کیہ علامہ ڈاکٹر طاہرالقادری دا فیصلہ ٹھیک سی؟

لكهت: مطلوب وڑائچ

علامہ ڈاکٹر طاہرالقادری دے سیاست توں کنارا کشی دے اعلان نال دو سیاسی کزناں وچ سانجھ نوں دھکا لگا اے۔ درویش صفت مذہبی مبلغ نے بڑی خوبصورتی نال سیاست توں ریٹائرمنٹ دا اعلان کرکے سیاست دے ایواناں وچ بھچال برپا کر دتا۔
دوستو! سیاسی تجزیہ نگاری اک اوکھی سائنس اے ڈاکٹر طاہر القادری نوں انڈرایسٹی میٹ کرنا پہلی وڈی غلطی سی اصل وچ مانگے تانگے دے کھڈاری اکٹھے ہونا شروع ہو گئے تے ملکی اسٹیبلشمنٹ وی چکما کھا گئی کہ ایہ اکلا گھوڑا شاید میدان مار لوے گا۔ ایوان اقتدار تے سیاسی بھول بھلیاں وچ اکلے پن نوں محسوس کرن دے بعدپی ٹی آئی نے جدوں پچھے مڑ کے ویکھیا تے گھبراہٹ وچ ایہ بھُل گئے کہ ہن اوہناں دے نال منہاجین نہیں کھلوتے تے ایہ گل اج وی چٹے دن وانگوں واضح اے کہ جے پی اے ٹی تے پی ٹی آئی دا اتحاد برقرار رہندا تے اگلے گھٹ توں گھٹ دس ورھے تک اقتدار نوں کوئی خطرہ نہیں سی۔ اقتدار دے نشے وچ ایہ احساس ای نہیں رہیا کہ پاکستان دی پچھلی بہتر سالہ تریخ وچ جماعت اسلامی دے بعد جے کسے دے کول سٹریٹ پاور اے تے اوہ منہاج القرآن دی تنظیم کول اے۔ ہن سوال ایہ پیدا ہوندا اے کہ علامہ طاہر القادری دا سیاست توں سبکدوشی دا اعلان کس تناظر وچ سی؟ اصل وچ 2018ء دے الیکشن نتیجے مگروں علامہ طاہر القادری صاحب لئی ایہ گل واضح ہو گئی سی کہ ساڈی اسٹیبلشمنٹ دو واضح دھڑیاں وچ ونڈی جا چکی اے۔ ڈاکٹر طاہرالقادری دا اک نکام اپریشن (دھرنا پلس) وچ چکھ چکے سن تے سمجھدے سن کہ دو امیدواراں دے وچکار وچاری دلہن دا حشر کیہ ہووے گا تے آخر کار اوہو ہویا جو ڈاکٹر طاہرالقادری دی زیرک نظراں نے سمجھ لیا سی تے منہاج القرآن دی قوت تے طاقت نوں کسے بہتر موقعے دی اڈیک وچ بچا لیا ایہو وجہ اے پچھلے دیہاڑے پاکستان عوامی تحریک دی مرکزی شوریٰ دا پہلا اجلاس سدیا گیا تے بڑی چھیتی سانحہ ماڈل ٹائون دے کیس شفاف طریقے نال شروع کرن دی تحریک ملکی سطح تے شروع کیتی جاوے گی پر ایس واری سیاسی کزناں دا انتخاب سوچ سمجھ کے کیتا جاوے گا کیوں جے سیاست وچ دوبارہ غلطی دی گنجائش موجود نہیں۔
دوستو جس طرح پچھلے دیہاڑے سینٹ دے انتخابات اختتام پذیر ہوئے نیں تے جس طرح ایہناں انتخابات دوران عوامی نمائندیاں نے اپنی تذلیل دا بندوبست آپ کیتا اے تے جس طرح ایوان بالا نوں اک بکرا منڈی وانگوں پیش کیتا گیا اے کیہ اجہے عوامل دا ایہ ثابت کرنا ضروری اے کہ پاکستان دے اعلیٰ ترین ایوان وچ جو اوپن ہارس ٹریڈنگ ہوئی اوہ ایس قوم دا مزاج اے سانو ںدنیا دے دو سو توں ودھ ملکاں دے پارلیمنٹرین نظام نوں ایہ پیغام دتا اے کہ جس طرح پاکستان دے ایوان بالا دے ارکان وِکے یاں اوہناں نوں خریدیا گیا تے ایس ٹریڈنگ منڈی وچ جس طرح سیاستداناں‘ بیوروکریسی‘ سرمایہ داراں تے اسٹیبلشمنٹ نے بھرواں حصہ لیا تے ایہ سب ساڈے سماج دے متھے تے اک کلنک دا ٹیکہ اے۔ اک پاسے ملک وچ کرونا وائرس بارے لوکاں دا مزاج بالکل وکھرا اے تے حکومتی ایس او پیز دی پرواہ نہ کرنا ایس گل دا ثبوت اے کہ بائی کروڑ لوکاں نوں حکومتی وعدیاں تے حکومتی پربندھاں تے یقین نہیں تے اوہ حکومت ولوں بنائے گئے ایس او پیز نوں نہیں مندے۔ ایہو وجہ اے کہ اج سینٹ الیکشن دے نتیجے آن مگروں حکومتی رولا لوکاں نوں ایہ باور کران وچ نکام رہیا کہ پاکستان کوئی وڈے نتیجے بھگتن لئی بالکل تیار نہیں۔
ایس ویلے حالت ایہہ وے کہ اسیں پچھلے اک ورھے توں لوکاں نوں ایہ باور کراندے رہے کہ پوری دنیا وچ کرونا خطرناک نتیجے دے رہیا اے پر پاکستان دے حالات عمران خان دی گڈگورننس دے نتیجے وچ چنگے نیں پر جدوں امریکہ سنے پوری دنیا کرونا دی وباء ختم ہون دیاں حتمی تریخاں دے رہی اے بالکل اوس ویلے حکومت پاکستان بائی کروڑ لوکاں نوں کرونا دی شدید لہر آن دی خوش خبری سنا رہی اے۔ اصل وچ ایس وباء دوران پاکستان دی وزارت صحت ذہنی تے عملی طور تے تیار نہیں سی۔ ایہو وجہ اے کہ پوری دنیا دے مقابلے وچ پاکستان وچ کرونا دے کجھ لکھ ٹیسٹ ہوئے تے گھٹ ٹیسٹاں دی بنیاد تے ایہ نتیجہ کڈھ لیا گیا کہ پاکستان وچ کرونا بھارت تے دوجے ملکاں دے مقابلے وچ بہوں گھٹ اے۔ ایس طرح بلی نوں ویکھ کے کبوتر نے اکھاں بند کرن دی روش برقرار رکھی۔
دوستو! پاکستان ایس ویلے اپنی تریخ دے اوکھے دوراہے تے کھلوتا اے۔ ملک بھر وچ عجیب کشمکش تے سیاسی و سماجی افراتفری دا عالم اے تے اجہے وچ جے وطن عزیز نوں بائی کروڑ لوکاں نے آسرا نہ دتا تے ساڈیاں نسلاں اللہ نہ کرے ایہدا عبرتناک انجام بھگتن گئیاں۔