خفیہ کیمریاں دی داستان تے کجھ حقائق

کیمرے انتظامیہ نے لائے جس دی بعد وچ انکوائری کیتی جائے گی

ندیم اپل

آخر کار صادقسنجرانی اک وار فیر ایوان بالا دے چیئر مین منتخب ہو گئے۔ ایوان دے کل 98 ووٹ کاسٹ ہوئے جس وچوں کامیاب امیدوار صادق سنجران نوں 48 جد کہ سید یوسف رضا گیلانی نوں 42 ووٹ ملے۔ مزید برآں اٹھ ووٹ مسترد ہوئے تاں جویں ای نتیجے دا اعلان ہویا اپوزیشن ولوں اعتراض کیتا گیا کہ مسترد شدہ بیلٹ پیپلز اُتے مہر خانے دے اندر ای لگی اے جد کہ اپوزیشن دے پولنگ ایجنٹ نے ایس دے برعکس دلائل دتے تے ایہہ ثابت کیتا گیا کہ سید یوسف رضا گیلانی دے ناں اُتے مہرلان نال ست ووٹ مسترد ہوئے۔ دوپہر نوں جدوں نومنتخب سینیٹرز حلف چک رہے سن تے عین ایسے ویلے مسلم لیگ ن دے سینیٹر ڈاکٹر مصدق ملک تے پی پی پی دے مصطفیٰ نواز کھوکھر نے انکشاف کیتا کہ پولنگ بوتھ دے اندر خفیہ کیمرہ تے مائیکرو ریکارڈنگ سسٹم نصب اے۔ جس اُتے سینیٹر رضا ربانی دا کہنا سی کہ ایہہ آئین دی کھلم کھلا خلاف ورزی اے تاں سپریم کورٹ تے الیکشن کمیشن نوں ایس دا فوری نوٹس لینا چاہیدا اے۔ مصطفیٰ نواز کھوکھر تے ڈاکٹر مصدق ملک نے سوال کیتا کہ پتہ لایا جائے کہ رات دے ہنیرے وچ کس نے سینیٹ دے دروازے کھلوائے تے خفیہ کیمرہ تے مائیکرو فون نصب کروایا۔ ذرائع دے مطابق بعد وچ دسیا گیا کہ ایہہ کیمرے انتظامیہ نے لائے سن جس دی بعد وچ انکوائری کیتی جائے گی البتہ ڈاکٹر فردوس اعوان نے وی ایس حرکت نوں اپوزیشن دے کھاتے وچ پا دتا البتہ اپوزیشن نے مطالبہ کیتا کہ ایہہ کیس پولیس نوں دتا جائے یا سینیٹرز دی اک کمیٹی ایس دی تحقیقات کرے۔ ایس واقعے اُتے اپوزیشن ارکان نے خوف شور مچایا تے احتجاج کیتا جس اُتے الیکشن کمیشن نوں فوری نوٹس لیندے ہوئے نواں بوتھ بنان دا حکم دینا پیا۔ اپوزیشن ارکان نے مطالبہ کیتا کہ ایس واقعے اُتے چیئر مین سینیٹ نوں مستعفی ہو جانا چاہیدا اے۔ ایہہ گل وی قابل ذکر اے کہ چیئر مین تے ڈپٹی چیئر مین سینیٹ دے انتخاب توں پہلاں جس طرح دی خریدو فروخت ہوئی تے اک دوجے دے نوٹیفکیشن رکوان لئی جس طرح اعلیٰ عدلیہ نال رجوع کیتا گیا انج ماضی وچ کدی نہیں ہویا۔
تاریخ شاہد اے چیئر مین سینیٹ دا انتخاب ہمیشہ بڑی خاموشی نال ہویا بلکہ کجھ اوقات تے اگلے دن اخباراں توں پتہ چلدا سی کہ پچھلے دن چیئر مین سینیٹ دا انتخاب عمل وچ آیا اے پر ایس وار تے عجیب تماشہ ویکھن وچ آیا۔ حکومتی تے اپوزیشن ارکان دے وچکار ایس طرح الفاظ دی گولہ باری ہوئی جویں دو ملکاں دے وچکار جنگ لڑی جا رہی ہوئے۔ سیاسی تے عوامی حلقے ایس بارے سوال کردے رہے کہ صادق سنجرانی تے یوسف رضاگیلانی وچوں جو وی چیئر مین سینیٹ منتخب ہوئے گا کیہ ایس نال مہنگائی تے بیروزگاری گھٹ ہو جائے گی کیہ آٹا، چینی، گھیو تے دوائیاں دیاں قیمتاںفوری تھلے آ جانگیاں۔ کیہ چیئر مین دا انتخاب ای عوامی مسائل دا آخری حل اے کہ جس لئی اینی وڈی جنگ لڑی گئی۔ ایہناں سوالاں دا جواب تے یقینا نفی وچ اے تاں اصل گل تے ایہہ سی کہ عوام دی ایس الیکشن وچ انج ای دلچسپی سی جویں لوکاں دی پی ایس ایل وچ دلچسپی ویکھی گئی۔ ایس وار چیئر مین سینیٹ دے انتخاب وچ جیہڑا ایس قدر شور غوغا ہویا، دونواں پاسیوں کروڑاں روپئے دیاں ٹکٹاں دی خرید و فروخت دے الزام لگے۔ ایس الیکشن دی ہار جت نوں جس طرح نال فریقین نے اپنے لئے مسئلہ بنائے رکھیا سی ایس دی اک بنیادی وجہ ایہہ وی سی کہ چیئر مین سینیٹ دی کامیابی یا ناکامی اُتے دونواں دی سیاسی بقا دا دارومدار سی چونکہ حکومت نوں خلاف توقع سینیٹ دے انتخابات وچ مرکزی سیٹ اُتے شکست ہو چکی سی۔ تاں ایس شکست دا بدلہ لین لئی حکومتی لابی نے ایڑی چوٹی دا زور لا دتا جس دے جواب وچ اپوزیشن ایس توں وی دو ہتھ اگے نکل گئی۔ کئی مرحلیاں اُتے تے انج وکھائی دے رہیا سی کہ شاید پی ڈی ایم دی 11 جماعتاں وچ پھٹ پئے جائے گی۔ پر انج نہیں ہویا تے اوہ آخری ویلے تیکر متحد رہے تاں ایس دوران ایہہ وی خبراں آئیاں کہ انج نہیں ہویا تے اوہ آخری ویلے تیکر متحد رہے تاں ایس دوران ایہہ وی خبراں آئیاں کہ حکومت نے پی ڈی ایم دے اک رہنما مولانا عبدالغفور حیدر نوں ڈپٹی چیئر مین بنان دی پیشکش کیتی اے پر بعد وچ حکومت حلقیاں ولوں ایس دی تردید آ گئی تے کہیا گیا اوہ تے انج ای پرویز خٹک دی زبان پھسل گئی سی تاں پی ڈی ایم دی قیادت نے بعد و چ مولانا نوں ڈپٹی چیئر مین سینٹ دی نشست لئی نامزد کر دتا۔