پِلاک دے پربندھ ہیٹھ پنجاب کلچر ڈے دی تقریب

صوبائی وزیر ثقافت، ایڈیشنل چیف سیکرٹری تے سیکرٹری اطلاعات و ثقافت نے شرکت کیتی

رپورٹ: آفاق بٹ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام پنجاب کلچر ڈے دے حوالے نال خصوصی تقریب منعقد ہوئی جس وچ صوبائی وزیر ثقافت خیال احمد کاسترو، ایڈیشنل چیف سیکرٹری ارم بخاری تے سیکرٹری اطلاعات و ثقافت راجہ جہانگیر انور نے شرکت کیتی۔ پنجاب کلچر ڈے دے موقعے اُتے پلاک ولوں خصوصی گانا ’’جیوے جیوے شالا جیوے، ایہہ سوہنا پنجاب اساڈا‘‘ ریلیز کیتا گیا جنہوں معروف لوک گلوکار عارف لوہار نے گایا جد کہ ایہنوں ڈاکٹر صغرا صدف نے لکھیا سی۔
وزیر ثقافت خیال احمد کاسترو نے کہیا کہ 14 مارچ نوں پنجاب کلچر ڈے دے طور اُتے حکومتی سرپرستی وچ پورے جوش و خروش نال منان دا فیصلہ کیتا گیا سی پر کورونا دے ودھدے ہوئے واقعے پاروں تقریبات نوں مختصر کرنا پیا۔ ڈی جی پلاک ڈاکٹر صغرا صدف نے معزز مہماناں نوں خوش آمدید کہیا، شرکا نے پلاک لوک سٹوڈیو، ایف ایم 95 پنجاب رنگ، پنجاب لائبریری، پنجاب میوزیم تے پنجاب آرٹ گیلری وچ ’’میرا سوہنا شہر لاہور‘‘ دے ناں توں جاری نمائش وی ویکھی۔ معزز مہماناں نے پنجاب دے فن و ثقافت دی ترویج و ترقی وچ پلاک دے کردار نوں بے حد سراہیا۔