’’قائداعظم دا منشیات توں پاک پاکستان کیویں ممکن‘‘ دے حوالے نال تقریب

لکھت: عارف اے نجمی

پچھلے دیہاڑے آئی ایس ایس یو پی ((International Socity of Substance Use Professionalsپاکستان تے یوتھ فورم دی سانجھ نال منشیات توں پاک صحت مند پاکستان پروگرام دا پربندھ گورنرہائوس لہور وچ کیتا گیا۔ منشیات دے خاتمے دے حوالے نال 2020ء دی نہ صرف پلاننگ کیتی گئی سگوں مقررین نے قائداعظم دا منشیات توں پاک پاکستان کیویں ممکن اے تے اپنیاں تجویزاں وی دتیاں۔ تقریب دے مہمان خصوصی گورنرپنجاب چوہدری محمد سرور سن۔ گورنر پنجاب نے اپنے خطاب وچ آکھیا کہ تحریک انصاف دی حکومت ولوںملک پاکستان چوں منشیات دے خاتمے وچ ہر ممکن تعاون دا یقین دوایا تے طالب علماں نوں تعلیمی اداریاں وچ منشیات دے خاتمے وچ اپنا کردار ادا کرن لئی شعور نوں اجاگر کرن لئی اوہناں دی اہمیت بارے دسیا۔ منشیات توں پاک تے صحت مند پاکستان پروگرام آئی ایس ایس یو پی دے صدر بشیراحمد ناز دی زیرصدارت ہویا۔ بشیراحمد ناز نے اپنے خطاب وچ آکھیا کہ اسیں اپنی مدد آپ دے تحت سینکڑوں پروگرام آرگنائز کر چکے آں تے اگوں وی اسیں نوجوان نسل نوں منشیات توں بچان وچ اپنا کردار ادا کردے رہواں گے تقریب وچ شامل پروفیشنلز ڈاکٹرز‘ سائیکالوجسٹ‘ سوشل ورکرز تے پورے پاکستان توں آئے ہوئے طالب علماں وچ ایوارڈ ونڈے گئے۔ سابق آئی جی پنجاب چوہدری جاوید سلیمی، سیکرٹری نارکوٹکس حکومت پنجاب نے مہمان خصوصی دے طور تے شرکت کیتی۔ تقریب وچ پاکستان دے آئی ایس ایس یو پی سارے ڈائریکٹراں نے شرکت کیتی۔ منشیات دے خاتمے لئی ایس پروقار تقریب وچ میزبانی دے فرائض مشہور ٹی وی اینکر وسیم حسن اعوان نے نبھائے۔ ایس تقریب وچ طالب علماں نوں ایس نازک ایشو وچ اپنی مدد آپ دے تحت منشیات دے خاتمے لئی اپنا کردار نبھان وچ زور دتا۔ گورنر پنجاب ہائوس وچ ہون والی منشیات توں پاک صحت مند پاکستان نوں چنگے انداز وچ آرگنائز کرن تے ڈائریکٹر آئی یو ایس ایس پی صائمہ اصغر نے بشیراحمد ناز دی خدمات نوں سراہیا۔ تقریب دے آخر وچ گورنر پنجاب چوہدری محمد سرور نے پاکستان وچ منشیات دے حوالے نال کم کرن والیاں دی خدمات نوں سراہیا تے ایوارڈ ونڈے۔ آخر وچ فائونڈر یوتھ فورم محمد اسلم نے تقریب وچ شامل شرکاء دا شکریہ ادا کیتا۔