آئی سی یو
ایہہ بے بس مریض تے لواحقین ساڈے اپنے پیاریاں نوں بچان لئی زیورات جائیداد ویچ کے ایہناں ڈاکوئواں نوں دولت مند بناندے نیں
تحریر:پروفیسر محمد عبداللہ بھٹی
میں لہور شہر دے وڈے سرکا ری ہسپتال وچ اک عزیز دی تیما رداری لئی آیا ہویا سی کارپارکنگ وچ کھڑی کر کے ہن آئی سی یو وارڈ ول پیدل ای جا رہیا سی میرے سجے کھبے وطن عزیز دے کونے کونے توں مفلوک الحال مریضاں دے لواحقین دا سیلاب آیا ہویا سی پچھلے کئی مہنیاں توں خوفناک پراسرار دنیا نوں دہلا دین والی وبا کرونا نے پوری دنیا دے ترقی پذیر ملکاں وچ اپنی دہشت بٹھا رکھی سی لکھاں انساناں نوں گاجر مولیاں وانگوں کٹن، موت دے گھات اتارن توں بعد وی تاریخ انسانی دی ایس خوفناک جان لیوا وبا دا پیٹ نہیں بھریا سی دنیا جہاں دے طاقت ترقی یافتہ ملک سر توڑ کوششاں دے باوجود وی ہجے تیکر ایس دے ساہمنے بے بسی دی تصویر بنے نظر آ رہے سن۔ موجودہ دور دی ترقی یافتہ میڈیکل ریسرچ تے عملہ ہجے تیکر ایس پراسرار وبا دے بھید جانن توں قاصر سی۔ تحقیق دا سفر جاری سی پر ایہہ وبا بھیس بدل بدل کے کرہ ارضی اُتے نسل انسانی نوں چٹن وچ مصروف سی۔ میں وی کرونا دے شکار انج دے ای عزیز دی تیمارداری لئی ہسپتال آیا سی جدوں میں ہسپتال وچ داخل ہویا تے دماغ وچ ایہو سی کہ کروبا دی وبا دی وجہ نال لوک ہسپتالاں توں دوری اُتے ہون گے ہسپتال دا پاسا نہیں کرن گے پر جدوں مختلف برآمدیاں، راہداریاں دلاناں گلیاں میداناں توں لنگھ رہیا سی چارے پاسے غریب لاچار مفلس بے بس لوک لاوارث سامان وانگوں کوڑے دی طرح کھلرے پئے سن۔ ایہناں لاوارثاں نوں جتھے تھاں نظر آئی اوتھے ڈیرہ بنا لیا زمین فرش اُتے چادراں دریاں پائے کھلے اسمان تے برآمدیاں وچ مدد مدد سددے نظر آ رہے سن۔ شروع وچ تے لوک کرونا دی وجہ نال گھراں وچ بک گئے پر کدوں تیکر جدوں بیماریاں نے شدت اختیار کیتی تے بیچارے اپنی بقا تے درداں، بیماریاں توں نجات لئی سرکاری ہسپتالاں ول آئے کجھ جاگ رہے سن کجھ ہتھاں وچ دوائیاں تے لیبارٹریاں دی رپورٹاں ویکھ رہے سن کجھ رات نوں جاگن دی وجہ نال سو رہے سن ہر پاسے غربت لاچارگی بے بسی دے درد ناک منظر سن پچھلی حکومتاں تے موجودہ حکومت نے ایہناں بیچاریاں نوں استعمال کیتا فیر ٹشو پیپر وانگوں سٹ دتا جدوں وی کوئی پارٹی الیکشن وچ حصہ لیندی اے تے اقتدار اُتے قبضہ جمان لئی ایہناں بیچاریاں دی اکھاں وچ سہانے خاب جگا کے ایہناں توں ووٹ لے کے فیر مُڑ کے ایہناں بیچاریاں ول نہیں ویکھدے تے ایہہ بیچارے جانوراں دے ریوڑاں وانگوں فطرت دے ہتھوں جھولدے زندگی توں موت دے گھاٹ اُتر جاندے نیں۔ تسیں دن یا رات کسے وی ویلے کسے وی سرکاری ہسپتال وچ جا کے ایہناں لاچار مجبوراں دا نظارہ کر سکدے او کہ ایہہ بیچارے کس طرح مفلسی درد تکلیف دی تصویر بنے آندے جاندے لوکاں نوں ویکھدے نیں موجودہ گورنمنٹ نے وی اقتدار دے جھولے اُتے سوار ہون لئی عوام نوں خوب بے وقوف بنایا پر اڑھائی سال لنگھن دے باوجود وی تبدیلی یا خوشحالی تے دور دی گل تبدیلی دی ہلکی جہی لہروی نظر نہیں آئی اُتے ایہناں بیچاریاں لئی ہسپتالاں وچ مفت دوائی بند کر دتی گئی نال ای ایہناں بیچاریاں دی کمر توڑن لئی ایہناں دی آخری ساہواں کھون لئی دوائیاں سینکڑے گنا مزید مہنگی کر کے ایہناں دے حالات زار نوں ہور وی درد ناک بنا دتا اے فیر جدوں ایہہ بیچارے پتہ نہیں ملک دے دور دراز حصیاں توں ایہناں ہسپتالاں تیکر آ ای جاندے نیں تے فیر ایہناں نوں چیک کرن دے بعد مہینیاں بعد دی تاریخ دتی جاندی اے۔اپریشن دی لوڑ اج اے پر ایہناں نوں مہینیاں بعد آن نوں کہیا جاندا اے ایس طرح زیادہ تر مریض انتظار تے آن والی تاریخ تیکر اونج ای زندگی دی بازی ہر جاندے نیں پر ایہناں سرکاری ہسپتالاں وچ جے کوئی بااثر مریض یا ایس دے لواحقین آن تے سارا عملہ ایس مریض تے ایس دے لواحقین دے ساہمنے میراثیاں وانگوں نوکری کردے نظر آندے نیں ایہناں ہسپتالاں اُتے وی پروٹوکول تے بااثر لوکاں دا قبضہ اے تسیں کسے سرکاری افسر، حکومتی بااثر لوکاں یا محکمہ صحت دے بااثر بندے دا فون کرا کے جے ایہناں ہسپتالاں وچ جائو تے تہاڈا استقبال دلہے وانگوں کیتا جاندا اے فیر تہانوں فائیو سٹار ہوٹل والی سہولتاں مہیا کیتیاں جاندیاں نیں ایہو ڈاکٹر تے میڈیکل عملہ جیہڑا رعونیت توں فرعون بنے تہاڈے ول اکھ چک کے وی نہیں ویکھدے فیر تہاڈی خوشامد چاپلوسی کردے نظر آندے نیں ایہناں جلاد ڈاکٹراں دی ستم ظریفی تے ظلم دا ایہہ عالم اے کہ ایہناں سرکاری ہسپتالاں وچ نوکری ایس لئی کردے نیں کہ ایتھے ایہہ شکاریاں وانگوں آندے نیں جدوں ایتھے آن والے مریضاںنوں کئی مہینیاں بعد دی تاریخ ملدی اے تے ایہناں نوں اپنے پرائیویٹ ہسپتالاں دا کارڈ دے کے اوتھے بلا کے ایہناں نوں لُٹ مار ڈکیتی دے عمل توں گزاردے نیں ایہہ بے بس مریض تے لواحقین ساڈے اپنے پیاریاں نوں بچان لئی زیورات جائیداد ویچ کے ایہناں ڈاکوئواں نوں دولت مند بناندے نیں ایہہ بے بس لاچار عوام کنہے سالاں توں ظلم دی چتا اُتے ایسے طرح سلگ رہے نیں۔
