سیاسی منظرنامہ تے قاتل بسنت

لكهت:سعد اللہ شاہ

جناب غیرمتوقع صورتحال لئی ہر کوئی تیار نہیں ہوندا کہ کوئی کہہ دیوے کہ یہ بھی رکھا تھا دھیان میں ہم نے‘ اوہ اچانک جے بدل جاوے جو وی ہے دنیا تے انحصار تے اعتماد تے چلدی ہے اختیار تے اقتدار تے وی نہیں ہوندا۔ خان صاحب اعتماد دا ووٹ لے چکے نیں یقینا کوئی دوجا راہ نہیں سی تے جے ہووے وی تے زیادہ سبکی دا سی۔ کیہ کیتا جاوے ایہو داغ سن جو سجا کے ہم سربزم یار چلے گئے۔ بنیاد وچ اٹ ڈنگی رکھی جاوے تے اسمان تک وی کندھ ڈنگی ای جاوے گی ایہ سعد نہیں سگوں سعدی دا قول اے تے آفاقی سچائی تے فطری دانش کسے لئی قنون فطرت تے نہیں بدل سکدی ایتھے تبدیلی نہیں چلدی نہ چنگی نہ بھیڑی۔ میں محترم دوست سلیم کوثر دے شعر سن رہیا سی تے موجودہ سیٹ اپ دے حوالے نال ایہناں شعراں نے بڑا مزا دتا کہ بڑے سنجیدہ شعراں دے معنی وی کنے دلگداز تے مٹھے ہو جاندے نیں میں مزاحیہ دا لفظ سلیم کوثر دے ڈر توں نہیں لکھیا:
میں خیال ہوں کسی اور کا مجھے سوچتا کوئی اور ہے
سر آئینہ میرا عکس ہے پس آئینہ کوئی اور ہے
میں کسی کے دست طلب میں ہوں
تو کسی کے حرف دعا میں ہوں
میں نصیب ہوں کسی اور کا مجھے مانگتا کوئی اور ہے
جدوں اخلاقیات دا دیوالیہ نکل جاوے تے انج ای ہوندا اے اک سدھی جہی گل ایہناں پٹھے لوکاں دی سمجھ وچ کیوں نہیں آئوندی۔ جو بندہ گھر وچ چوری کر سکدا اے اوہ باہر کیوں نہیں سگوں اک واری فیر مینوں سعدی یاد آئے نیں کہ چہ دزدے دلاور است کہ بکف چراغ دارد۔ چور کناں بہادر اے کہ چراغ تلی تے رکھ کے پھردا اے جی ہاں اوہی کہ چوری اُتوں سینہ زوری۔ میں گل کر رہیا سی رویاں دی کہ مشتاق احمد یوسفی دے بقول کہ فلاں کی چال سے اس کے چال چلن ٹپکتے تھے تے قبلہ ساڈے سیاستدان اپنی نشست و برخواست توں ای پچھانے جاندے نیں۔ نوٹاں دے وچکار نوٹ گن دے ہوئے کجھ وپاری تے کجھ بھیڑ بکریاں نال مشابہ۔ ایہ قوم دی بدبختی تے نامہ اعمال دے اجہے لوک ایہدے تے مسلط ہو گئے آپ طرفہ تماشا ویکھو اوہ 16 وِکائو بکرے جہناں نے شیخ حفیظ نوں پٹخ دتا تے اوہ سنگلی تڑوا کے زرداری دے پیر یاں ہتھ چٹ گئے اک واری فیر عمران خان نوں اعتماد دا ووٹ دین آئے بیٹھے۔ یعنی آشنا دے نال پھڑے جان دے بعد اپنے میاں نوں یقین دوانا کہ دِلوں اوہدے نال مخلص اے:
محبت میں نہیں ہے فرق جینے اور مرنے کا
اسی کو دیکھ کر جیتے ہیں جس کافر پہ دم نکلے
وڈے لوکاں وچ تضاد وی وڈے ای ہوندے نیں تے ایدھر تے تضادات دا اک وڈا مجموعہ چھپ چکیا اے معاف کرنا ایہ اوہو لوک نیں جو گھمدے گھماندے کدی ایدھر تے اودھر تے ایہناں دا ریموٹ کنٹرول پیسہ اے:
