بُہتا رون گے دِلاں دے جانی
لكهت:وقار احمد وقار
ٹی وی آن کیتا تے خبر چل رہئی سی کہ ایم ڈی پاکستان بیت المال عون عبّاس بپّی ہوراں دا دِتّا استعفے ٰ قبول ہو گیا اے۔ دوجیاں دا پتا نئیں پَر ایس خبر مینوں کافی اداس تے افسردہ کیتا اے۔چنگے تے مثبت سوچ رکھن والے بندے قسمت نال ملدے نیں تے جناب عون عبّاس بپّی صاحب وی کجھ انج دے ای انسان نیں کہ جنہاں دے آن پاروں خوشی ہندی اے تے جان پاروں اداسی چھا جاندی اے۔ ہسدا مسکراندا پُرعزم تے پر اعتماد من کچھواں چہرہ۔گفتار وچ روانی تے لہجے وچ مٹھاس تے چھوٹے ملازماں نال شفقت تے پیار بپّی صاحب نوں دلاں اُتے حکمران بنائی رکھیا اے۔زمرد خان صاحب بعد عون عبّاس بپّی صاحب دُوجے ایم ڈی نیں جنہاں بارے میں کجھ نہ کجھ کہن تے لکھن تے دلوں مجبور ر ہئیا واں۔ایہ وی سچی گل اے کہ انج کدی وی نئیں ہندا کہ کسے نوں وی سو فیصد قبول کیتا جاوے کہ انسان ای نیں جہڑے دوجے انساناں نال حسد کردے نیں۔
ایس کائنات وچ کوئی وجود ہمیش اک تھاں موجو د نئیں ر ہ سکدا۔ہرشے بدل جاندی اے تے بدل جانی اے۔ہر لمحہ دوجے لمحات نوں رستہ دے کے رخصت ہو جاندا اے۔ساہ دی آری ہستی دے سایہ دار درخت نوں کٹدی جاندی اے۔تے آخر انسان اک حالت توں دوجی حالت ول رخصت ہو جاندا اے تے ایہ کھیڈ قیامت تک جاری و ساری اے۔
کائنات دا ذرہ ذرہ اپنا مقام بدلدا اے۔ حالتاں بدلدا اے۔حالات بدل جاندے نیں ، موسم بدل جاندے نیں تے ہر شے وچ ہمہ وقت تغیّروتبدّل رونما ہندا رہندا اے۔انسان جاندا اے کہ ایس دنیا وچ ٹھہرنا ممکن نئیں۔قیام دا ا مکان نئیں۔ایس توں پہلاں وی ہزار قافلے ایس دشتِ بے اماں توں گذرے تے اپنے بعد ویرانیاں چھڈ گئے۔ انسان نوں پتا اے کہ اوہنیں جانا ای جانا اے پَر ا و ہ جان توں پہلاں کوئی انج دا کم کرنا چاہندا اے جہڑ ا اوہدے نام دے نال منسوب رہوے۔ انسان مکان بناندا اے۔اُس وچ روشنیاں تے فانوس لاندا اے تے کجھ عرصہ بعد آپ ہنیریاں وچ گواچ جاندا اے۔
ہمہ حال نویں شان والے خالق ہر شے وچ بدلائو پیدا فرما کے کائنات نوں حُسن بخشیا اے۔ فطرت دی کتاب دا ہر ہر ورقہ ر نگ و نور دے نال منسوب اے۔زمین خوشبو دے نال مہکدی اے تے اسمان اپنیاں گردشاں وچ مست اے۔ہر پاسے جلوے ای جلوتے تے رونقاں ای رونقاں نیں۔خالق دی قدرتِ کاملہ دے مظاہر دلفریب تے دلنشین نیں۔پوری کائنات اُتے منوّر روح محیط اے۔ زندگی عروج وزوال دی داستان اے۔ایس وچ کوئی حالت ہمیشہ نئیں رہ سکدی۔کدی خوبی تے عمل دے بغیر عزّت تے عروج مل جاندا اے تے کدی خامی تے بداعمالی دے بغیر ای ذلّت ناویں لگ جاندی اے۔ایہناں حالاں دا سارا تعلق ازمائش نال جڑیا ہندا اے۔
