‘‘ریاست مدینہ تے سود خور مافیا ’’

سود دی لعنت پوری دنیا وچ ایس حد تیکر ودھ چکی اے کہ ایہہ ہن معاشرے وچ ناسور دی صورت اختیار کر چکی اے

تحریر: اکرم عامر سرگودھا

دنیا وچ ہر کم لئی محنت تے سرمایہ لانا ضروری ہوندا اے اوہ کم خواہ صنعت و حرفت نال ہوئے یا زراعت ، تجارت نال، فیر کوئی انج دا کاروبار نہیں جس وچ نفع دے نال نقصان دا خطرہ نہ ہوئے۔ پر سود دا کاروبار کرن والے ہمیشہ منافع دے حصہ دار ٹھہردے نیں تے ایہناں نوں کدی نقصان دا اندیشہ نہیں ہوندا۔ انسانی محنت جے ضائع وی ہو جائے اودوں وی سود خور سرمایہ دار اپنا حصہ (سود ) چھڈن نوں تیار نہیں ہوندا۔ ایہہ صورت حال عقل، منطق، اخلاقیات الغرض ہر اعتبار نال غیر منصفانہ اے۔
سودی نظام دا عملی اطلاق اصل وچ انسانیت اُتے سرمایہ نوں فوقیت دینا تے تسلیم کرنا اے۔ ایہو وجہ اے کہ ہن معاشرے وچ شرافت، ہمدردی، حلال تے انسان دی قیمت ڈگدی جا رہی اے۔ سود دی لعنت پوری دنیا وچ ایس حد تیکر ودھ چکی اے کہ ایہہ ہن معاشرے وچ ناسور دی صورت اختیار کر چکی اے۔ ملکی نظام چلان توں لے کے گلی محلیاں تیکر مختلف طریقیاں نال سود دے کاروبار نوں پروان چڑھایا جا رہیا اے۔ جتھے ملکی نظام سود اُتے قرض حاصل کر کے چلایا جاندا اے۔ اُوتھے گلی محلیاں وچ انج دے خواتین و افراد موجود ہوندے نیں جیہڑے مجبور تے بے کس بندیاں نوں سود اُتے رقم دے کے ایس دے بدلے وچ گارنٹی چیک، مکانات، جائیداداں دی رجسٹریاں تیکر اپنے کول گروی رکھ لیندے نیں فیر قرض حاصل کرن والا بندا جس دا تعلق یقینا غریب طبقے نال ہوندا اے پوری زندگی کمائی سود خور مافیا نوں دیندا رہندا اے تے اصل رقم توں کئی گنا ودھ وصول کرن دے باوجود سود دی مد وچ سود خور مافیاز اینی رقم متعلقہ بندے دے ذمہ کڈ دیندے نیں کہ فیر گروی رکھی جائیداد دے کے وی متاثرہ بندہ سود خوراں دا مقروض رہندا اے تے اکثر ایسے حالت وچ جہان فانی توں کوچ کر جاندا اے پر اپنے بیوی بچیاں تے اہل خانہ نوں سود خوراں دے رحم و کرم اُتے چھڈ جاندا اے۔
2020ء وچ سود خور مافیاز دے ستائے ہوئے پنجاب وچ 19، سندھ وچ 11 بلوچستان وچ دو، خیبر پختونخواہ وچ 7، گلگت بلتستان وچ 2، آزاد کشمیر وچ 4 بندیاں نے خود کشی کر کے زندگی دا خاتمہ کر کے موت نوں گلے لا لیا سی جد کہ 2021 وچ ہن تیکر ملک دے مختلف شہراں وچ سود خور مافیا دے ستائے 11 بندیاں دے خودکشی کرن دے واقعے رپورٹ ہوئے نیں جیہڑا کہ تشویشناک امر اے۔ جد کہ سود دی لعنت اے کہ ودھدی ای جا رہی اے جتھے پورے ملک دے نکے وڈے شہراں دے گلی محلیاں وچ سود خور مافیاز دی صورت اختیار کر چکے نیں اوتھے بازاراں وچ قسطاں دے سامان دی صورت وچ ایہہ کاروبار عروج اُتے اے۔ بظاہر سامان تے قسطاں اُتے دتا جاندا اے تے ایس دے عوض گارنٹی وی دتی جاندی اے پر ویلے تے قسط ادا نہ ہون دی صورت وچ جرمانہ دی مد وچ سود وصول کیتا جاندا اے۔
