سو گلاں دی اکو گل

ارشاد بھٹی

سو گلاں دی اکو گل جدوں جمہوریت تے سیاست منطق لیس‘ اصول لیس‘ اخلاقیات لیس ہووے گی تے ایہو ہووے گا جو ہو رہیا اے۔ صادق سنجرانی خلاف تحریک عدم اعتماد‘ اقلیت جت گئی‘ اکثریت ہار گئی‘ یوسف رضا گیلانی بمقابلہ حفیظ شیخ‘ اقلیت جت گئی اکثریت ہار گئی‘ ہن جے صادق سنجرانی دا مینڈیٹ حرام سی تے یوسف رضا گیلانی دا مینڈیٹ وی حرام‘ جے صادق سنجرانی دا مینڈیٹ حلال سی تے فیر یوسف رضا گیلانی دا مینڈیٹ وی حلال‘ میرے توں پچھو تے دوہاں دا مینڈیٹ حرام‘ سنجرانی‘ گیلانی جس طرح دوویں جتے‘ ہار جاندے تے بہتر ہوندا‘ بلاشبہ دوویں جت گئے‘ پر دوویں واری جمہوریت ہار گئی‘ پر کیہ کریئے‘ ایتھے اک دھڑا سنجرانی جت تے سوگ تے گیلانی جت تے خوشیاں منا چکیا اے جد کہ دوجا دھڑا سنجرانی جت تے خوشیاں تے گیلانی جت تے سوگ منا چکیا اے۔ اک دھڑے نوں سنجرانی جت ڈنکی ٹریڈنگ دی مرہون منت لگی جد کہ دوجے دھڑے نوں گیلانی جت ڈنکی ٹریڈنگ پاروں لگ رہی اے۔
گل ڈنکی ٹریڈنگ دی ہوئی تے ایہ وی دسدا جاواں ہن تے بدقسمتی نال ایوان بالا مطلب سینیٹ تے ڈنکی ٹریڈنگ لازم و ملزم ہو کے رہ گئی اے ہر واری نوٹ چلن‘ ہر واری خریدوفروخت ہووے‘ ہر واری رولا رپا‘ رونا دھونا ہووے پر ہر واری حل نکلے بناں گل ٹھپ ہو جاوے۔ کدی عملی طور تے کجھ نہ ہووے سینیٹ دے 48 ورھے‘ زوال ای زوال‘ بہت پہلاں پی پی دے متوقع سینیٹر اسلم گل ہار گئے تے رولا رپے دی انتہا ہو گئی مارے گئے‘ لٹے گئے‘ اگلی واری سینٹ انتخابات وچ ہیرپھیر ہوئی تے قاضی حسین احمد بول پئے ہارس ٹریڈنگ ہو گئی اگلی واری سینٹ انتخابات وچ ہیرپھیر ہوئی تے مولانا فضل الرحمن تے نوازشریف بول اٹھے سینٹ وچ نوٹ چلے پتہ نہیں کس چھومنتر نال محسن لغاری سینیٹر بن گئے تے فیر رولا پیا گھٹ ووٹاں دے باوجود گورنر سرور سینیٹر بنے تے مسلم لیگ (ن) چیک اٹھی ساڈے نال زیادتی ہو گئی۔ 2018ء وچ کے پی وچ جو ہویا نوٹاں دے ڈھیر والی ویڈیو سارے ویکھ چکے‘ بلوچستان وچ سینٹ انتخابات وچ جو ہویا اوہ وی ساریاں دے سامنے‘ صادق سنجرانی دے خلاف نکام ہوئی تحریک عدم اعتماد نے تے ایوان بالا دے تقدس‘ اپنی جمہوریت‘ اپنی سیاست ساریاں نوں ننگا کر کے رکھ دتا۔حاصل بزنجو بولے سینٹ دے منہ تے کالک مل دتی گئی رضاربانی کہن لگے مینوں سینٹ وچ بیٹھے شرم آ رہی اے پرویز رشید بزنجو وفات دے بعد سینٹ وچ تقریر کردے ہوئے کہن لگے بزنجو صاحب میں معذرت خواہ آں میرے 14 سینیٹراں نے تہاڈے نال بے وفائی کیتی اے۔ خواجہ آصف بولے آصف زرداری ساڈے نال گیم کر گئے بلاول بھٹو نے سارے پی پی سینیٹراں توں استعفے لے لئے پر عملی طور تے کیہ ہویا‘ صفر بٹا صفر‘ ہر واری سارے گلاں باتاں نال ٹرخا کے چلدے بنے تے فیر یوسف رضا گیلانی بمقابلہ حفیظ شیخ دا موقع آ گیا۔ ایس مقابلے وچ وی اوہو ہویا جو ہر سینٹ انتخابات وچ ہویا پر حیرت ایس گل دی اے کہ ایس واری بظاہر ثبوت پہلے توں ودھ پر الیکشن کمیشن پہلے چپ فیر سست‘ گیلانی صاحب نوں سد کے ایہ وی نہ پچھیا تہاڈے 160 ووٹ‘ تہانوں ملے 169‘ 9 ووٹ کتھوں آئے؟
