جیل کہانی غضب کہانی

ساڈی پولیس تے مجرم پیدا کرن وچ سرفہرست ہے ای پر جیل پولیس ایہناں مجرماں نوں مزید دادا استاد بنان وچ مصروف اے

لكهت:روہیل اکبر

سوشل میڈیا دے ذریعے سرگودھا جیل وچ قیدی دے نال جیہڑا غیر انسانی سلوک دا واقعہ پیش آیا اوہ تے ہر جیل دی کہانی بلکہ غضب کہانی اے ایسے جیل وچ مئی 2019 وچ قیدیاں نے سپرنٹنڈنٹ نوں یرغمال وی بنا لیا سی جیلاں اصلاح دا گھر ہوندیاں نیں پر بدقسمتی نال ساڈے کول ایہہ جرائم دی اوہ یونیورسٹیاں بن چکیاں نیں جتھے آ کے بے گناہ بندا وی جدوں باہر نکلدا اے تے انڈرورلڈ ڈان بن چکیا ہوندا اے۔ ساڈی پولیس تے مجرم پیدا کرن وچ سرفہرست ہے ای پر جیل پولیس ایہناں مجرماں نوں مزید دادا استاد بنان وچ مصروف اے۔ وزیراعظم عمران خان نوں پولیس دے نال نال جیل پولیس لئی وی انقلابی اقدامات کرن دی لوڑ اے ۔ میں سمجھنا واں کہ ایس ویلے فیاض الحسن چوہان دی موجودگی وچ پنجاب دی جیلاں دا ظالمانہ، منافقانہ، آمرانہ تے کرپشن زدہ نظام ہن وی تبدیل نہ ہویا تے فیر شاید کدی وی تبدیل نہ ہو سکے گا کیوں جے ایس ویلے ایہناں دے کول محکمہ داخلہ پنجاب وچ مومن علی آغا تے شفقت اللہ مشتاق جہے محنتی تے کجھ نہ کجھ بہتر کر جان دے جذبے نال سرشار بندے موجود نیں جیہڑے حساس وی نیں، ذمہ دار وی نیں تے احساس کرن والے وی نیں ایہناں جہے افسراں توں کم لینا ہن حکومت دی ذمہ داری اے زندہ دلان لہور دے شہریاں دا کجھ عرصہ توں خیال اے کہ جدوں فیاض الحسن چوہان تے شفقت اللہ مشتاق محکمہ جیل دے معاملات ویکھ رہے نیں اودوں توں کجھ نہ کجھ بہتری آنا ضرور شروع ہوئی اے۔ خاص طور تے لہور دے وسط وچ موجود ڈسٹرکٹ جیل دے اندر بند قیدیاں تے حوالاتیاں جد کہ باہر ملاقاتیاں نوں کجھ نہ کجھ بہتری دے آثار ملنا شروع ہو گئے نیں۔
ترقی یافتہ ملکاں وچ جیلاں دے اندر جیہڑی سہولتاں ہوندیاں نیں اوہ ساڈے کول جیل دے باہر شائد مڈل کلاس بندیاں نوں وی میسر نہ ہون پر ایتھے وی پیسے والے تے بااثر قیدی ایہناں توں ملدی جلدی سہولتاں زور انجوائے کررہے نیں ۔ جیلاں اصلاح دا گھر ہوندیاں نیں جتھے حکومت دے اخراجات ہوندے نیں تے ایہہ اخراجات عام غریب بندے ای پورے کردے نیں جیہڑے پیدا ہوندے ای ٹیکس دینا شروع کر دیندے نیں پر بدقسمتی نال جیل دے اندر کم کرن والے ملازمین اپنی ڈیوٹی دا حق ادا نہیں کردے ایتھے اک وارڈ توں لے کے اُتے تیکر ظالم بنیا ہویا اے تے ایہناں دا ہر کسے دے نال رویہ آمرانہ ہوندا اے جیل دے اندر بہہ کے باہر دی دنیا وچ جرائم کروان والے وی دھڑلے نال اپنا کم کر رہے نیں۔ ایہو وجہ اے ساڈی جیلاں جرائم دی نرسریاں نہیں بلکہ یونیورسٹیاں بنیاں ہوئیاں نیں لکیر دے فقیر دے اصول دے مطابق ہر جیل ملازم نے اپنی نوکری پکی کرن لئی جیل نوں اپنی کمائی دا ذریعہ ای بنایا۔ ساڈی جیلاں وچ تعینات اک وارڈ توں لے کے اُتے تیکر سیاسی، سماجی تے پیسے دی رشوت وچ ڈبے ہوئے نیں ایس ویلے پنجاب دی تقریباً 43 جیلاں وچ کوئی اک ایماندار بندا لبھن دی کوشش کرو تے ناممکن ہوئے گا۔ جیل سروس وچ آن والے سارے دے سارے بندے اپنی جوائننگ توں پہلے تیکر رشوت لینا سب توں وڈا جرم تصور کردے ہون گے مار پیٹ ایہناں دے نیڑے بوہت بُرا فعل ہوندا ہوئے گا۔ بزرگ تے خواتین ایہناں دے نیڑے بوہت زیادہ احترام ہوندا ہوئے گا تے والدین دی تربیت دی وجہ نال ایہناں نوں گالی کڈنا تے دور دی گل ایس دا خیال وی آنا گناہ سمجھدے ہون گے ۔ زنا، شراب نوشی تے جھوٹ نوں اوہ اپنے نیڑے وی نہیں آن دیندے ہون گے۔ وڈیاں نوں سلام نکیاں نال پیار تے ایہناں دی زبان دی مٹھاس پورے خاندان تے دوستاں وچ مشہور ہوندی ہوئے گی پر جویں ای اوہ ایس کرپشن زدہ نظام دا حصہ بن دے نیں اوہ فیر ایسے رنگ وچ رنگ جاندے نیں حکومت جے این جی اوز سنے عام شہریاں نوں جیل دے اندر جان تے اوتھے بند قیدیاں حوالاتیاں خاص طور تے بالاں تے خواتین تیکر رسائی دے دیوے تے انج دے حیرت ناک تے خوفناک قصے ساہمنے آن گے کہ زمین کنب جائے ایس ویلے وی جیہڑے بندے جیل وچ بند اپنے پیاریاں نال ملاقات کرن جاندے نیں ایہناں نوں بخوبی اندازہ ہوئے گا کہ جیلاں دے اندر کیہ صورتحال اے۔ جیلاں وچ بند بندیاں وچوں کسے اک توں وی جے جیل دے اندر دے ماحول دے بارے وچ پچھیا جائے تے کرپشن کہانی کھل کے ساہمنے آ جاندی اے۔ ایہہ نظام اج توں خراب نہیں بلکہ کئی دہائیاں توں انج ای چلیا آ رہیا اے۔ انج دے ملزمان وی جیلاں وچ بند نیں جیہڑے جیل وچ رہندے ہوئے اپنے سارے دفتری معاملات نمٹا رہے نیں۔ آئے دن کسے نہ کسے پیشی دے بہانے جیل توں نکل جاندے نیں تے فیر اپنے اپنے کم کردے رہندے نیں۔ ورھیاں توں وگڑے ہوئے ایس نظام وچ یک دم بہتری نہیں آ سکدی پر فیر وی کجھ نہ کجھ بہتر ضرور ہو رہیا اے۔ ہجے پنجاب حکومت نے جیل دے قیدیاں لئی بوہت چنگا اقدام کیتا اے۔ عرصہ دراز توں قیدیاں نوں اپنے بیوی بالاں دے نال ویلا لنگھان دا اک منصوبہ التوا دا شکار سی پر ہن بزدار حکومت نے ایہنوں تکمیل تیکر اپڑادتا اے۔ محکمہ داخلہ پنجاب نے قیدیاں نوں بیوی دے نال جیل دے اندر نویں تعمیر ہون والے فیملی ہومز وچ رہن دی اجازت دا نوٹیفکیشن جاری کر دتا ہن بیوی نوں قیدی خاون دے نال 3 دن تیکر رہن دی اجازت ہوئے گی۔ قیدی دا 5 سال تیکر دا بچہ وی والدین دے نال رہ سکے گا۔ فیملی ہومز وچ رہن لئی قیدی یا ایس دی بیوی نوں درخواست دینی ہوئے گی۔ متعلقہ ڈپٹی کمشنر نکاح نامے دی تصدیق توں بعد فیملی ہومز استعمال دی اجازت دیوے گا۔ فیملی ہومز صرف سزا یافتہ قیدی استعمال کرن دے مجاز ہون گے۔ قیدی فیملی ہومز نوں ہر 3 مہینے بعد استعمال کرن دا مجاز ہوئے گا۔ محکمہ داخلہ پنجاب دے مطابق قیدی نوں اپنی بیوی دے نال رہن دے نوٹیفکیشن اُتے فوری طور اُتے عملدرآمد کیتا جائے گا۔جیلاں وچ فیملی ہومز تیار نیں جس وچ اک کمرہ، کچن تے باتھ روم دی سہولت موجود اے۔ فیملی ہومز دی تعمیر 11 ورہے پہلاں شروع ہوئی جس اُتے عملدرآمد ہن شروع ہون جا رہیا اے۔ لنگھن والے 11 ورھیاں وچ صرف کجھ جیلاں وچ فیملی ہومز بن سکے۔ ہن فیصل آباد، ملتان تے لہور دی جیلاں وچ بند قیدی ایہناں فیملی ہومز وچ اپنے بیوی بچیاں دے نال 3 دن لنگھا سکن گے تے ایس لئی قیدی یا ایس دی فیملی نوں اک درخواست نکاح نامہ فارم دے نال متعلقہ ڈپٹی کمشنر نوں دینی ہوئے گی۔