‘‘یہ چور ہیں، یہ میری کار ہے’’

طیبہ ضیاء چیمہ

ریپ دا واقعہ ہوئے یا کسے خاتون نوں ہراساں کرن دی خبر پاکستانی میڈیا تے مغربی ایجنڈا اُتے فائز طبقہ پاکستان نوں بدنام کرن دا کوئی موقع ہتھ توں جان نہیں دیندے پر امریکہ جہے مہذب ملک وچ دو کُڑیاں اک پاکستانی بزرگ نوں گڈی سنے ہراساں کرن اغوا کرن تے فیر قتل وی کر دین۔ امریکہ فیر وی مہذب تے ترقی یافتہ ای اکوائے گا کیوں جے ساری جہالت ظلم زیادتی تے پاکستان جہے تھرڈ ورڈ غریب ملک دی پیشانی اُتے لکھ دتی گئی اے؟ کار کھون دی اک واردات دے دوران جاں بحق ہون والے پاکستانی ڈرائیور محمد انور دے قتل دا واقعہ امریکی دارالحکوت واشنگٹن ڈی سی وچ پچھلے ہفتے ایس ویلے پیش آیا سی جدوں دو کم عمر مسلح کُڑیاں نے ایہناں توں گڈی کھون دی کوشش کیتی سی۔ ایہہ واقعہ واشنگٹن ڈی سی دی وین اسٹریٹ اُتے 23 مارچ نوں پیش آیا سی۔کار کھون دی کوشش دے دوران 66 سالہ بندا محمد انور اُتے اسٹن گن نال حملہ کیتا گیا۔ بعد وچ اوہ ہلاک ہو گئے سن۔ پولیس نے واقعے دے بعد دو کم عمر کُڑیاں نوں گرفتار کر لیا سی جنہاں اُتے قتل تے کار کھون دا الزام عائد کیتا گیا اے۔ پولیس رپورٹ دے مطابق دونواں کُڑیاں دیاں عمراں 13 تے 15 ورہے نیں۔ واضح رہوے کہ ویب سائٹ ٹوئٹر اُتے اک ویڈیو وائرل ہوئی سی جس وچ محمد انور نوں کار وچ موجود بندیاں نال بحث کردے ہوئے وکھایا جا سکدا اے۔ محمد انور نوں ایہہ کہندے ہوئے ہوئے سنیا جا سکدا اے کہ ’’یہ چور ہیں، یہ میری کار ہے۔‘‘
ٹوئٹر اُتے وائرل ویڈیو وچ ویکھیا گیا اے کہ کار وچ موجود دو مشتبہ کُڑیاں نے گڈی نوں تیزی نال بھگایا، ایس دوران محمد انور گڈی نال لٹکے رہے، جس دے بعد گڈی اگے جاکے ٹکران دے بعد الٹ گئی۔
ویڈیو دے مطابق گڈی الٹن دے بعد دونواں کُڑیاں ایس وچوں باہر نکلیاں تے محمد انور سڑک دے اک کنارے زخمی حالت وچ پئے رہے۔ پولیس دا کہنا سی کہ محمد انور نوں نیڑے واقع ہسپتال لے جایا گیا سی جتھے اوہ جانبر نہ ہو سکے۔ ایم پی ڈی دے ترجمان نے نیوز ویک نوں دسیا کہ ایہناں دا ڈیپارٹمنٹ ٹوئٹر اُتے شیئر ہون والی ویڈیو توں باخبر اے۔ پر ایس اُتے مزید کجھ نہیں کہہ سکدے۔ کار کھون دی ایس واردات وچ ڈرائیور دی موت دے بعد ایہناں دی آخری رسومات تے اہل خانہ دی مدد لئی گوفنڈمی نامی ویب سائٹ اُتے عطیات جمع کرن دی اک مہم شروع کیتی گئی۔ ’’گو فنڈ می‘‘ پیج اُتے محمد انور دے بارے وچ لکھیا گیا اے کہ ایہناں دا تعلق ریاست ورجینیا دے علاقے اسپرنگ فیلڈ نال سی۔ ایس دے علاوہ ایہناں نوں اک محبت کرن والا شوہر، باپ، دادا، انکل تے دوست قرار دتا گیا اے۔ محمد انور اک محنتی پاکستانی پناہ گزین سن۔ جیہڑے اپنی تے اہل خانہ دی بہتری زندگی لئی امریکہ آئے سن تے اوبر ایٹس دے ڈیلیوی ڈرائیور دے طور اُتے کم کردے سن۔ جے ایہہ واقعہ کسے گورے دے نال پیش آندا تے بریکنگ نیوز بن دی۔ پاکستانی مرد دنیا وچ جتھے وی ظلم دی بھینٹ چڑھے خبر نہیں ہوندی۔ پاکستانی مرد نوں ظالم ثابت کرن وچ آپ پاکستانی میڈیا تے مغربی فنڈڈ طبقہ پیش پیش اے تے اغیار نال ہمدردی دی توقع کیوں کر کیتی جا سکدی اے؟