رائیگانی سی رائیگانی ہے
یہ مرے عہد کی کہانی ہے
کنے مزے دی گل اے کہ خرید کرن والا وپاری تے کھلے عام ساریاں دے سامنے تے تاڑیاں مار رہے نیں پر اوہ وکائو مال اجے تک لکیا ہویا اے مشکوک اے ویڈیو وچ نظر آن دے باوجود وی نوٹس وچ نہیں۔ کسے نے سوال کیتا کہ دو ویڈیو وچ لین دین تے مووی بنان والے سارے پی ٹی آئی دے کیوں؟ ایہدا جواب ایناں وی اوکھا نہیں اصل وچ ایہ ساریاں پارٹیاں دے ریلو کٹے نیں جو اک تھاں اکٹھے ہو گئے نیں:
خود کو یوسف بتا رہے ہیں وہ
کوئی آئے خرید لے ان کو
سچی گل لوکاں توں کیوں لکائی جا رہی اے کہ اعتماد دا ووٹ تے بن دا ای سی تے ایہ مل وی گیا کہ اوہناں بے ضمیر 16 ممبراں نے عمران خان نوں ووٹ دتا کہ اوہ افورڈ ای نہیں کر سکدے کہ عمران خان نہ رہن تے انتخاب ہو جان فیر اوہ کس منہ نال اپنے اپنے حلقیاں وچ ووٹ منگن جان گے کہ اجے تک اوہناں نے کوئی کم کدھرے کروایا ای نہیں۔ اجے تے اوہ پنجاہ کروڑ وی مشکوک نیں جو وعدے دی حد تک نیں۔ ایہ گل وی سٹن والی نہیں کہ چوہاں صوبیاں وچ جتھے پی ٹی آئی جتی اوتھے سب ٹھیک اے تے سیٹ دے ہارن تے الیکشن کمیشن نوں سنگھاں تے دھر لیا گیا۔
چلو ہن کوئی کم دی گل وی کر لیے کہ ہنے اک کتاب ملی اے موسم خوش رنگ ایہدے تے میں انشاء اللہ پڑھن دے بعد لکھاں گا کہ ایہ زندگی دے متھے تے لکھی ہوئی تحریر جناب شاہدصدیقی دی اے۔ ایس سرورق توں میرے اندر بسنت بہار دے سارے رنگ بھر گئے۔ پر اک دل دہلا دین والی خبر نے بڑا پریشان کر دتا کہ ساڈے اک لیکچرار آفتاب احمد بسنت دا شکار ہو گئے اک دھاتی ڈور اوہناں دے گلے تے اوس ویلے پھری جدوں اوہ موٹرسائیکل تے اپنی ڈیوٹی کرن دیال سنگھ کالج جا رہے سن۔
ابھی بہار کا نشہ لہو میں رقصاں تھا
کف خزاں نے ہر اک شے کے ہاتھ پیلے کیے
ایہ ظالم بسنت کئی جگر ٹکڑے کٹ چکی اے۔ شہبازشریف دے ہوندے ہوئے بڑی سختی سی تے شہبازشریف نے ایس حوالے نال کسے دبائو نوں قبول نہیں کیتا۔ مینوں زندگی بھر اک بچہ کدی نہیں بھُلے گا جو اپنے باپ دے نال موٹرسائیکل تے خاموش ہو گیا۔ باپ سمجھیا کہ اوہ سوں گیا اے پر اک ڈور اپنا کم کر چکی سی۔ بچے دا گلہ کٹ چکیا سی۔ ہائے ہائے اللہ انج دے امتحان توں ساریاں نوں بچائے خدا واسطے حکومت نال ایس حوالے نال ضرور تعاون کرو کہ اپنے بچیاں نوں روکو۔ ایہ ساڈی سانجھی ذمے واری اے تے ایہنوں پولیس تے نہیں چھڈیا جا سکدا۔ تسیں بہار نوں ضرور انجوائے کرو۔ باغاں وچ جائو پر قاتل بسنت نوں گل نال نہ لائو۔ ایس گل نوں چھڈ دیو کہ ایہ تہوار کہدا اے ایتھے زندگی دا مسئلہ اے۔٭٭