پنجاب، سندھ، بلوچستان، خیبر پختونخواہ، گلگت بلتستان بشمول آزاد کشمیر دے نکے وڈے شہراں وچ سائیکل توں لے کے گاڑیاں ٹرک تے الیکٹرانک دے سامان اتری توں لے کے فریج اے سی تیکر حتیٰ کہ ضروریات زندگی دی سب شیواں تہانوں سود خورمافیا آسان قسطاں اُتے فراہم کر کے جکڑ لوے گا تے فیر قسط لیٹ ہون دی صورت وچ سود وصول کردا اے۔
پاکستان سنے دنیا دے کئی ملک عالمی اداریاں تے بین الاقوامی بینکاں توں سود اُتے رقم حاصل کر کے اپنے ملکاں دا نظام زندگی چلا رہے نیں تے پورے ملک دے بینکاں وچ سودی کاروبار جاری اے قوم دی اک وڈی تعداد ایس سودی کاروبار وچ جکڑی ہوئی اے۔ ملک وچ انشورنس کمپنیاں وی سود دے کاروبار نوں پروان چڑھان وچ پیش پیش نیں۔ ایس ویلے ملک وچ 36 انشورنس کمپنیاں نیں، سب دا کاروبار سود آپس وچ بندر بانٹ کر لیندی اے تے پہلی قسط کدی صارف نوں واپس نہیں دتی جاندی حالانکہ انشورنس (بیمہ) کردے ویلے تہانوں کہیا جائے گا کہ تسیں پہلی قسط جمع کرائو ایس دے بعد تہاڈے کول اک سال دا ٹائم ہوئے گا تسیں قسط جمع کرائو تے تہانوں سال دا منافع قسط دے برابر مل جائے گا۔ انشورنس کمپنیاں دے کارکن طرح طرح دے سبز باغ وکھا کے عوام نوں بیمہ دے چکر وچ سود دی لعنت وچ مبتلا کر رہے نیں، سو ملک وچ جس کاروباری شعبہ اُتے نظر ماریے ایس وچ تہانوں بالواسطہ یا بلاواسطہ سود دا عنصر نظر آئے گا، حالانکہ اسلام وچ سود دے بارے وچ سختی نال منع فرمایا گیا اے تے ایس بارے قرآن و حدیث وچ واضح دلائل موجود نیں۔ پر قیام پاکستان توں ہن تیکر کسے حکومت نے ملک توں سود جہی لعنت نوں ختم کرن لئی کوئی موثر اقدام نہیں کیتے حالانکہ ملک وچ ایس بارے قانون موجود اے جس دی بھینٹ قانون نافذ کرن والے ادارے صرف نکے سود خوراں نوں چڑھاندے نیں تے منی لانڈرنگ ایکٹ دے تحت کاروائیاں ملک وچ نکے سود خوراں دے خلاف ہوندی اے۔ وڈے مگر مچھ جیہڑا سود خور جیہڑا مافیاز دی صورت اختیار کر چکے نیں کہ خلاف کاروائی ویکھن وچ نہیں آئی۔
2018ء وچ پی ٹی آئی دے کپتان عمران خان ملک نوں ریاست مدینہ بنان دا دعویٰ کر کے اقتدار وچ آئے سن، کپتان دے اقتدار دا ادھا دورانیہ لنگھ چکیا اے تے باقی گزرن نوں دیر نہیں لگدی تے کپتان جی لوڑ ایس امر دی اے کہ سود خور مافیاز دے خلاف ایس طرح اپریشن کیتا جائے جس طرح ملک وچ دہشت گرداں دے خلاف اپریشن کیتے جا رہے نیں کیوں جے سود خوری، تخریب کاراں تے دہشت گرداں توں زیادہ خطرناک اے۔ سود خور ملک دے غریب عوام نوں دیمک وانگوں چٹ رہے نیں۔ کپتان جی سود خورمافیا لئی قانون وچ ترمیم کر کے سزاواں ودھان دی وی لوڑ اے ۔ کپتان جی انج کرن نال بنے گا ملک ریاست مدینہ تے جے انج نہ کیتا گیا تے سود خور ملک دے غریب عوام نوں گدھ وانگوں نوچ نوچ کے کھا جان گے تے ایس دا آخرت وچ حساب آپ نوں بطور حاکم وقت دینا ہوئے گا۔ ایس لئی کپتان جی ہن ویویلا اے کہ سود دے ناسور نوں معاشرے توں جڑ توں کٹ سٹن لئی اقدامات کیتے جان تاں جے ملک ریاست مدینہ بن سکے؟