں سلام پیش کیتا۔

ایس موقعے ایس موقعے اُتے ساری پنجابی تنظیماں ولوں احمد رضا وٹو، راجا یاسر ہمایوں، بابا نجمی، ذولفقار راحت، خلیل اوجہ ، الیاس گھمن، جمیل پال ، قاضی طارق تے ندیم رضا سمیت پنجابی آگواں نے مدثر اقبال بٹ ہوراں نوں پنجاب دی روایتی پگڑی پائی تے اوہناں نوں پنجاب دا نمائندہ قرار دِتا۔ ایس موقعے اُتے مدثر اقبال بٹ ہوراں صوبائی وزیر برائے ہائر ایجوکیشن دی موجودگی وچ مطالبہ کیتا کہ پنجابی نوں لازمی حصہ بنایا جائے اور پنجابی اخباراں نوں اشتہارات دا قانونی کوٹہ دِتا جائے۔

اوہناں لہور آرٹس کونسل دے احاطے وچ موجود گارڈن نوں پنجابی زبان دے عظیم شاعر بابا نجمی دے نام نال منسوب کرن دی قرار داد پیش کیتی جنھوں سارے رَلتیاں پر جوش انداز وچ منظور کر لیا۔ پروگرام دے اخیر اتے فضل جٹ نے چنگا ماحول گرمایا تے حاضرین نوں پنجاب گیت سُنا کے عوام نوں بھنگڑے پائون اتے مجبور کر دِتا۔ ایس پُر جوش تے جاندار اختتام اتے جِتھے ہر پنجابی خوش سی اوتھے ای ایہہ وی طے کیتا گیا کہ پنجابی ایسی کسے سرکاری بدمعاشی نوں تسلیم نہیں کردے جو اوہناں توں اوہناں دا حق کھوئے۔