بے نیازی نہیں چلے گی

لكهت:سعد اللہ شاہ

ہم تیرے زیر اثر ٹوٹ گئے
مرغ تخیل کے پر ٹوٹ گئے
آئینہ خانہ تھی تمثیل انا
کرتے کیا اہل ہنر ٹوٹ گئے
جدوں بے ہنری ہنر ٹھہرے تے کوئی کیہ کرے کدھر جاوے۔ اینی مکدر فضا اے کہ ساہ گھٹدا اے پر اساں جینا تے ایتھے ای اے۔ چاچا غالب نے کہیا سی صبح کرنا شام کا لانا ہے جوئے شیر کا۔ ہائے ہائے سوچنا واں تے ساہ گھٹدا اے کہ وزیراعظم نے قومی اسمبلی توں اعتما ددا ووٹ لے لیا تے 178 ووٹ لئے۔ پہلے توں وی دو ودھ۔ اذیت دی گل تے ایہہ وے کہ تہاڈے تے لازم اے کہ ایس گل تے یقین کرو کہ ایہ 178 بندے صادق و امین نیں تے ایہناں نے اک صادق و امین نوں اعتماد دا ووٹ دتا اے تے تہانوں ایمان لیانا ہووے گا کہ کسے نوں مجبور نہیں کیتا گیا۔ انج تے ایہ تکلف وی ضمنی اے اصل معاملہ تے ایہہ وے کہ یہی چراغ جلیں گے تو روشنی ہو گی۔ چراغ تیل نال جلدا اے تے تیل بڑا مہنگا اے۔ تہاڈا کم صرف ایہہ وے کہ تیل ویکھو تے تیل دی دھار۔ ایہ جو الفاظ وچ دانش‘ عقل‘ سمجھ‘ شعور‘ تعلیم‘ وضعداری‘ تدبر تے ایس قسم دے سارے الفاظ جو شخصیت سازی تے کردار سازی کردے نیں بالکل متروک ہو چکے نیں جو ایہناں نوں اپناندا اے دقیانوسی لگدا اے انج تے ایہ اظہار وی چلدے نیں۔ شاید کسے نوں گھٹیا کہنا وی اک گھٹیا گل اے ہائے منیرنیازی:
رنج فراق یار میں رسوا نہیں ہوا
اتنا میں چپ ہوا کہ تماشہ نہیں ہوا
مقصد کہن دا ایہ کہ چپ ای چنگی۔ بھاویں ہن سنجیدہ گل کرن دا وی چلن نہیں کہ ساڈے دوست خوب لکھیا کہ اوہ اک دو چینل تے سیاستداناں نوں گالھاں کڈھدے ویکھ رہے سن کہ اچانک اوہناں دے ضمیر نے انگڑائی لئی کہ ایہ کیہ بک بک تے شرمناک اے۔ اوہناں نے اپنے ضمیر دے ہتھوں تنگ آ کے چینل بدل کے اینیمل ورلڈ ویکھن لگ پئے ایہدے بعد کئی ہور چینلز ٹرائی کیتے پر اوہناں دا ضمیر بڑے زوردار طریقے نال اوس ویلے مجروح ہویا جدوں اوہناں دے نفس نے اوہناں نوں اوسے چینل دے حوالے کر دتا جو گالھاں کڈھ رہیا سی۔ ظاہر اے جو کجھ اسیں ویکھنا چاہنے آں اوہو کجھ چینلز وکھاندے نیں تے ایہنوں ریٹنگ کہندے نیں۔ اسیں بڑی بھاری ریٹنگ دے نال گھٹیا پن ول جا رہے آں تے کجھ لوک ایہنوں تفریح تے انٹرٹینمنٹ کہہ کے اپنے آپ نوں مطمئن کر لیندے نیں۔ ایہ سب کجھ غیرمحسوس انداز ساڈی شخصیت دا حصہ بن دا جا رہیا اے۔ دوجی گل ایہہ وے کہ ساڈی جانکاری تے علم وی ایسے قسم دا اے اشرف قدسی یاد آ گئے:
اعلان جہل کر تجھے آسودگی ملے
دانشوری تو خیر سے ہر گھر میں آ گئی
