سینٹ تے چیئرمین سینٹ الیکشن دا نوحہ

تحریر ،اکرم عامر سرگودھا

حالیہ چیئر مین سینٹ الیکشن دے نتائج نے سیاسی ماحول مزید گندا کر دتا اے تے نال سیاسی گرما گرمی وچ وی وادھا ہو گیا اے، اپوزیشن نے سینٹ دی وفاق دی نشست اُتے حکومت دے 14 ارکان اسمبلی دے ووٹ خرید کے حکومتی امیدوار حفیظ شیخ نوں شکست دے کے یوسف رضا گیلانی نوں جتوا کے حکومت تے کپتان نوں جوگھائو لایا سی چیئر مین سینٹ دے الیکشن وچ حکومت نے 48 ووٹ لے کے صادق سنجرانی نوں کامیاب کرا کے ایس دا بدلہ چکا دتا اے تے اپوزیشن نوں چکر آ گئے نیں، اپوزیشن نوں چکر آن دی اک وجہ ایہناں دے امیدوار یوسف رضا گیلانی دے ست ووٹ دا مسترد ہونا اے۔جیہڑے پریزائیڈنگ افسر نے محض ایس بنا اُتے مسترد کیتے کہ ایہناں بیلٹ پیپرز اُتے مہر خانے دی بجائے یوسف رضا گیلانی دے ناں اُتے لگی ہوئی اے۔ بقول اپوزیشن جے ست ووٹ مسترد نہ ہوندے تے اپوزیشن دے یوسف رضا گیلانی چیئر مین سینٹ ہوندے، حالیہ چیئر مین سینٹ الیکشن دے نتائج آئے تے سینٹ الیکشن دے پولنگ توں دو دن پہلاں ارکان اسمبلی دی منظر عام اُتے آن والی وڈیو دا خیال ذہن وچ آ گیا جس دے بارے پی ٹی آئی دا موقف سی کہ اپوزیشن ایہناں دے ارکان اسمبلی نوں بھاری رقماں دی پیش کش کر رہی اے تے فیر وفاق دی سینٹ نشست جس اُتے یوسف رضا گیلان کامیاب ہوئے اُتے پوری قوم نے ویکھیا کہ پی ٹی آئی دے 14 ارکان قومی اسمبلی نے اپنے پارٹی دے امیدوار نوں ووٹ نہیں دتا، جس اُتے حکومت خاص طور تے پی ٹی آئی دے کپتان نوں انج دا جھٹکا لگیا کہ کپتان چکرا کے رہ گئے تے ایہنوں فوری طور اُتے ایوان توں اعتماد دا ووٹ لینا پیا۔ ایس وڈیو بارے موسی گیلانی دا موقف سی کہ اوہ تے ارکان قومی اسمبلی نوں ووٹ کینسل کران دا طریقہ دس رہے سن، سو ہن حکومت تے ایس دے اتحادی چیئر مین سینٹ تے ڈپٹی چیئر مین سینٹ اپنی پارٹی دا جتوا کے کہہ رہے نیں کہ ہن دی وار موسیٰ گیلانی اپنے ای سینٹرز نوں ووٹ ضائع کرن دی ترغیب دیندے رہے جس اُتے اپوزیشن دے اٹھ ارکان اسمبلی نے خوب عمل کیتا تے بیلٹ پیپر اُتے یوسف رضا گیلانی دے ناں اُتے مہر لا کے ووٹ ضائع کر دتا ایس طرح یوسف رضا گیلانی چیئر مین سینٹ دا الیکشن ہر گئے، ایہہ پاکستان دی تاریخ دا پہلا چیئر مین سینٹ دا الیکشن اے جس وچ سو دے ایوان وچ اٹھانوے ووٹ کاسٹ ہوئے جنہاں وچوں اٹھ ووٹ مستردہو گئے، ماضی وچ اینی وڈی تعداد وچ چیئر مین سینٹ دے کسے الیکشن وچ ووٹ مسترد نہیں ہوئے تے ایہہ وی عجب ماجرہ ویکھن وچ آیا کہ مسترد ہون والے ووٹاں دی مہر اک ای طرز اُتے لگی ہوئی پائی گئی۔ جیہڑے ایس گل دی دلیل نیں کہ ایہناں سینٹرز نے دیدہ دانستہ انج کیتا کہ ایہناں دا ووٹ مسترد ہو جائے تے ایس دا فائدہ حکومت دے امیدوار نوں ہوئے، نہیں تے جنہاں سینٹرز دے ووٹ چیئر مین لئی کینسل ہوئے نیں اوہ اینے وی جاہل نہیں سن کہ ایہناں نوں ایہہ پتہ نہیں سی کہ مہر بیلٹ پیپر دے خانے وچ لانی اے یا ناں اُتے، سو اہن اپوزیشن دی قیادت کہندی اے کہ ایہناں دے نال چیئرمین سینٹ دے الیکشن وچ دھاندلی ہوئی اے تے پریزائیڈنگ افسر نے ووٹ غلط مسترد کیتے نیں کیوں جے ووٹر نے یوسف رضا گیلانی دے ناں اُتے مہر لا کے ایہہ ثابت کیتا کہ اوہ یوسف رضا گیلانی نوں ای ووٹ دینا چاہ رہے نیں۔
اپوزیشن نے چیئر مین سینٹ دے الیکشن نوں سپریم کورٹ وچ چیلنج کرن دا اعلان کر دتا اے تے نال دھمکی دتی اے کہ اوہ نومنتخب چیئر مین سینٹ دے خلاف عدم اعتماد لیان دی وی پوزیشن وچ نیں، شاید اپوزیشن جلد بازی وچ ایہہ اعلان کردے ہوئے بھُل گئی اے کہ عدم اعتماد سردست چھ مہینے تیکر نہیں ہو سکدا تے شاید ایہناں نوں ایہہ وی یاد نہیں رہیا کہ ماضی وچ وی صادق سنجرانی دے خلاف عدم اعتماد دی تحریک پیش ہوئی سی جیہڑی مقدر قوتاں نے ناکام بنا دتی سی، پیپلز پارٹی شاید ایہہ وی بھُل رہی اے کہ پچھلے الیکشن وچ صادق سنجرانی نوں امیدوار نامزد کرن والیاں وچ سر فہرست آصف علی زرداری سن، جنہاں نے صادق سنجرانی دی کامیابی لئی خوب کھیڈ کھیڈیا سی، جیہڑا ہن دی وار پی ٹی آئی دا کپتان کھیڈ گیا تے ایس نے اپوزیشن نوں ناک آئوٹ کر دتا۔ ایسے بنا اُتے ست سینٹرز نے اپنے ووٹ دانستہ غلط مہر لا کے مسترد کرائے جس دی واضح دلیل ڈپٹی چیئر مین سینیٹ دا الیکشن اے جس وچ ایہناں ای ست وچوں چھ سینٹرز نے حکومتی امیدوار مرزا آفریدی نوں دتا تے اوہ 54 ووٹ لے کے ڈپٹی چیئر مین سینیٹ منتخب ہوئے جد کہ مولانا عبدالغفور حیدر نوں ایہناں دے 6 اتحادی نے ووٹ نہ دتے۔ ذرائع کہندے نیں کہ ایس دی وجہ بلوچستان دے اپوزیشن سنیٹرز دی مولانا فضل الرحمان نال ناراضگی سی، جس دی بنا اُتے ایہناں سینیٹرز تے مسلم لیگ ن تے پیپلز پارٹی نے مل کے مولانا فضل الرحمان نوں نیچا وکھایا؟
سو ہن اپوزیشن معاملے نوں سپریم کورٹ وچ لے جائے گی تے حکومت تے اپوزیشن وچ قانونی جنگ ہوئے گی تاں ایہہ گل واضح اے کہ ملکی تاریخ وچ ایہہ پہلا سینٹ الیکشن اے جیہڑا اینا متنازع اے کہ پاکستانی عوام دی اکثریت خاص طور تے پوری دنیا دے جمہوری حلقے ایس اُتے سوال چک رہے نیں، چیئر مین سینٹ دے حالیہ الیکشن اُتے اپوزیشن نوں ایہہ ضرور سوچنا چاہیدا اے کہ سینٹ الیکشن دے طریقے اُتے نظر ثانی ہونی چاہیدی اے تاں جے ہر وار دی طرح آئندہ اپ سیٹ نہ ہون، ایہو پی ٹی آئی دا کپتان وی سینٹ الیکشن توں پہلے کہندا سی تے ایسے تناظر وچ پی ٹی آئی دے صدر مملکت عارف علوی نے سینٹ الیکشن 2021 دے حوالے نال آرڈیننس جاری کیتا سی جس دے تحت سینٹ الیکشن شو آف ہینڈ دے ذریعے کران دا کہیا گیا تے اپوزیشن نے ایس دی مخالفت کیتی تے خفیہ ووٹنگ کران لئی سارے جتن کیتے جس وچ اپوزیشن کامیاب وی رہی اے تے سینٹ وچ خفیہ رائے شماری اُتے مٹھائیاں ونڈیاں۔ جیالے متوالے خوشی نال پھولے نہیں سما رہے سن، سینٹ الیکشن وچ وفاق دی نشست اُتے اپوزیشن نے خفیہ ووٹنگ دا فائدہ وی چکیا، جس دے نتیجے وچ یوسف رضا گیلانی سینیٹر بنے پر چیئر مین سینٹ تے ڈپٹی چیئر مین سینٹ دے الیکشنز وچ کپتان نے خوب دھوبی پٹخہ ماریا تے میدان جت لیا تے ہن اپوزیشن ایسے انتخابی عمل نوں کوس رہی اے تے کہہ رہی اے کہ جے الیکشن شو آف ہینڈ دے ذریعے ہوندے تے ہن دی وار پچھلے الیکشن وانگوں چیئر مین و ڈپٹی چیئر مین وینٹ ایہناں دا اتحادی ہوندا جیہڑا حکومت لئی قانون سازی دی راہ وچ رکاوٹ بن دا تے اپوزیشن حکومت نوں ٹف ٹائم دے سکدی، اپوزیشن چونکہ ایوان وچ پجاہ سینٹرز دی دعویدار اے تے حکومت دے ایوان وچ 48 سینٹرز نیں، اک سینٹرز مشتاق احمد جماعت اسلامی دے نیں جیہڑے ہین تے حکومت مخالف پر جماعت اسلامی حکومت تے اپوزیشن نوں اک ای تھالی دا بینگن قرار دیندی اے ایسے بنا اُتے جماعت اسلامی دے سینیٹر مشتاق احمد نے سینٹرز تے چیئر مین و ڈپٹی چیئر مین دے چنائو وچ اپنا ووٹ کاسٹ نہیں کیتا جد کہ مسلم لیگ ن دے سینٹر اسحاق ڈار نیب دے ریڈار اُتے ہون دی بنا اُتے بیرون ملک پناہ لئے ہوئے نیں تے موصوف دا کپتان دے دور وچ ملک واپس آن دا کوئی چانس نہیں۔
سو گل کتھوں کتھے نکل گئی سینٹ الیکشن وچ اپ سیٹ دی جیہڑی 2006 توں سینٹ دے ایوان دے ہر الیکشن وچ ہوندے آئے نیں تے سینٹ الیکشن وچ ہر وار وڈے پیمانے اُتے ہارس ٹریڈنگ ویکھن وچ آئی اے، جیہڑی سیاست وچ انتہائی گندا کھیڈ اے جس وچ عوامی مینڈیٹ ویچ کے ارکان اسمبلی ووٹ دی بے حرمتی کردے نیں پر دوجے پاسے ویکھیے تے ایہو ارکان اسمبلی تے سیاست دان ہر فورم اُتے ووٹ نوں عزت دیو دا نعرہ لاندے ویکھے جا رہے نیں جیہڑے سیاستداناں دا دوہرا معیار سیاست اے جے سیاستدان واقعی ووٹ نوں عزت دلوانا چاہندے نیں تے سینٹ الیکشن وچ ہارس ٹریڈنگ روکن لئی ایس دا طریقہ کار بدلنا ہوئے گا۔ انج ہون دی صورت وچ نہ ایوان وچ پولنگ بوتھ اُتے نہ کیمرے لانے پین گے تے نہ ہرن والا پریزائیڈنگ افسر نوں جانبدار قرار دیوے گا۔ ایس صورت وچ ملک وچ جمہوریت مضبوط ہوئے گی نہیں تے ہر سینٹ الیکشن دے بعد دھاندلی دا شور اٹھدا رہوے گا تے ہر سینٹ الیکشن دے نتائج عدالتاں وچ چیلنج ہوندے رہن گے جویں کہ 2021 سینٹ الیکشن وفاق دی نشست توں بعد چیئر مین سینٹ دے الیکشن عدالت وچ چیلنج ہون جا رہے نیں۔ سو ایس لئے اپوزیشن تے حکومت نوں سوچنا ہوئے گا؟ نہیں تے سیاست دے گھنائونے کھیڈ دے ستائے عوام انج دا انقلاب لیان گے کہ حکومت تے اپوزیشن نوں بہا کے لے جان گے۔