حضرت لعل سخی شہباز قلندرؒ….!

لكهت:سید عباس کاظمی

قلندرؒترکی زبان دا لفظ اے ایس دا مطلب انج دا بندا جیہڑا دنیا نوں چھڈ کے صرف رب دا ہو جاوے جیہڑی قلندرؒ دی مرضی اوہ رب دی مرضی۔ جیہڑے لوک حضرت امام حسینؑ دے روضے دی زیارت کر چکے نیں اوہ جانڑدے نیں کہ اوس وچ حضرت ابراہیم کبیر الدین جوابیؒ (مجاب) دی قبر مبارک وی اے.مجابؒ دا معنی جس نوں جواب اوندا ہووے ابراہیم مجابؒ سلام کردے تے امام حسینؑ جواب دِندے سن حضرت ابرہیم مجابؒ امام حسینؑ دے روضے اُتے بہوں آندے جاندے سن تے کدے ٹک وی پیندے سن. اوہ شادی نہیں سی کرنا چاہندے بلکے روضے اُتے ای حیاتی ہنڈانا چاہندے سی. ابراہیم مجابؒ امام جعفر صادقؑ دے پڑپوترے تے امام حسینؑ دی ستویں نسل وچوں سن. خواب اچ امام حسینؑ تشریف لیائے تے آکھیا ابرہیمؒ توں مروند ٹُر جا اوتھوں دے بادشاہ دی دھی نال ویاہ کر لے اوہ تینوں اپنی دھی رانی دا رشتا دے دیوے گا. جس وچوں اسیں تینوں اک امانت رب دا شہبازؒ جیہڑا محمدﷺ نے سانوں دتا تیرے سپرد کر دیواں گے. حکم نوں من کے مروند آ گئے شادی کیتی تے پتر جمیا رویتاں اچ تقرار اے کہ کدرے 538 تے کدرے 573 ہجری 1178 عیسوی نوں ایران دے صوبے آذربائجان دے علاقے مروند اچ پیدایش ویلے منوں دا رنگ رتّا لال جیویں کہ یاقوت ہووے ماں دے منوں وچوں نکلیا لعلؒ، باپو دے منوں وچوں نکلیا شہبازؒ، ناں کڈھیا گیا تے شاہ حسینؒ نانے آکھیا ایس ناں دے نال قتل ہو جاوے گا. ایس لئی ناں رکھیا سید عثمانؒ. امام حسینؑ دا دتا تحفا سی تے لوکائی نے حسینیؑ لعل شہباز قلندرؒ دی صدا لائی. حسینؑ دی عطا تے خصوصیت تے ہونی سی علم اسمانی عطا ہورہیا سی مدرسے وچ دل نہیں سی لگدا اک وار مدرسے دے سنگی بالاں دیاں کتاباں حوض اچ سُٹ دتیاں تے بال رون لگ پئے تے ہتھ پا کے کتاباں کڈھ دتیاں اوہ وی بلکل سُکیاں. ست ورے دی عمر اچ قرآن پاک حفظ کر لیا استاد پریشان سن کہ مدرسے وچ اک لفظ نہیں پڑھدا قرآن کِویں حفظ کر لیا سُو. شہباز قلندرؒ دے سنگی نے دسیا کہ ایہ ببول دے کنڈیاں اُتے ٹردا اے تے پتا نہیں کی ویکھدا اے کہ یاحسینؑ یاحسینؑ دی اُچی واج لاؤندا اے. پیراں چوں رت نکلدا سی بچپن اچ ایہ کجھ دِسدا اے جوانی وچ کی کی ویکھدا ہووے گا. شہباز قلندرؒ وی اپنے باپو دی طرحاں روضا امام حسینؑ دی خدمت کرن لگ پئے آپ دے نال وی امام حسینؑ کلام کردے سن. امام حسینؑ نے آپ نوں ہندوستان اچ سندھ دھرتی جان لئی آکھیا کہ میراؑ وی اوتھے جان نوں بڑا دل کردا سی. شہباز قلندرؒ نوں سندھ وچ رب اکبر تے محمدﷺ تے آل محمدﷺ دا دین پھیلان لئی بھیجیا آپ مروند توں آذربائجان، افغانستان، کشمیر، ملتان دے راہ سندھ سیہون دی دھرتی اُتے پہنچے۔ شہباز قلندرؒ دے کول طوق دا کجھ حصا سی جیہڑا اپنی دھون وچ پائی رکھدے سن اوہ طوق امام سجادؑ نوں کربلا توں شام تیکر پوایا گیا سی. ایہ اک پتھر دی چٹان سی یزید لعنتی دے سپاہیاں نے ایس دا اک پاسا وڈھ کے امام سجادؑ دی دھون اچ پا دتا جس دا وزن ہتھاں تے موڈھیاں اُتے سی. عرب دی ساڑھ دین والی گرمی وچ جدوں طوق گرم ہوندا سی اودوں امام سجادؑ دی دھون تے ہتھاں تے چھالے پے جاندے سن ایس طوق دا ادھا حصا قلیچ بیگ دے دکن اچ تے باقی حصا شہباز قلندر سرکارؒ دے مزار تے لٹکیا ہویا اے. لعل شہباز قلندرؒ نے فرمایا کہ… بعدِ کربلا خوشی حرام است مقصدِ حیات بس یاحسینؑ است شہباز قلندرؒ قلندری رنگ اچ فرماندے نیں کہ سبھ راز دیاں گلاں نیں تے میں ایہناں رازاں تحت نچدا (دھمال) واں. تے دنیا والے مینوں صبح شام ملامت کرن میرے اندر تے محبوب دا عشق اے میں کھلم کھلا سر عام دھمال پاوندا آن نچدا واں تے عشق حسینؑ وچ اپنے آپ نوں بوڑ کے وچ کھڑی جاناں واں کہ دنیا والے مینوں ناں ویکھ سکدے نیں تے ناں سمجھ سکدے نیں. شہباز قلندرؒ اپنا تعارف ایویں کرواندے نیں کہ…. حیدریم قلندرم مستم بنداء مرتضٰی علیؑ ہستم پیشوا تمام رندانم کے سگے کوئے شیر یزدانم ترجما: میں حیدری آں قلندری آں مست آں علی مرتضٰیؑ دا بندہ واں سبھ رنداں دا پیشوا واں کیوں جے علیؑ دی گلی دا سگ آں. حضرت لعل شہباز قلندرؒ نال بہوں معجزے تے واقعے جوڑے جاندے نیں. جنہاں وچ ڈگڈگی وجان والے فقیر نوں بادشاہ بنا کے فیر واپسی ڈگڈگی والا فقیر بنا کہ آکھیا سبھ تماشا اے، سائیں بودلا بہار دے گوشت نوں پکیاں ہویاں ہانڈیاں چوں واپس بلا کے دوجی وار بودلا جیوندا کر دتا، سیہون دے راجے چوپٹ دی ودھدی گستاخی نال جلال اچ آ کے اوس دے محل نوں پُٹھا کر دتا جس نوں اج دنیا دے لوکی اُلٹی بستی دے ناں نال یاد کردے نیں وغیرہ. شہباز قلندرؒ دے وصال دی تورایخ اچ وی اختلاف اے 21 شعبان المعظم 673 ہجری وچ وصال ہویا تے شہباز قلندرؒ دا عُرس ہر ورے 18 توں 21 شعبان المعظم تیکر سیہون شریف سندھ اچ منایا جاندا اے تے سید غلام رضا شیرازی صاحب وی ایس وار اپنا قافلا عباس پور دی دھرتی توں لے کے ٹر پئے نیں تے ایس عُرس وچ پوری دنیا چوں لوک شریک ہون لئی آندے نیں. جام مہر علیؑ در دستم بعد از جام خوردم مستم کمر اندر قلندری بستم از دل پاک حیدریؑ ہستم