میں چاہنا واں کہ چلدے چلدے اک سنہری گل تہاڈے نال شیئر کردا جاواں یقینا اوہ گل حکمت و دانائی دا نمونا اے کہ اوہ میرے آقا حضرت محمدﷺ ہوراں دی زبان چوں نکلی۔ تسیں ذرا تدبر تے ویکھو قربان جاواں میں۔ اک صحابی نے اوائل اسلام وچ شرابی پیتی تے مسجد وچ آ گئے۔ آپؐ ہوراں صحابہ نوں کہیا کہ ایہنوں مارو۔ ظاہر اے حکم دی تعمیل ہوئی۔ فیر آپ نے کہیا ایہنوں شرم دوائو کہ حرام شے پی کے مسجد وچ آنا کناں وڈا جرم اے۔ صحابہ کرام نے اوہنوں کہیا کہ اک تے توں حرام چیز پی کے تے ایس توں وڈی گل حضور اکرمؐ ہوراں دی موجودگی وچ ایہ جسارت‘ اک صحابی دے منہ چوں نکل گیا خدا تجھے رسوا کرے یاں غارت کرے۔ حضور اکرمؐ ہوراں اوتھے صحابی نوں روک دتا کہ ایہ نہ کہوو۔ ایہنوں اوہدے جرم دی سزا مل گئی پر ایہدے لئی بددعا نہ کرو کہ جے ایہ بددعا قبول ہو گئی تے اوہ ساری عمر ایس عمل توں واپس نہیں آوے گا۔ ہن اک لمحے لئی اسیں سوچیے کہ اسیں بناں سوچے سمجھے اپنے بھراواں تے کس طرح لعن طعن کردے رہنے آں تے چھوٹی چھوٹی گل تے بددعاواں دین لگ پینے آں۔
میں اس کا بندہ بنوں گا جس کو
خدا کے بندوں سے پیار ہو گا
پارلیمنٹ توں باہر دی لڑائی پوری دنیا نے ویکھی۔ ایہ تماشا آخر کیوں لایا گیا کہ ایس ایریا وچ تے چڑی پار نہیں ماردی۔ سچ کہنا چاہیدا اے کہ ایتھے لوکاں نوں کیوں لیاندا گیا۔ ایہ ظاہر اے ایسے لئی لیاندا گیا کہ ن لیگ والیاں دا مکو ٹھپ سکن۔ بہرحال دست درازی تے خاص طور تے مریم اورنگزیب دے نال ایہ جسارت بڑا گھٹیا عمل اے۔ ایہدی جنی وی مذمت کیتی جاوے گھٹ اے تے ایہ کوئی مردانہ پن نہیں۔ ایس توں ودھ شرمناک گل پی ٹی آئی دے سرکردہ لوکاں ولوں مذمت نہ کرنا اے سگوں شہبازگل دے ٹویٹ نے تے حیران کر دتا کہ ن لیگ دے لوکاں نے اوہناں نوں اکسایا اے۔ ایہ بالکل نامناسب گل تے رویہ اے۔ احسن اقبال‘ شاہد خاقان عباسی تے مصدق ملک نوں دھکے دتے گئے تے جتی وی سٹی گئی۔ مینوں مشرف یاد آئے کہ اوہناں نے کراچی دے شرمناک واقعے تے کہیا سی کہ ایہ عوامی ردعمل اے۔ ایہدے بعد کیہ کجھ یاد آیا کہ فیرساڈے عمران خان ساڈے آئیڈیل سن کہ اوہ ایم کیو ایم دے خلاف کھڑے ہو گئے تے صورتحال ایہہ وے کہ ایم کیو ایم والے اوہناں دے نال کھڑے نیں بدلتا ہے رنگ آسماں کیسے کیسے۔
جانا پڑا رقیب کے در پر ہزار بار
اے کاش جانتا نہ تری راہگزر کو میں
پی ٹی آئی والے پہلے تے سوشل میڈیا تے ای گالھاں کڈھدے سن ہن اوہ پارلیمنٹ تک اپڑ چکے نیں۔ ایہ اوہ لوک نیں جہناں نوں مہنگائی وی نہیں ستاندی تے ماڑی صورتحال وی ایہناں لئی موافق اے۔ اوتھے کوئی کیہ کرے کہ جتھے خان صاحب دے دماغ شہزاد اکبر تے شہباز گل نیں انج ایہ اوہناں دے دماغ نہیں۔ جو سچ مچ پی ٹی آئی دے صاحبان درد تے صاحبان دل سن۔ اوہ بجھے ہوئے چراغاں وانگوں دھواں دے رہے نیں۔ آخری گل ایہ کہ خان صاحب نوں اک جھٹکا دے سانبھ لیا گیا اے کہ نیازی صاحب کدی بے نیازی وکھان د ا سوچنا وی نہیں۔ چلو چھڈو فوزیہ شیخ دا اک بہترین شعر:
ہم تو موسم کا تغیر بھی نہیں سہہ سکتے
آپ لہجے کو بدلتے ہوئے سوچا تو کریں