کلثوم تے مریم!
حنا پرویز بٹ
تبدیلی لیان دا وعدہ کرن والیاں نے پہلے سو دن ٹرک دی بتی وکھائی فیر کہیا اجے اسیں سکھ رہے آں‘ بعد وچ کہیا کہ ملک ٹریک تے چڑھا دتا اے یعنی اوہدی سمت ٹھیک کر دتی اے۔ ایہدے بعد دور دی کوڑی لے کے آئے کہ اجے نہیں‘ پنج ورھے بعد ساڈا احتساب کرنا بن دا اے۔ سجرے ارشادات وچ تے ایہ نظریہ دیوانہ پیش کیتا جا رہیا اے کہ پنج ورھے دی ٹرم شارٹ ٹرم ہوندی اے ایس چھوٹی ٹرم وچ حکومتی پالیسیاں دا اثر نہیں ہوندا۔ حکومت دا دورانیہ ودھانا تے نظام بدلنا ہووے گا تے ایہدے بعد وی تبدیلی نہ لیا سکے تے فیر ایہ کہن گے آئی ایم سوری!۔
ملک نہ ہو گیا کوئی اجہی سوغات ہو گئی جہنوں انج ای منہ چک کے کسے دے حوالے کر دتا‘ ایہدے تے سہاگہ ایہہ وے کہ اینی کھلی آزادی دے دتی کہ من پسند بندیاں نوں ڈرائیونگ سیٹ تے بٹھائو تے ٹیسٹ کردے رہوو۔ جدوں مطلوبہ نتیجے نہ آن تے اوہنوں ہٹا کے نواں لے آئو‘ ایسے پالیسی تے چلدے ہوئے جو معاشی‘ سیاسی تے اخلاقی نقصان پچھلے تن ورھیاں وچ پاکستان دا ہویا اے اوہدا حساب تے جواب کون لوے گا تے کہدے کہدے توں لوے گا؟ جدوں وی ویکھو‘ جدوں وی سنو ہر ویلے اک ای گردان جاری اے سب کجھ پچھلی حکومت دا کیتا دھریا اے‘ لوک اج پچھنا شروع ہو گئے نیں کہ کیہ نوازشریف دے چار فلیٹاں تے ایناں زیادہ خرچ ہویا سی کہ پاکستان دا خزانہ ای خالی ہو گیا سی تے لوک بھکھے ننگے رہ گئے؟ ایہو بیانیہ گھڑیا گیا سی نا؟ تے فیر نوازشریف نوں حکومت توں بے دخل کرکے دو نہیں اک پاکستان دا نعرہ لایا گیا؟۔
اج حکومت دا تریجا ورھا ختم ہون نوں اے عوام کناں نوں ہتھ لا چکی اے نام نہاد 22سالہ جدوجہد دے نعرے لان والیاں نے شاید ایہ سوچ کے اینی تسلسل نال جھوٹ بولیا جیویں عوام انھے‘ ڈورے تے گونگے ہون اوہ شاید ایہ سوچ رہے نیں کہ لوکاں دی یادداشت کمزور ہوندی اے اوہناں نوں دس دیواں کہ عوام دی یادداشت کمزور نہیں ہوندی سگوں اوہ حکومتی غلطیاں نظرانداز کردی اے تے اوہ وی صرف اوس ویلے جدوں روزگار تے ملازمتاں محفوظ ہوندیاں نیں تے سارے جان دے نیں کہ موجودہ دور وچ کنیاں دے روزگار نوں تحفظ ملیا تے کنے اپنے روزگار توں محروم ہو گئے۔
پاکستان دی ستر سالہ تریخ وچ لوکاں تے کدی ایناں بھیڑا ویلا نہیں آیا کہ اوہ ہر دن اک نویں ٹیکس وچ جکڑے جا رہے ہون‘ مجال اے کہ ٹھنڈی ہوا دا کوئی اک وی جھونکا آیا ہووے۔ حکومت نے 140 ارب روپیے دے ہور ٹیکس لا کے اپنے تابوت وچ اک ہور کیل آپ ای ٹھوک لیا اے بجلی فی یونٹ اک روپیہ چالھی پیسے ودھا دتی گئی اے۔ دو ورھیاں وچ ساڑھے پنج روپیے فی یونٹ بجلی ہور مہنگی ہو جاوے گی تے فی یونٹ ویہہ روپیے دی حد نوں کراس کر جاوے گی ایہدے بعد ہر گھر‘ ہر محلے چوں چیکاں‘ ہاواں تے بددعاواں نکلن گئیاں تے کسے دا ایہ وعدا پورا ہو جاوے گا کہ میں ایہناں نوں رلاواں گا‘ میں ایہناں نوں تکلیف اپڑاواں گا‘ ایہناں نوں تکلیف اپڑے گی۔ ایہ لوکاں نوں مکان بنا کے کیہ دین گے ایہ تے بلاامتیاز عوام دے چلدے کاروبار ای بند کروا رہے نیں لکھاں بندے بیروزگار ہو چکے نیں۔ ہزاراں کارخانے بند ہو چکے نیں‘ کم منگن والے ہتھ بھیک منگن تے مجبور ہو گئے نیں لوکاں توں سستی خوراک کھوہ لئی گئی اے علاج ایناں مہنگا کر دتا گیا اے کہ لوک بیمار ہون تے ڈرنا شروع ہو گئے نیں میں کئی واری گروسری سٹورز دے باہر روندے‘ بلکدے بڈھے سفید پوشاں نوں شوگر دی دوا‘ بلڈ پریشر دی دوا لئی منتاں کردے ویکھیا‘ میری تے روح کنب گئی کہ مہنگائی نے کس طرح لوکاں نوں نویں عذاب وچ مبتلا کر دتا اے اک ماں تے نوازشریف دی فوٹو چکے بازار وچ کھلوتی منتاں کر رہی سی کہ ساڈا وزیراعظم لوٹا دیو‘ ہن تے بچیاں لئی ددھ خریدنا وی اوکھا ہو گیا اے۔
کیہ کسے ملک وچ انج ہوندا اے کہ کوئی ملازم آئی ایم ایف توں کئی ورھے دی چھٹی لے کے آوے تے اوس ملک دا مرکزی بینک اوہدے حوالے کر دتا جاوے اوہنوں حدود و قیود توں بالاتر بنان لئی قنونی تحفظ وی دے دتا جاوے اجیہا بندہ مدت پوری ہون دے بعد جدھروں آیا اوتھے پرت جاوے گا پر اوہدے مسلط کردہ ظلمتاں دے سیلاب دا پانی جدوں اتردا اے تے پچھے ایناں گند چھڈ جاندا اے جہنوں صاف کرنا اوکھا ہو جاندا اے۔ معاشی سطح تے جان بجھ کے ساڈے وطن دے نال جو ظلم کیتا جا رہیا اے اوہدے نتیجے کئی ورھے تک لوکاں نوں بھگتنے پین گے۔ تہانوں یاد ہووے گا کدی دن رات چینلاں تے اوہناں دے ترانے سن کے تہاڈے کن پک جاندے سن بہت ساریاں نے تے ترانے دی رنگ ٹون وی ٹون وچ ڈائون لوڈ کیتی‘ تسیں غور کیتا ہن تے اوہناں دے اپنے جلسیاں وچ اوہناں دے اپنے ای ترانے وجنا بند ہو گئے نیں جی بالکل‘ لوکاں نوں مصنوعی تبدیلی توں اینی نفرت ہو گئی اے کہ ہن اوہ اوہدے نام لین والے تے گردان کرن والیاں دا مکو ٹھپن لئی تیار نیں۔ اوہ ویلا وی آئون والا اے جدوں کہیا جاوے گا اک تھی ایسی پارٹی جنہے پورے انصاف نال پاکستان دے لوکاں دا دیوالیہ کڈھیا سی۔
مورخ ضرور لکھے گا کہ پی ڈی ایم وچ لیگی ترجمانی دا فریضہ بہادر کلثوم نواز دی بہادر دھی مریم نواز نے جس کمال تدبر نال ادا کیتا اوہدی کوئی دوجی مثال نہیں ملدی کجھ بندیاں دا کہنا اے کہ جرأت وچ مریم تے اپنی والدہ دی ہو بہو کاپی اے اوہنے تے کلثوم بیگم دی جدوجہد نوں چار چن لا دتے نیں پچھلے دو ورھیاں وچ جس طرح مریم نواز نے اپنے سیاسی بیانیے نوں منوایا اے اوہ گھٹ ای کسے دے نصیب وچ آیا ہووے گا ہن تے ہر پاسیوں اک ای آواز اٹھ رہی اے۔ She is a crowd puller indeed.
