ساڈا دوپٹہ تے ساڈی دھوتی

لكهت: ایثار رانا

محبت انھی ضرور ہوندی اے پر اینی وی نہیں ہونی چاہیدی کہ بعد وچ مریم بی بی تے بلاول اک دوجے تے کچیچیاں وٹدے ہوئے جگتاں مارنا شروع کر دین۔ بھئی بے قدراں نال یاری لائو گے تے اوہ تڑک کرکے ٹُٹ ای جاوے گی۔ سینٹ الیکشن وچ گیلانی پی ڈی ایم دے سانجھے امیدوار سن اگے وی ایہو ہونا چاہیدا سی۔ میں تے بار بار کہنا واں بے ایمانی دے کماں وچ بے ایمانی نہیں کرنی چاہیدی پر میرا یار جو ساریاں تے بھاری اے پتہ نہیں اودے کول کہڑی سائیکل اے جہنوں مرضی بٹھا کے چکر دے دیندا اے۔ سائیکل تے بیٹھن والے نوں شروع وچ مزا آئوندا اے تے اوہ اکھاں بند کر کے کدی نوڈیرو کدی گڑھی خدابخش وچ پکاردا اے پھائی پھائی زور دی۔ اکھاں تے اودوں کھلدیاں نیں جدوں سائیکل دے چکر پورے ہوندے نیں تے تھلے لہہ کے وی اوہنوں چکر آئوندے رہندے نیں۔ پیپلزپارٹی تے مسلم لیگ (ن) وچ اتحاد انج ای اے جیویں دو سوکناں مل جان تے انتظار وچ رہن کہ کہڑی شوہر نوں پٹا کے نس جاوے۔ زرداری سیاست دے اوہ پتھر نیں جو ساریاں تے بھاری رہندے نیں اوہناں نے مسلم لیگ دے ووٹاں نال یوسف رضا گیلانی نوں جتوایا‘ فیر سنجرانی دے خلاف عدالت ٹر گئے‘ فیر سنجرانی دے ای ووٹاں نال یوسف رضا گیلانی نوں اپوزیشن لیڈر بنوا دتا۔ سیاست کہڑا جنٹلمین گیم اے‘ بھیا ایہ دھندا اے تے بڑا ای گندا اے۔
لتراں نال پٹن دی بجائے لتراں نوں چمکانا زیادہ چنگا اے۔ اوہ زرداری ہووے یاں نوازشریف دوویں کہڑے اخلاقیات دے کوہ ہمالیہ تے فلیٹاں وچ رہندے نیں۔ مفادات دی جنگ وچ کوئی اصول‘ کوئی اخلاق نہیں ہوندا۔ سنتا سنگھ بولیا اوہ دیکھو مٹیار مینوں ہس کے ویکھ رہی اے بنتا سنگھ بولیا چولا اوہ ہس کے نہیں ویکھ رہی‘ تینوں ویکھ کے ہس رہی اے۔ بھئی تسیں تے آپ کئی دہائیاں توں ایس جمہوریت نوں ویکھ کے ہس رہے او۔ جتھے ویہہ کروڑ روز اپنے زندہ رہن دا تاوان بھردے نیں بھکھے مردے نیں‘ اپنیاں اولاداں نوں اپنے سامنے بھکھ نال اڈیاں رگڑدا ویکھدے نیں تے فیر مسکرا کے اپنے قاتلاں نوں جمہوریت دے دیوتا قرار دیندے نیں اوہناں دے پچھے صدق دل نال پکاردے نیں دیکھو دیکھو کون آیا‘ آئی آئی پی ٹی آئی‘ اک زرداری سب پہ بھاری‘ گٹر دا ملیا پانی پیندے نیں۔ زہر وچ بھجی خوراک کھاندے نیں تے اپنے قائدین دے کتیاں نوں وی انج چمدے نیں جیویں مرشد دے بچیاں نوں چمیا جاندا اے۔ بھیا اسیں 20 کروڑ عوام تے ڈبل روٹی دا اوہ پہلا سلائس ہونے آں جہنوں چک کے باہر رکھ دتا جاندا اے۔ لندن توں صداواں آ رہیاں نیں کہ میرے دوست قصہ یہ کیہ ہو گیا‘ سنا ہے کہ تو بے وفا ہو گیا۔ رہی پی ڈی ایم تے بھیا ہن مریم بی بی‘ ذوالفقار بھٹو تے محترمہ بینظیر بھٹو نوں شہید کہن، اوہناں نوں سلام پیش کرن تے جنی مرضی تھو مارا کہہ لوو چڑیا تے کاں کھیت چک گئے۔
عزیزم فواد چوہدری دی تجویز ودھیا اے کہ ہن اگے ودھیا جاوے تے تصادم دی تھاں صلاح سوتر نال ملکی معاملے چلائے جان۔ بہتر ہووے گا کہ وزیر سائنس اجہی سائنس ایجاد کرن جہدے نال ایوان وزیراعظم دے بار لکھیا ہووے ضد نہ کر سوہنیا خاں تے آپ بڑا ضدی اے مٹایا جا سکے۔ سنتا سنگھ اپنی بیگم نوں بولیا میں تن گآ گیا واں تیرے منہ چوں ایہ سن دے سن دے ایہ میری کار‘ ایہ میرا بنگلہ‘ ایہ میرا بینک اکائونٹس‘ فیر بولیا ہن الماری وچ کیہ لبھ رہی ایں؟ بیگم بولی ساڈا دوپٹہ۔ بھائی جان فواد چوہدری صاحب ساڈا مشترکہ دوپٹہ نہیں ملدا تے الماری چوں کوئی دھوتی ای کڈھوا لوو جو سارے سیاستداناں نوں پوری آ جاوے۔ دھوتی دی خوبی ایہہ وے کہ دھوتی دھوتی نہ دھوتی۔
مینوں لگ رہیا اے کہ ویہہ کروڑ رانجھے مجھیاں چاردے رہ جان گے تے امریکہ آئی ایم ایف‘ سٹیٹ بینک دی ڈولی چک کے لے جان گے۔ نویں مجوزہ آرڈیننس یاں قنون سازی دے بعد پاکستان دیاں گلیاں سُنجیاں ہو جان گئیاں تے ایہدے وچ کلا گورنر سٹیٹ بینک پھرے گا۔ بنتا سنگھ ہسپتال وچ داخل سی‘ اوہدیاں دوویں لتاں ٹٹ گئیاں سن‘ کسے نے پچھیا بھیا کیویں ٹٹ گئیاں‘ اوہ بولیا یار میں روز گلی چوں گزردا اوتھے اک سنڈھا کھلوتا ویکھیا تے سوچدا جے میں تے میری دھوتی ایہدے سنگھاں وچ پھس جاوے تے کیہ ہووے گا؟ آخر اک دن میں اپنے آپ نوں اوہدے سنگھاں وچ پھسا لیا اوہنے مینوں وٹ وٹ کے ماریا تے میریاں لتاں ٹُٹ گئیاں فیر بنتا سنگھ نے اکھاں بند کر لئیاں تے لماں ساہ لے کے بولیا چلو لتاں ٹُٹ گئیاں پر روز دی ٹینشن وی مُک گئی کہ جے میری دھوتی سنڈھے دے سنگھاں وچ پھس جاوے تے کیہ ہووے گا۔ روز روز دی ٹینشن مکائی‘ دے دیو ملک نوں گروی آئی ایم ایف نوں‘ قوم دی دھوتی انج ای لیرولیر اے۔ پھسا لوو سٹیٹ بینک دے گورنر دے سنگھاں وچ‘ قوم پہلے کہڑی میک فیرے کھا رہی اے۔ کہڑا چکن چامنگ پنیر برگر کھا رہی اے۔ بھکھے بٹیرے نیں ایسے لئی لڑدے نیں‘ مر جان گے تے ٹینشن مُک جاوے گی۔٭٭