بلو بگھے بلیاں دا کیہ کریں گی
لكهت: ایثار رانا
جو مرضی کر لوو جناں مرضی ٹل لا کے ہیا او ہیا کہہ لوو جمہوریت دی کھوتی نے بوڑھ تھلے آنا ای ہوندا اے۔ پارلیمنٹ دے باہر جو ہویا کوئی نواں نہیں محترمہ فاطمہ توں لے کے نصرت بھٹو تک ساریاں نے ایہ رویہ جھلیا اے پر ہن ایہ گل من لوو کہ سسٹم چھابے وچ پئے ہوئے شہتوت جلیبا توں وی زیادہ سستا اے۔ ایہدے تے اک ذہین‘ جوڑ توڑ دا ماہر بھاری پے سکدا اے ایس سسٹم دی اینی ای اوقات اے۔ میرا یقین اے کہ میرے جمہوریت دے آئیڈیل دیوتا جے امریکن سینٹ وچ بندے کھڑا کرن تے جوبائیڈن کیہ تے ٹرمپ کیہ‘ ویکھدے رہ جائو‘ زرداری اوتھے وی دو تے دو پنج کرکے وکھا دین۔ پر ایہ شرف صرف سانوں جاندا اے کہ فخر نال کہیے یار زرداری بڑا ودھ اے ویکھو اوہنے کیسی گیم پائی اے۔ بھیا اسیں آپ اپنی سیاست دے چھوٹے موٹے بکیے آں جہناں نوں ایہ غرض اے کہ کیسی فتح ہوئی‘ کیویں ہوئی ایہ ساڈا مسئلہ نہیں۔ مینوں تے ایہ سسٹم اپنی آخری ہچکیاں تے نال ماضی دی اداکارہ شبنم وانگوں سسکیاں لیندا وکھائی دے رہیا اے۔ ایہ اوہ جھولی اے جو چھیکو چھیک ہو چکی اے۔ کجھ ہزار چہریاں دی رکھیل ایہ سیاست کسے غریب بندے نوں ککھ نہیں دے سکی تے نہ دے سکے گی سگوں لوکاں تے گلاس توڑے بارا آنے دے ناں تے قرضہ ضرور چڑھ گیا اے۔
ایہو ڈر اے جو مینوں جمہوریت توں بار بار سوال کرن دا موقع دے رہیا اے کہ بلو بگھے بلیاں دا کیہ کریں گی۔ سگوں ایہدے دوالے جھینگا لالہ ہو گان والے ایہ وی کہہ رہے نیں کہ بھگے بھگے بلیاں دا کیہ کریں گی۔ سنتا سنگھ توں مسافر نے پچھیا کہ چک 42 کتھے اے سنتا بولیا یار چک 41 دے بعد چک 42 اے۔ اوس مسافر نے حیران ہو کے کہیا کہ او بھائی پر چک 41 کتھے اے‘ سنتا سنگھ بولیا چک 42 توں پہلاں۔ بس سمجھ لوو وڈیریاں‘ جاگیرداراں‘ طرم خاناں دے چک 42 توں پہلاں میاں‘ زرداریاں دا چک 41 آنا اے۔ ہن مسافر اپنے سامان دی آپ حفاظت کرے کمپنی کسے گل دی ذمے وار نہیں ہووے گی۔ ہاسا آئوندا اے‘ سلام اے میرے قوم دی لیڈرشپ تے جہناں دیاں وکھیاں قوم دی بھکھ ننگ‘ وچارگی ویکھ کے دکھن لگدیاں نیں۔ قوم مہنگائی دے ہتھوں تقریباً فوت شدہ اے تے ایہدی قیادت نوں اک دوجے دی شلوار کھچن تے ماں بھین کرن توں اڈ کوئی کم نہیں۔ افسوس ساریاں دیاں شلواراں وچ لاسٹک دا نالا اے۔ بس ایس عشق وچ کسے دی عزت سادات سلامت نہیں۔
کجھ ادارے عزتاں بچا کے بیٹھے تے ایہہ اوہناں نوں اشارے سگوں گندے گندے اشارے کردے نیں۔ قسم نال ایہناں دے ظہرانیاں تے جنے پیسے لگدے نیں ایہدے وچ گھٹو گھٹ اک ودھوا دا کینہ دان تے انج ای ہو جاوے۔ سینٹ الیکشن وچ جو کجھ ہویا اوہنے جمہوریت نوں بھرے بازار وچ ننگا کر دتا۔ مزے دی گل ایہہ وے کہ جمہوریت کسے تے پرچہ وی نہیں کٹوا سکدی۔ بس ایہ سیمی اولڈ الھڑ مٹیار ایہناں لوکاں نے لے لینا اے دوپٹہ میرا گا سکدی اے۔ اپوزیشن تے حکومت وچ ست اکونجا کوئی پہلی وار نہیں۔ دوہاں وچ صدیاں دا اٹ کھڑکا اے۔ بس ایہدے وچ پوزیشن بدلدی رہندی اے۔ اج مسلم لیگ تے پیپلزپارٹی وچ جو اکھ مٹکا اے اوہ وی اٹ کھڑکے دی جھولی چوں پیدا ہویا۔ بنتا سنگھ نے ٹھنڈی آہ بھر کے اپنے دوست نوں کہیا کہ یار بچپن وچ نیک بنن دی کوشش کیتی سی۔ دوست نے کہیا فیر بنتا سنگھ بولیا بس بچپن گیا تے خواہش وی چلی گئی۔ ماشاء اللہ ساڈی قیادت پیدائش دے بعد ڈائریکٹ حوالدار مطلب جوان ہوئی۔ ایس لئی اوہنے کدی اجہی فضول خواہش کیتی ای نہیں۔
ہن صورتحال ایہہ وے کہ کپتان ولوں ووٹ آف کانفیڈنس لین مگروں کم تیہہ تے اپڑ گیا اے پکچر اجے باقی اے۔ ہن ویکھو اپوزیشن کدوں جوابی کاروائی کردی اے۔ بس اسیں ہر شارٹ تے تاڑیاں مارنیاں نیں۔ لوکاں دا رول ایس فلم وچ ایس توں ودھ نہیں۔ بھائی میں بار بار کہنا واں کہ تسیں جنہوں جمہوریت سمجھ رہے او اصل وچ ایہ الیکشن دا لباس‘ جمہوری پارٹیاں دا زیور تے مہرباناں توں ادھار لئے سرخی پوڈر لائے اک بھیانک چڑیل اے ایہ چڑیل بچے کھاندی اے۔ بھکھ نال اڈیاں رگڑدے بچے‘ ماں دی جھولی وچ بلبلاندے بچے‘ ڈگریاں پھڑے‘ آبلہ پا نوجوان‘ بیروزگار باپ‘ بھائی‘ جہیز دے انتظار وچ سسکدے سسکدے بڈھیاں ہون والیاں بھیناں‘ ایس چڑیل دے اندر شیطان ہر ویلے موجاں ای موجاں کردے پھردے نیں۔ چوتھے نکاح ویلے سنتا توں مولوی صاحب نے پچھیا قبول اے‘ سنتا بولیا‘ مولوی صاحب اسیں کدے پہلاں نہ کیتی اے۔ ہر چار‘ پنج ورھے توں سیاسی نکاح تے ایہ 20 کروڑ سنتے بسنتے ہاں ہاں پکاردے نیں ایس توں ودھ ایہناں دی عاجزی تے سسٹم نال عشق‘ محبت کیہ ہووے گی۔
بہرحال مینوں تے منافقت‘ دھونس‘ دھاندلی‘ دولت‘ ضمیر فروشی‘ جھوٹ‘ دھوکھے دا سسٹم آخری ہچکیاں لیندا نظر آ رہیا اے۔ فیصلے دی ٹائمنگ اگے پچھے ہو سکدی اے پر مینوں ایہ ٹوپی ڈرامہ زیادہ دیر چلدا نظر نہیں آ رہیا۔ جاندے جاندے اوہناں دانشوراں دے ناں جو کسے وی ایونٹ تے کہہ دیندے نیں لو جی دوستاں نے ہتھ چک لیا لو جی ہن ایہناں نے اپوزیشن نے ہتھ رکھ دتا۔ بس ایہدے توں سمجھ لوو ایس جمہوریت دی اوقات ہمیشہ اک ہتھ دی مار رہی اے۔ پر ہاں الیکشن کمیشن دے اوس اہلکار نوں میرا دوہاں ہتھاں نال سلام جنہے ڈیوٹی دوران وزیراعظم نال کرسی تے بیٹھے بیٹھے گل کیتی۔ ایہ ہوندی اے جرأت‘ ایہنوں کہندے نیں اوپن بیلٹنگ۔ ایہ عظیم اہلکار ساڈے اداریاں دی نفسیات دا بہترین ترجمان قرار دتا جا سکدا اے۔ ہو سکدا اے شہبازشریف تے ایازصادق دے آن تے بار بار اٹھن نال ایس اہلکار دے گٹے گوڈے رہ گئے ہون پر وزیراعظم دی واری کسے نے اوہناں دی کرسی دے تھلے ایلفی سٹ دتی ہووے۔
اپنے تیور تو سنبھالو کہ کوئی یوں نہ کہے
دل بدلتے ہیں تو چہرے بھی بدل جاتے ہیں
