ایہہ جے ساڈی سیاست

لكهت:مظہر برلاس

پچھلے کجھ دیہاڑیاں توں سیاست دا بھیانک چہرا تہاڈے سامنے رہیا اے تسیں وِکدے ہوئے تے فیر وِکدے ہوئے اراکین نوں اعتماد دا ووٹ دیندے ہوئے ویکھیا۔ برا بھلاکہندے ہوئے‘ گالھاں‘ چنڈاں تے جتیاں دے بعد اخلاقیات دا درس دیندے ہوئے سیاستدان وی ویکھے۔ تسیں ایہ منظر وی ویکھیا کہ کس طرح سیاستدان اک دوجے نوں چور‘ لٹیرا تے ڈاکو قرار دیندے رہے۔ عہدیاں دا خیال نہ کردے ہوئے سیاستدان محلے دے آوارہ منڈیاں وانگوں نظر آئے۔ اک لمحے لئی رکو تے سوچو کہ ایہہ نیں ساڈے رہنما‘ ایہ ساڈی رہنمائی کرن گے؟ ایہ جے ساڈی سیاست‘ جہدے وچوں شرافت لبھن دی کوشش ہوندی اے۔ ایہہ نیں ساڈے جمہوری رویے‘ جہناں وچوں بہترین انتظام لبھیا جاندا اے۔ ساڈی جمہوریت دے متھے تے اک نہیں ان گنت داغ نیں ہن داغ دھبیاں سنے سیاست دا بھیانک چہرہ معاشرے دے سوہنے آنگن دا حصہ بن گیا اے۔ ایس آنگن وچ اخلاقیات کتھے‘ کنہوں لبھیے کہ سیاست نے ایہنوں بدصورت بنا دتا اے۔ لوکاں نوں اخلاقی پستی وچ سٹ کے سیاستدان جھوٹ‘ بددیانتی‘ منافت تے مار دھاڑ دا درس دے رہے نیں۔
سمجھن لئی اک ہفتہ کافی اے ایس اک ہفتے وچ ویڈیو کلپس وی سامنے آئے ایہدے کجھ کردار وی۔ وکائو مال تے خریدار وی وکھائی دتے۔ اداریاں تے تنقید‘ الزامات تے مار کٹائی وی سامنے آئی۔ کس طرح اک پچھلے وزیراعظم دے صاحبزادے لوکاں نوں ووٹ ضائع کرن دا طریقہ سمجھاندے ہوئے نظر آئے کس طرح کروڑاں روپیے وچ ضمیر وِکے تے فیر اقرار دے بعد کس طرح اک سابق وزیراعظم ایہ کہندے ہوئے وکھائی دتے کہ ووٹ منگنا ساڈا حق اے۔ وکھووکھ اسمبلیاں وچ جو خریداری ہوئی اوہ اک پاسے پر اوہ جو قومی اسمبلی وچ ہویا‘ اوہ عجیب کرشماتی کم اے۔ اک حکومتی امیدوار ہار جاندا اے تے خاتون حکومتی امیدوار جت جاندی اے۔ ایس انہونی تے مینوں دو شخصیات یاد آئیاں۔ ضمیر جعفری مرحوم لکھدے نیں ضمیر غایب‘ ضمیر حاضر نواب ڈاکٹر امبر شہزادہ نے تریہہ ورھے پہلاں سیاستداناں دی ضمیر فروش کانفرنس دا پربندھ کیتا سی۔ اوہناں دا سلوگن سی لیڈر بے ضمیر‘ عوام بے وقوف۔ تسیں ویکھیا نہیں کہ جدوں ڈاکٹر حفیظ شیخ نوں ووٹ گھٹ پئے تے اوہ ہار گئے تے حکومت دے بقول لوک وِک گئے تے اپوزیشن دے بقول لوکاں دا ضمیر جاگ گیا۔