پتہ نہیں ایس عوام کش سسٹم توں ایہناں لاچاراں نوں کدوں رہائی ملے گی جدوں وی کوئی میرے جہیا حساس انسان انج دے ہسپتالاں وچ آندا اے تے فیر ایتھے مختلف مریضاں تے ایہناں دے لواحقین دی حالت زار فیر عملے دا ناروا سلوک ویکھدا اے تے بے اختیار اللہ دا شکر ادا کردا اے کہ اوہ بیمار نہیں فیر خدا دے ساہمنے سجدہ شکر ادا کردا اے کہ اوہ صحت مند مریضاں دی بدحالی بے بسی لاچارگی ویکھدے ہوئے آخر کار وچ آئی سی یو وارڈ تیکر اپڑ گیا میرا میزبان میرا انتظار کر رہیا سی ایس نے دسیا ایس دے والد صاحب کرونا توں صحت یادب ہو گئے نیں ہن نارمل آئی سی وارڈ وچ نیں نہیں تے کرونا وارڈ وچ تے عام ملاقاتیاں دا داخلہ بند ہوندا اے میرے میزبان نے ہسپتالاں دے عملے نال جان پہچان بنا رکھی سی، اسیں ماسک وغیرہ پائے ہوئے سی جُتے لاہ کے اوہ مینوں آئی سی وارڈ وچ لے گیا اوتھے چارے پاسے موت دے سائے لہراندے نظر آئے مریض مختلف نالیاں وچ لیٹے نظر آئے کسے دا منہ کھلیا اے کوئی بے ہوش اے کسے دا جسم سوزش دا شکار اے زیادہ تر بے ہوش سن یا آکسیجن سلنڈر چل رہے سن ایتھے انسان جس بے بسی دے عالم وچ پئے سن میرا کلیجہ منہ نوں آ گیا کہ جدوں انسان زندہ جوان طاقتور رہندا اے تے ظلم غرور طاقت دے گھوڑے اُتے سوار رستے وچ آن والیاں نوں رونددا چلا جاندا اے پر زندگی دی آخری ساہواں لیندے آئی سی یو دے مریض بے بسی دی زندہ لاشاں سن جنہاں دے لواحقین ایہناں دا انتظار کر رہے سن ایتھے اوہ مریض سن جدوں ایہہ ہوش وچ سن رگاں وچ جوان صحت مند خون گردش کردا سی تے ایہو سوچدے سن کہ اسیں ہمیشہ جوان طاقت ور تے صحت مند رہنا اے پر جدوں بڑھاپے تے بیماری نے جکڑیا تے زندہ لاشاں وانگوں نشان عبرت بنے، نرساں ڈاکٹراں دے رحم و کرم اُتے سن ایہناں دی حالت زار نے مینوں وی ہلا کے رکھ دتا میں میزبان دے مریض دے کول گیا جیہڑا تھوڑا ہوش وچ سی میں سلام کیتا دعا کیتی رب نال اللہ تعالیٰ ایہناں سب مریضاں نوں صحت دیوے سلام دعا توں بعد جدوں میں واپس جان لئی دروازے ول ودھیا تے مینوں اک جانیا پہچانیا چہرہ نظر آیا جیہڑا میرے ول ویکھ رہیا سی میں دروازے توں باہر نکلیا تے اوہ میرے نال ای آ گیا تے بولیا سر تسیں مینوں پہچانیا نہیں نال ای ایس دی بیوی وی آ گئی جس نوں میں چنگی طرح جاندا سی مینوں ویکھ کے بولی پروفیسر صاحب میرے سسر وی آئی سی یونٹ وچ موت دا انتظار کر رہے نیں پر نہ اوہ صحت مند ہو رہے نیں تے نہ ای موت ایہناں نوں گلے لا رہی اے سر خدا نال دعا کرو اوہ میرے سسر نوں معاف کر دیوے تے مینوں سسر نال پہلی ملاقات یادآ گئی جدوں اوہ میرے کول آیا سی۔