انسان ہسدا اے ، خوش ہندا اے ،اپنی زندگی اُتے ناز کردا اے تے ایس دوران کسے نامعلوم وجہ پاروں اوہدی ہنسی اتھرو بن جاندی اے۔انسان جس حالت تے فخر کردا اے اوسے حالت تے افسوس کرن لگ پیندا اے۔مبارک دین والے تعزیت لئی آن لگ جاندے نیں۔انسان سفر دا آغاز کردا اے اوہدے ساہمنے بڑے رستے ہندے نیں جہڑا رستہ چاہوے اختیار کرے۔ اوہ ہولی ہولی رستے ترک کردا جاندا اے تے فیر آخر اوہنوں محسوس ہندا اے کہ اوہدے کول بس اِکّو ای رستہ رہ گیا اے۔ہن اوہدی زندگی لامحدود امکانات توں محدو د ممکن وچ داخل ہو جاندی اے۔ہر انسان نال ایہ ہندا اے ۔کھلیاں سڑکاں گھٹدیاں گھٹدیاں تنگ گلی تک آ جاندیاں نیں تے ایہ تنگ گلی انج دی ہندی اے کہ انسان مڑ وی نئیں سکدا،واپس نئیں جا سکدا تے آزاد انسان مجبور ہوکے رہ جاندا اے۔ہر تبدیلی ہر تغیّر پیغامِ فنا اے۔ہر رنگ عا رضی اے۔ہر اختیار بے بسی اے۔ہر حاصل محرومی اے۔ہر ہونا نہ ہونا اے۔ساتھوں کوئی عمر پچھے تے اسیں گذریا وقت گنوا دیندے آں۔جہڑی شے اپنے کول ن ئیں اوہ شمار کردے رہندے آں۔جو خرچ ہو گیا اوہ گنتی وچ رکھدے آں ۔اصل وچ ساڈی اصل عمر تے اوہ اے جہڑی اجے باقی اے ۔
ایم ڈی پاکستان بیت المال جناب عون عبّاس بپّی لئی وی اجے بڑا کجھ باقی اے بلکہ سینیٹر منتخب ہو جان بعد اوہناں دا اصل سفر ہن شروع ہویا اے۔قدم قدم تبدیلی دا سفر ۔عمران خان چوراں تے ڈاکووں بارے آکھیا سی کہ میں ایہناں نوں رواواں گا تے اج ایہ منظر ہر پاکستانی دی اکھاں ساہمنے اے کہ سوائے پٹوکے دے اپوزیشن کول کجھ وی نئیں بچیا۔عون عبّاس بپّی صاحب ہُن اوس ایوان دا عملی طور حصّہ نیں جتھے قانون سازی ہندی اے ۔اوہ خوش نیں کہ اوہناں دے خواباں دی تعبیر دا سامان پیدا ہویا اے تے اسیں پاکستان بیت المال دے ملازم رنجیدہ ، افسردہ تے دکھی آں کہ اِک مخلص تے سچّا کھرا انسان ٹر چلیا اے۔
اجے عمران خان دی ٹیم وچ سارے کھلاڑی جناب عون عبّاس بپّی ورگے نئیں کہ ایہ آغاز سی تے کپتان میدان وچ موجود پہلی ٹیم نال ای کھیڈن تے مجبور سی ۔اپنی من مرضی دی ٹیم دے نہ ہون تے کرپٹ بے ایمان سسٹم د یاں رکاوٹاں موجود رہن دے باوجود عمران خان دے علاوہ شاید ای کوئی دوجا انج ہمّت ہارے بغیر جم کے تے ڈٹ کے اینا چِر کھلوتا نظر آندا ۔ کجھ قدم مجبوراً چکنے پئے جاندے نیں جنج ادلے دا بدلا وکھان لئی سینیٹ دے الیکشن وچ ہویا پَر جیسے کو تیسا دے مصداق اپوزیشن نوں انج دا جواب دینا حکمتاً ضروری وی سی۔
امید کیتی جاندی اے عون عبّاس بپّی صاحب سینیٹ وچ اپنا کردار ادا کر کے ہر قدم تبدیلی دے خواب دی تعبیر حاصل کرن لئی سرگرمِ عمل ا یسے جذبے تے سپرٹ نال نظر آن گے جنج اوہ پاکستان بیت المال وچ دن رات متحرک رہئے نیں۔
٭٭٭
ہیں آنکھوں میں آنسو لبوں پر دُعا ہے
کہ تُو ہم سے آخر جُدا ہو رہا ہے
مچے کیوں نہ جذبات میں ہائے ہلچل
کہ دھڑکن دلوں کی تُو بن کے رہا ہے
گُذاری اصولی بڑی زندگی ہے
وہ کرکے دکھایا جو تم نے کہا ہے
رہے خُوش ہیں ہم سربراہی میں تیری
کیا تُم نے وہ سب جو ممکن ہُوا ہے
میں لکھتا بھلا آج کیونکر نہ یہ سب
محبّت کا تجھ سے رہا ماجرا ہے
تھا یہ خواب کہ ملکی سسٹم بدلتا
مگر خواب ہے کہ ادھورا پڑا ہے
یہاں سے وہاں تُو جو جانے لگا ہے
کوئی کام قدرت نے لینا بڑا ہے