وزیراعظم عمران خان دا بیان گیلانی بمقابلہ شیخ وچ میرے 15 سولہ ایم این اے وِک گئے۔ الیکشن کمیشن چپ‘ ایناں نہ ہویا‘ وزیراعظم توں پچھدا تہاڈے کول کیہ ثبوت کہ تہاڈے پندراں سولاں ایم این اے وِکے‘ ذرا اوہناں دے سانوں وی دسو۔ وزیراعظم دا بیان پنجاہ توں ستر کروڑ اک سینیٹر دی بولی‘ الیکشن کمیشن چپ‘ ایناں نہ ہویا سد کے پچھدا تہانوں کیویں پتہ اک سینیٹر بنن لئی پنجاہ توں ستر کروڑ دی بولی لگ رہی اے۔ تسیں وزیراعظم یقینا سنیاں سنائیاں گلاں تے بیان نہیں دے رہے ہوو گے کہ پنجاہ توں ستر کروڑ دا سینیٹر بن رہیا اے ثبوت دیو‘ وزیراعظم نے کہیا کہ ساڈی خواتین ایم این اے نوں فون آئے کہ سینٹ لئی ووٹ سانوں دیو دو کروڑ توں بولی شروع ہوئی‘ الیکشن کمیشن چپ‘ ایناں نہ ہویا وزیراعظم نوں کہندے اوہناں خواتین ایم این اے دے ناں دسو جہناں نوں فون آئے۔ خواتین ایم این اے نوں سد کے پچھیا جاندا فون کتھوں آئے۔ کنہے کیتے‘ اٹارنی جنرل نے سپریم کورٹ وچ کہیا اسلام آباد وچ لوک نوٹاں بھرے بریف کیس لے کے گھم رہے نیں دبئی ہنڈی توں پیسہ اپڑان دا ریٹ وکھرا‘ الیکشن کمیشن چپ‘ ایناں نہ ہویا اٹارنی جنرل توں پچھدا قبلہ تہاڈے کول ایہ جانکاری کتھوں آئی‘ ثبوت دینا چاہو گے۔
مریم نواز بولیاں‘ گیلانی صاحب نوں جتوان لئی پنجاب وچ ن لیگ دیاں ٹکٹاں چلیاں‘ مطلب مبینہ طور تے پی ٹی آئی دے دس توں باراں پنجاب دے ایم این ایز نے اگلے الیکشن وچ ن لیگ دیاں ٹکٹاں ملن دی یقین دہانی دے بعد گیلانی صاحب نوں ووٹ دتے الیکشن کمیشن چپ‘ ایناں نہ ہویا مریم نواز نوں سدکے کہندا ایہ تے ہارس ٹریڈنگ‘ کیوں کیتی‘ ہن سانوں اوہناں ایم این ایز دے ناں دیو‘ علی حیدر گیلانی دی آڈیوز‘ ویڈیوز آ چکیاں‘ اوہ آڈیوز‘ ویڈیوز دا اعتراف کر چکے نیں ایہناں وچ جو تحریک انصاف دے ممبران‘ اوہ سامنے آ چکے اوہ من چکے پر الیکشن کمیشن چپ۔دلچسپ گل ایہہ وے کہ ڈسکہ دھاندلی وچ دلیرانہ کردار ادا کرن والا الیکشن کمیشن گیلانی صاحب بمقابلہ حفیظ شیخ وچ اجیہا نکلیا کہ دو مارچ نوں تحریک انصاف نے علی حیدر گیلانی آڈیوز‘ ویڈیوز دے حوالے نال درخواست دتی الیکشن کمیشن نے چار دیہاڑے چپ رہ کے ہور پنج دن بعد یاراں مارچ نوں سماعت مقرر کر دتی۔ ہن باراں مارچ نوں چیئرمین سینٹ انتخابات‘ کدھرے انج تے نہیں کہ کاروائی ایس لئی سست ہو رہی اے کہ چیئرمین سینٹ انتخابات توں پہلاں آڈیوز ویڈیو دا معاملہ حل نہ ہو سکے حالاں کہ جے الیکشن کمیشن چاہندا تے معاملہ پہلے وی حل ہو سکدا سی۔ ہن سینٹ چیئرمینی لئی گیلانی بمقابلہ سنجرانی دوویں سینٹ سپیشلسٹ‘ زرداری صاحب دی دریافت‘ اپوزیشن اتحاد دے سینٹ وچ 53 ممبران جد کہ حکومت دے 47‘ ہونا تے ایہ چاہیدا سی کہ اپوزیشن دی گنتی زیادہ‘ عمران خان سنجرانی صاحب نوں نہ کھڑا کردے‘ یقینا عمران خان دا قد وڈا ہو جاندا۔پر کیوں جے ایتھے انج کدی نہیں ہوندا۔ ہن جے اقلیت دے باوجود صادق سنجرانی جت جاندے نیں تے کیہ ایہ جمہوریت دی جت ہووے گی کیہ اپوزیشن ایہنوں جمہوریت دی فتح من کے انج ای خوشیاں مناوے گی جیویں اوہ گیلانی صاحب دی جت تے خوشیاں منا رہی اے پر گل اوہو سگوں سو گلاں دی اکو گل‘ جدوں جمہوریت تے سیاست منطق لیس‘ اصول لیس‘ اخلاقیات لیس ہووے گی تے ایہو ہووے گا جو ہو رہیا اے۔
(بشکریہ روزنامہ جنگ)