جدوں نواز شریف میرے ساہمنے سلیکٹڈ بنے

جمہوریت دے سب توں وڈے چیمپئن ذوالفقار علی بھٹو چیف مارشل لا ایڈمنسٹریٹر فیلڈ مارشل ایوب خاں دے پا ک ہتھوں سلیکٹڈ ہوئے

لكهت:اسد اللہ غالب

مریم نواز نے یوسف رضا گیلانی نوں طعنہ دتا اے کہ اوہناں نے سلیکٹڈ ای بننا سی تے ایس دا سبق اوہ عمران خان توں لیندے، ایس اُتے بلاو ل بھٹو نے گرہ لائی اے کہ سلیکٹڈ دا لفظ اوہناں نے ایجاد کیتا سی ایس لئی اوہ ای بہتر جان دے نیں ایہنوں کس اُتے چسپاں کرنا اے۔ دونویں ای جمعہ جمعہ اٹھ دن دے سیاستدان نیں، میں ایہناں دونواں نوں ایہناں دے آباواجداد دی تاریخ یاد دلوانا چاہنا واں۔
جمہوریت دے سب توں وڈے چیمپئن ذوالفقار علی بھٹو چیف مارشل لا ایڈمنسٹریٹر فیلڈ مارشل ایوب خاں دے پا ک ہتھوں سلیکٹڈ ہوئے۔ ایوب خان دی نظر کرم نال اوہ فاقی کابینہ دا حصہ بنے۔ سلیکٹڈ بنن دی خوشی وچ اوہناں نے ایوب خان نوں مشورہ دتا کہ سرکاری کنونشن لیگ نوں ہر ضلعے دی سطح اُتے منظم کیتا جائے تے ڈی سی نوں ایس دا سربراہ بنا دتا جائے۔ ایسے سلیکٹڈ نے صدارتی الیکشن وچ مادر ملت محترمہ فاطمہ جناح دے مقابلے وچ ایوب خان دے چیف پولنگ ایجنٹ دا کردار ادا کیتا۔ 1970 وچ آرمی چیف جنرل گل حسن نے ایہناں نوں فیر سلیکٹڈ کیتا تے سویلین چیف مارشل لاء اینڈ ایڈمنسٹریٹر بنا دتا۔ ایس عہدے دی دنیا وچ کوئی مثال نہیں ملدی بعد وچ ایس سلیکٹڈ نے اپنے آرمی چیف جنرل گل حسن نوں لہور توں اغواء کروایا تے ایہناں توں گن پوائنٹ اُتے استعفیٰ لیا۔
جنرل ضیاء الحق نے نامزد تے سلیکٹڈ ارکان اُتےمشتمل مجلس شوریٰ بنائی تے ایس دی سربراہی لئی خواجہ آصف دے والد گرامی خواجہ محمد صفدر سلیکٹڈ ہوئے۔ جنرل ضیاء دی کابینہ وچ اک سلیکٹڈ وزیر راجہ ظفر الحق وی سن جیہڑے اج ن لیگ دے بوہت وڈے لیڈر سمجھے جاندے نیں۔
ضیاء دور وچ جنرل غلام جیلانی لہور وچ گورنر سن۔ اوہناں نے صوبائی کابینہ بنائی تے میاں محمد نواز شریف نوں وزارت خزانہ لئی سلیکٹڈ کیتا۔ جنرل ضیاء نے اپنے لئی اک ریفرڈم دا ڈھونگ رچایا۔ ایس لئی اوہناں نے باغ جناح لہور وچ اک جلسہ کیتا جس وچ سلیکٹڈ وزیر خزانہ نواز شریف نے تجویز پیش کیتی کہ جنرل ضیاء الحق وردی وچ تاحیات حکومت کرن، اللہ نے ایہناں دی دعا قبول کر لئی۔
