‘‘اک قوم اک منزل’’
سید صفدر رضا
23مارچ مسلمانان برصغیر دی جدوجہد آزادی دا اوہ اہم سنگ میل اے جیہڑا مسلم لیگ دے اجلاس وچ لہور دے منٹو پارک وچ رکھیا گیا۔ 22۔ مارچ 1940 دے دن اصل وچ قرار داد پیش کیتی گئی جس وچ مسلماناں لئی جداگانہ وطن دے حصول دا اعلان کیتا گیا جیہڑا شیر بنگال مولوی اے کے عبدالحق نے پیش کیتی جس دی تائید سر عبداللہ ہارون،مولانا ظفر علی خان،چوہدری خلیق الزماں،سردار اورنگ زیب،بیگم محمد علی جوہر، نواب اسمعیل نے کیتی تے جیہڑی 24 مارچ 1940 نوںمنظور ہوئی پوری قرار داد دے متن وچ اک وار وی لفظ پاکستان نہیں آیس سی۔ 1933 وچ گول میز کانفرنس دے موقع اُتے داعی پاکستان چوہدری رحمت علی نے وکھری ریاست نوں پاکستان دا ناں دتا سی پر 1940 تیکر قائدین مسلم لیگ نے قبول نہیں کیتا سی۔ پر لہور، وچ پیش ہون والی قرار داد نوں ہندو متعصب رویے دی بدولت ہندو اخبارات، ٹربیون، پرتاب، ملاپ نے ایس قرار داد نوں قرار داد پاکستان دی شہ سرخیاں وچ چھاپیا تے ہندو رہنمائواں نے وی ایہنوں قرار داد پاکستان کہیا۔ انج لہور دی قرار داد قرار داد پاکستان اکھوائی تے فیر مسلم قوم نوں نعرہ مل گیا پاکستان کا مطلب کیا لاالہ الااللہ ، بٹ کر رہے گا ہندوستان بن کے رہیگا پاکستان وغیرہ وغیرہ ۔ ہن تحریک آزادی وچ گویا روح پھونک دتی گئی تے ست سال دے مختصر عرصے بعد مملکت خداداد اسلامی جمہوریہ پاکستان دی آزادی دا سورج طلوع ہویا۔ 23 مارچ 1956 نوں ملک دا پہلا آئین اپنایا گیا پہلا اسلامی جمہوریہ جیہڑا اسلامی جمہوریہ پاکستان بنیا 1940 تا 1956 تیکر کدی ایہہ دن نہ منایا گیا کیوں جے 23 مارچ 1956 وچ پہلا آئین نافذ العمل ہویا تے سکندر مرزا گورنر جنرل توں پہلے صدر پاکستان بنے۔ 1957 نوں پہلی وار 23 مارچ نوں یوم جمہوریہ پاکستان منایا گیا۔
1958وچ مارشل لا لگ گیا تے 1959 نوں ایہہ دن نہیں منایا گیا۔ بعد وچ ایس دن نوں بطور یوم قرار داد پاکستان منایا جان لگیا۔ ایس دن اسلام آباد وچ خصوصی فوجی پریڈ دا اہتمام کیتا جاندا اے جس وچ فوجی قیادت تے صدر محترم دے علاوہ مختلف ملکاں دے سفیراں دے نال نال مختلف سربراہان مملکت وی مدعو ہوندے نیں پورے ملک وچ عام چھٹی ہوندی اے۔ جدید دفاعی ساز و سامان نمائش لئی پیش کیتا جاندا اے۔ پیراٹرو پیراشوٹ دے نال بلندی توں فضا دا سینہ چیردے ہوئے پاک دھرتی اُتے اتردے نیں۔ 2008 وچ دہشت گردی دی لہر تے سکیورٹی خدشات پاروں ایس پریڈ دا کوئی سال تیکر اہتمام نہیں ہویا پاک فوج دہشت گرداں نال نمبڑن وچ مصروف رہی۔ دہشت گرداں، ملک دشمن عناصر نوں شکست فاش دتی ایس جنگ وچ ساڈے معصوم شہری شہید ہوئے بلکہ پاک فوج دے فوجیاں تے افسراں نے اپنی جاناں دے نذرانے دے کے امن نوں بحال کیتا۔ 2015 وچ فیر توں ایس دن دیاں رونقاں بحال ہوئیاں۔ صدر محترم تے وزیراعظم مسلح افواج دے سربراہان ایس موقعے اُتے شریک ہوئے ہن جد کہ پوری دنیا کرونا وائرس نال نبردآزما اے تے وطن عزیز وی ایس وبا نال نبڑ رہیا اے۔ انج پاک فوج نے بلند حوصلیاں توں مایوسی تے کرونا وائرس توں متاثرہ بندیاں دی ہر ممکن معاونت کیتی اے تے اپنے قومی تشخص دے اہم دن نوں منان دا اہتمام کیتا اے جیہڑا یقینا زندہ قوماں دا فخر ہوندا اے۔ پوری قوم نوں وہد کرنا اے کہ ملت دی تعمیر و ترقی وچ تے ایس وبا نال لڑن لئی اسیں سارے اک آں کیوں جے اک منزل اک قوم ہون دا عملی ثبوت دین۔ 1940 وچ اک قوم وی جنہوں اک ملک درکار سی اج اک ملک تے ہے اک قوم درکار اے۔