اک پچھلے صدر تے سابق وزیراعظم دے صاحبزادے کہن لگے جمہوریت بہترین انتقام اے۔ اک سابق وزیراعظم نے ایہنوں ضمیر دی آواز قرار دتا۔ اک ہور سابق وزیراعظم نے ایہنوں موجودہ وزیراعظم تے عدم اعتماد قرار دتا۔ سابق وزیراعظم دی صاحبزادی کہن لگی وزیراعظم تے عدم اعتماد ہو گیا اے۔ ہن اوہ وزیراعظم ہائوس تے قابض نیں‘ پیسہ نہیں ن لیگ دا ٹکٹ چلیا۔ سابق صدر نے اپنے امیدوار بارے کہیا کہ اوہنوں ویہہ ووٹ گھٹ ملے۔ وزیراعظم نوں الیکشن نوں بکریاں دی منڈی قرار دتا تے الیکشن کمیشن تے تنقید کیتی۔ شفاف الیکشن نہ کروان دا شکوا کیتا۔ خاتون امیدوار دی گل تے وزیراعظم نوں اعتماد مل جاندا اے۔ ووٹ وی 174 نکل آئوندے نیں۔ وزیراعظم ایس صورتحال وچ مخمصے دا شکار ہو گئے۔ اوہناں نے قومی اسمبلی توں اعتماد دا ووٹ لین دا فیصلہ کیتا۔ ووٹنگ توں پہلاں قوم نال خطاب وی کر دتا۔ اپوزیشن نوں للکاریا‘ تنقید کیتی تے اقتدار توں بے غرضی دیاں گلاں وی کیتیاں۔
اعتماد لئی ووٹنگ ہوئی تے وزیراعظم دے حق وچ 178 ووٹ آ گئے یعنی کجھ ہور اراکین دا ضمیر جاگ گیا تے ایہ اوہو ارکان سن جو وِکے ہوئے سن۔ پتہ نہیں ایہناں اراکین نوں اخلاقیات دے کہڑے اصولاں دے تحت اک رات پہلاں معاف کر دتا گیا تے فیر پتہ نہیں کہ کہڑی اعلیٰ اخلاقی اقدار دے تحت اوہناں توں ووٹ لیا گیا۔ ووٹنگ دیہاڑے باہر وی اک تماشا لگا رہیا۔ دوہاں پاسیوں بدتمیزی ہوئی۔ اک پاسے کارکن سن تے دوجے پاسے رہنما۔ چنگی گل تے ایہہ سی کہ اپوزیشن رہنما اپنے مخالف کارکناں دے ہجوم وچ نہ جاندے۔ جا کے اشتعال انگیز گلاں نہ کردے پر ایتھے تے قومی اسمبلی دے اک بڈھے لیگی رکن گالھاں کڈھدے رہے۔ سابق وزیراعظم نے تھپڑ ماریا تے تھپڑ کھا لیا فیر اوہناں نے چھیویں جماعت دے طالب علم وانگوں گل بات کیتی کہ باہر نکلو‘ میرے سامنے آئو‘ جے ایمبولینس تے نہ گئے تے میرا ناں بدل دینا۔ کیہ ایہ گل بات اوہناں دے شایان شان سی؟ اک سابقہ وزیراعظم نے آکھیا کہ جے غنڈے بنو گے تے اسیں وڈے غنڈے بناں گے کیہ ایہ اوہناں دے شایان شان سی؟ مخالف کارکناں نوں وی برداشت دا مظاہرہ کرنا چاہیدا سی تھپڑ مارن توں پرہیز کرنا چاہیدا سی جُتیاں نہیں سن مارنیاں چاہیدیاں پر ہن سابق وزیراعظم دی صاحبزادی اداریاں تے الزامات دی بارش کردے ہوئے مخالفین نوں کہہ رہی اے کہ جے تسیں اک تھپڑ مارو گے تے اسیں دس تھپڑ ماراں گے۔
پیارے ہم وطنو!ایہہ جے ساڈی سیاست تے ایہہ نیں ساڈے سیاستدان جہناں نے پچھلے 35 ورھیاں توں معاشرے وچ نفرت‘ ظلم‘ زیادتی‘ ناانصافی تے تنزلی توں اڈ کجھ نہیں دتا۔ جہناں نے لٹ مار تے ضمیر فروشی کیتی ملک مقروض بنایا۔ ہن ایہ لوک معاشرے وچ گالھاں‘ نفرت‘ تھپڑ‘ جُتیاں تے غنڈہ گردی برپا کرنا چاہندے نیں۔ افسوس اے ایسی سیاست تے ایسی جمہوریت تے جو لوکاں دیاں خواہشاں‘ امیداں تے پانی پھیر دیوے کہ بقول سرور ارمان
اک قیامت تھی کہ رسوا سرِ بازار تھے ہم
اور پھر اس کی وہ تشویش بھی بازاری تھی