پچاسی وچ غیر جماعتی الیکشن ہوئے تے میں اپنے اخبار دے الیکشن سیل دے سربراہ دے طور اُتے ایس دی کوریج کر رہیا سی، میری خصوصی ڈیوٹی ایہہ سی کہ ایس الیکشن دی کوریج کراں تے وزارت اعلیٰ دے چھ ست امیدواراں دی سرگرمیاں دی خبراں فراہم کرنا وی میری دفتری ذمہ داریاں وچ شامل سی۔ اک رات 11 وجے میاں نواز شریف نے مینوں فون کیتا کہ میں تہاڈے دفتر دے باہر آ رہیا واں تسیں تھلے لہہ کے میری گل سنو۔ میں تھلے آیا نواز شریف نے کار توں اتر کے میرے کن وچ کہیا کہ اوہ ایئر پورٹ جا رہے نیں تے واپسی اُتے اوہ مینوں کوئی خوشخبری سنان گے۔ میاں نواز شریف دا ڈرائیور میرا گہرا دوست بن چکیا سی کیوں جے روز ملدے ساں۔ میں ایس توں پچھیا تہاڈے پچھے خالی گڈی ایئر پورٹ کیوں جا رہی اے۔ میاں نواز شریف مینوں تاکید کر گئے سن کہ میں اخبار دے پہلے صفحے اُتے چار پنج سطراں دی تھاں رکھوا لواں تاں جے ایہناں دے وزیراعلیٰ دے طور سلیکٹڈ ہون دی خبر چھاپی جا سکے۔
میں سمجھ گیا کہ اسلام آباد توں آن والے اعلیٰ فوجی افسر جنرل ضیاء الحق دا حتمی فیصلہ لے کے آ رہے نیں بہر الحال میں نیوز ایڈیٹر نوں کہہ کے اخبار دے صفحہ اول توں تھوڑی جہی تھاں رکھوا لئی تے میاں نواز شریف دے اگلے فون دا انتظار کرن لگیا۔ ساڑھے بارہ وجے میاں نواز شریف نے مینوں کال کیتی کہ تسیں ریڈیو پاکستان توں ملحقہ اتفاق گروپ دے دفتر وچ آ جائو۔ میں اوتھے اپڑیا تے پورا دفتر ہنیرے دی لپیٹ وچ سی ، صرف اک کمرے وچ تھوڑی جہی روشنی سی جتھے میاں نواز شریف اک کرسی اُتے براجمان سن۔ میں اک نظر ایہناں دے چہرے اُتے پائی ایہناں دا متھا غیر معمولی طور اُتے چمک رہیا سی تے ایہناں دا چہرہ خوشی نال تمتما رہیا سی۔ اوہ کرسی توں اٹھے تے میرے گلے لگ گئے۔ ایہناں دے منہ توں بے ساختہ نکلیا کہ مبارک ہوئے فیصلہ میرے حق وچ ہو گیا اے۔ ایس طرح میاں نواز شریف پنجاب دے وزیراعلیٰ دے طور اُتے سلیکٹڈ ہوئے۔ میں مختصر جہی خبر اخبار وچ دے دتی۔ میاں نواز شریف دے سلیکٹڈ ہون دا سلسلہ ایتھے ختم نہیں ہوندا۔ آئی ایس آئی دے سربراہ جنرل حمید گل نے آئی جے آئی دی تشکیل کیتی تے میاں نواز شریف نوں ایس دا سربراہ بنا دتا انج میاں نواز شریف تیجی وار سلیکٹڈ ٹھہرے۔
پاکستان وچ سلیکٹڈ ہون والیاں دی لسٹ بوہت لمبی اے۔ محمد علی بوگرہ، معین قریشی تے شوکت عزیز بیرون ملک توں سلیکٹڈ ہو کے ساڈے حکمران بنے جد کہ ملک معراج خالد ،غلام مصطفی جتوئی ،میر ظفراللہ خان جمالی،چودھری شجاعت حسین، نجم سیٹھی،ڈاکٹر حسن عسکری دے سینیاں اُتے وی سلیکٹڈ ہون دا تغمہ سجیا۔ 