احتیاط کرو لاپرواہی نہیں

تحریر حمیداللہ بھٹی

دنیا نوں کرونا وائرس دی تیجی لہر دا ساہمنا اے جس نال شرح اموات وچ ہون والی کمی وچ دوبارہ وادھا ہون لگیا اے۔ افریقہ تے برطانیہ توں کرونا دی نویں آن والی قسم تے پہلے توں ودھ کے خطرناک اے۔ کیوں جے ہن صرف عمر رسیدہ ای متاثر نہیں ہو رہے بلکہ بالاں تیجواناں وچ وی ایس مرض دی تشخیص ہون لگی اے جس نال مرض دی خطرناکی دا اندازہ لانا مشکل نہیں۔ ایس مرض دا تریاق ہنوز سربستہ راز اے کیوں کے کرونا وائرس تیزی نال ساخت بدل رہیا اے ایس لئی ایجاد ہون والی ویکسین توں مکمل تے مستقل علاج ہو رہیا ہن تے ماہرین وی کہن لگے نیں کہ ممکن اے ہر ورہے نویں ویکسین بنانی پئے بچائو دا اکو طریقہ ماسک دا استعمال تے سماجی فاصلہ اے۔ ماسک توں لاپرواہی تے پُرہجوم تھاواں وچ جانا مرض نوں دعوت دین دے مترادف اے تاں لوڑ ایس امر دی سے کہ عوام صورتحال نوں عام نہ سمجھن تے پرہجوم تھاواں اُتے جان توں پرہیز کرن بلکہ تقریبات وچ شامل ہون دا سلسلہ کجھ عرصے لئی ختم کر دین وبا دے پیش نظر گلے ملن تے ہتھ ملان وچ احتیاط بیماری توں بچائو وچ مددگار ہو سکدی اے۔
اک پاسے ساری دنیا کرونا توں متوحش اے دوجے پاسے پاکستان وچ اج وی غیر سنجیدگی اے ایس وچ کوئی شک نہیں کہ اللہ ای رازق ، مالک تے خالق اے پر اللہ نے انسان نوں بے پناہ صلاحیتاں نال وی نوازیا اے تے غور و فکر دی دعوت وی دتی اے ۔ بیماری توں شفا وی اللہ ای دیندا اے تے بچائو دی تدبیراں دا وی حکم دتا اے ساڈے پیارے نبی ﷺ دا فرمان اے کہ جدوں کسے علاقے وچ وبا پھٹ پئے تے نہ ایس علاقے وچ جایا جائے تے نہ ای ایس علاقے توں نکلیا جائے۔ پوری دنیا وچ کرونا توں بچائو دی تدبیراں اُتے سختی نال عمل ہو رہیا اے ۔ تقریبات اُتے پابندیاں نیں پر اج وی ایس مرض دے ہون یا نہ ہون دے حوالے نال مخمصے دا شکار نیں تے من گھڑت افواہواں ودھا کے بے یقینی وچ وادھا کردے نیں۔ امریکہ، برطانیہ، روس، آسٹریلیا سنے یورپی ملک لاک ڈائون دے ذریعے مرض دے پھیلائو نوں گھٹ کر رہے نیں۔ پر وطن عزیز دی غالب اکثریت اج وی احتیاطی تدبیراں دے حوالے نال لاپرواہ اے حالانکہ صرف احتیاطی تدبیراں توں بچائو ممکن اے پر سچ ایہہ اے کہ حکومت دی ساریاں اپیلاں تے ہدایات نوں نظر انداز کیتا جا رہیا اے جس نال بیماری دی شدت وچ وادھا ہو رہیا اے ہسپتالاں وچ مریضاں دا رش اے جنہاں لئی وینٹی لیٹر تے آکسیجن دستیاب نہیں بلکہ بیڈ وی ناکافی نیں۔ صرف مریضاں وچ ای وادھا نہیں ہو رہیا بلکہ موتاں وچ وی وادھا ہو گیا اے جس دی بنا اُتے کئی ضلعیاں وچ سمارٹ لاک ڈائون لان دی نوبت آئی پر جدوں تیکر ہر بندا احتیاط نہیں کردا اودوں تیکر مرض اُتے قابو پان یا گھٹ رکھن دی کوششاں کامیاب نہیں ہو سکدیاں نیں۔
این سی او سی نے موتاں ودھن تے مثبت کیساں وچ تیزی دی رپورٹ جاری کردے ہوئے احتیاطی تدبیراں اُتے سختی نال عمل کرن دی اپیل کیتی اے حکومت نے وی شہریاں نوں احتیاط توں بچائو یقینی بنان دی تلقین کیتی اے بصورت دیگر مقدمات درج کرن دے نال قید و بند دی سزاواں دے نال جرمانے دا فیصلہ کیتا اے بلکہ لہور پولیس تے ماسک استعمال نہ کرن والیاں دے خلاف سینکڑے مقدمے درج کرن دا آغاز کر دتا اے فیر وی کرونا دی تیجی لہر نال ہون والے نقصان گھٹ نہیں ہو رہے کیوں جے گھر توں باہر جدوں تیکر ہر شہری ماسک دا استعمال کردا مرض گھٹ نہیں ہو سکدا ایتھے اک سوال پیدا ہوندا اے کہ جیہڑے شہری اپنی صحت دے حوالے نال لاپرواہی دے مرتکب نیں اوہ دیگر ذمہ داریاں خاک پورا کرن گے گھٹ توں گھٹ اپنی ذات نال تے مخلص ہونا چاہیدا اے صحت لئی حفاظتی تدبیراں توں فرار حماقت دے سوا کجھ نہیں جدوں سانوں پتہ اے کہ ملک وچ پہلے ای صحت دی ناکافی سہولتاں نیں تے موجود ہ وبا دی وجہ نال ہسپتالاں اُتے بوجھ وچ غیر معمولی وادھا ہو گیا اے فیر وی لاپرواہی و غفلت دا مظاہرہ کرنا حماقت دے سوا کجھ نہیں۔ کیہ اسیں لاپرواہی نال اپنا، اپنے پیاریاں دا تے ملک دا نقصان کرنا چاہنے آں؟ جے جواب نفی وچ اے تے سانوں احتیاطی تدبیراں اُتے عمل کرنا ہوئے گا غیر ضروری سفر، تقریبات دا خاتمہ کرنا ہوئے گا۔
پاکستان دے کول اینے وسائل نہیں کہ اوہ ہر شہری نوں علاج معالجے دی ترقی یافتہ ملکاں جہی سہولتاں فراہم کر سکے ہجے تیکر ملک دا چینی عطیے دی صورت وچ ملن والی ویکسین اُتے انحصار اے ساڈے کول تے ہر شہری نوں مفت ویکسین فراہم کرن لئی فنڈز وی نہیں عطیے وچ ملن والی ویکسین لان دی رفتار وی اینی سست اے کہ جے موجودہ رفتار وچ وادھا نہیں کیتا جاندا تے ہر شہری تیکر اپڑن وچ دہائیاں لگ سکدی اے ۔ ایس توں علاوہ لوکاں وچ ویکسین دے حوالے نال وکھرے شکوک و شبہات نیں ۔ غربت و بے روزگاری دی وجہ نال حکومت لاک ڈائون توں گریزاں اے جس نال شہریاں دی صحت نوں خطرہ اے وجہ اج وی لکھاں لوکاں دا روزانہ دی آمدن اُتے انحصار اے جے ملک لاک ڈائون ول جاندا اے تے روزانہ دی آمدن اُتے انحصار کرن والے یقینی طور اُتے شدید متاثر ہون گے جنہاں نوں ریاست کھانے فراہم نہیں کر سکدی واحد حل ذمہ دارانہ رویہ اے۔ حقیقت ایہہ وے کہ شہری کرونا نوں اہمیت نہیں دیندے تے ستم ایہہ کہ تاجر وی معمول دے کاروبار وچ وقفے اُتے تیار نہیں بازاراں تے سفری ٹرانسپورٹ وچ وی ماسک تے سماجی فاصلے دی پرواہ نہیں کیتی جاندی ایسے بنا اُتے حکومت نے ملک وچ تن ہفتیاں لئی ٹریناں بند کرن دا فیصلہ کیتا اے تعلیمی ادارے پہلے ای بند نیں۔ جلسے جلوساں اُتے وی پابندی اے بغیر ماسک مسافر بٹھان والی گڈیاں دی پکڑ دھکڑ وی جاری اے پر ایہہ اقدامات اودوں تیکر ناکافی نیں جدوں تیکر عوام ساتھ نہ دیوے ایسے لئی مکمل لاک ڈائون دیاں گلاں کیتیاں جان لگی اے بلکہ پی ایم اے نے تے وڈے شہراں وچ لاک ڈائون لان دی تجویز وی دے دتی اے تے کیہ ایہہ بہتر نہیں کہ ہر شہری بیماری توں بچن لئی احتیاطی ہدایات اُتے لازمی عمل کرے تے اپنی ذات دے نال ملک نوں محفوظ بنان دے عمل وچ حصہ لوے۔
عالمی وبا کرونا نے ہر شعبے نوں متاثر کیتا اے سیاحت تے کاروباری سرگرمیاں معطل سی ہو کے رہ گئیاں نیں کلب، ریستوران ویران ہو چکے نیں جے مجموعی نقصان دا تخمینہ لایا جائے تے محتاط اندازے دے مطابق کھرباں ڈالر اے۔ عالمی سطح اُتے ایوی ایشن جہے اک شعبے نوں ای ویکھ لوئو ایس صنعت نوں سٹھ فیصد خسارے دا ساہمنا اے تے مجموعی آمدنی وچ چار توں پنج ارب ڈالر کمی ہو گئی اے اٹھ ہزار طیارے گرائونڈ جد کہ نوے ہزار ملازمین روزگار توں ہتھ دھو چکے نیں مختلف کمپنیاں دے کول کئی درجن جہاز تیار نیں پر کوئی خریدار نہیں ایس لئی پیارے ہم وطنو، سنجیدہ ہو جائو کیوں جے غیر سنجیدگی نال صرف ساڈا ای نہیں ملک دا وی نقصان ہوئے گا حماقتاں دا مظاہرہ کرن دی بجائے ذمہ دار ہون دا ثبوت دیو، تاں ای ساڈا اپنا ساڈے پیاریاں تے ملک دا بھلا ہوئے گا بچائو صرف احتیاط وچ اے اپنی ذات، اپنے پیاریاں تے ملک لئی احتیاطی تدبیراں اُتے سختی نال عمل کرو تاں جے تسیں وی صحت مند رہو تہاڈے پیارے وی صحت مند رہن تے ملک وی صحت مند رہوے۔ غفلت و لاپرواہی نال اپنی ذات دے نال، اپنے پیاریاں تے ملک دا وی نقصان ہوئے گا۔