1988 دے بعد ہن تیکر جنہی وی نگران حکومتاں بنیاں اوہ وفاقی ہون یا صوبائی، سب دی سب سلیکٹڈ سن، تے ایہناں دے سلیکٹڈ ہون دا طعنہ کسے نوں وی نہیں ملیا، سلیکٹڈ دا لفظ بلاول بھٹو دی زبان اُتے قومی اسمبلی دی اک تقریر وچ آیا تے ایس لفظ نوں سپیکر قومی اسمبلی نے حذف کرن دا حکم دے دتا۔ کہن نوں اسمبلی دے ریکارڈ توں ایہہ لفظ حذف کر دتا گیا پر یار لوکاں نے ایس نوں چھیڑ بنا لیا تے ایس دا استعمال ہن تیکر جاری اے۔ ایس لفظ دا آخری نشانہ یوسف رضا گیلانی بنے تے اوہ وی مریم نواز دے ہتھوں جنہاں دے اپنے والد گرامی کئی وار سلیکٹڈ بنے تے ایہناں دے سلیکٹڈ ہون وچ کسے نوں شبہ وی نہیں۔ یوسف رضا گیلانی حقیقت وچ اک سیاسی لیڈر نیں اوہ قومی اسمبلی دے سپیکر دے منصب اُتے فائز رہے نیں تے بطور وزیراعظم اوہناں نے سپریم کورٹ دے غیر آئینی حکم اُتے اپنے صدر دے خلاف سوئس حکومت نوں خط لکھن توں انکار کر دتا سی، ایس جرم دی پاداش وچ سپریم کورٹ نے ایہناں نوں وزیراعظم دے عہدے توں معذول کر دتا۔ میں ایس ویلے وی کالم لکھیا سی کہ یوسف رضا گیلانی آئین دے پاسدار وزیراعظم نیں تے ہن وی جے اوہ سینٹ وچ اپوزیشن لیڈر بنے نیں تے اوہناں نے آئین دی حدود توں باہر کوئی پیر نہیں رکھیا۔ آئین ایہناں نوں اپنی اکثریت شوکرن دا حق دیندا اے تے ایس لئی اوہناں نے آئینی رستہ ای اختیار کیتا اے۔
یوسف رضا گیلانی نال میری پہلی ملاقات پچاسی وچ مخدوم زادہ حسن محومد دے گھر اک ضیافت وچ ہوئی سی۔ میں ایہناں نال سوال کیتا سی، ایس ویلے ایہہ خبر گردش وچ اے کہ نومنتخب ارکان نوں ضلع کونسلاں دا منصب چھڈنا پئے گا۔ اوہناں نے تنک کے جواب دتا سی کہ میں لوکاں دے ووٹاں نال ملتان ضلع کونسل دا چیئر مین بنیا سی تے ہن اسمبلی دا رکن وی ایہناں لوکاں دے ووٹ نال بنیا واں۔ مینوں کوئی ایہناں دونواں عہدیاں توں وکھرا نہیں کر سکدا۔ ایہہ ا اصولی گل سی تے میں سمجھنا واں کہ اصولاں اُتے کار بند رہن والا بندا سینیٹ وچ اپوزیشن لیڈر دا منصب حاصل کرن لئی کوئی غیر اصولی رستہ اختیار نہیں کر سکدا۔ مریم نواز نوں لفظ سلیکٹڈ بوہت پسند اے تے براہ کرم اوہ ایہنوں اپنے والد گرامی تیکر محدود رکھن جیہڑا میری نظراں دے ساہمنے پنجاب دے سلیکٹڈ وزیراعلیٰ بنے سن۔مشرف دو ر وچ نواز شریف نوں قید و بند توں نجات ملی تے صرف ایس لئی کہ اوہ سعودی عرب دے سلیکٹڈ سن۔ ہجے پلیٹ لیٹس دا ڈرامہ رچا کے اوہ فیر جان بچا کے لندن اپڑ گئے پر پتہ نہیں اوہ ایس وار کس دے سلیکٹڈ سن۔