’’شالا اوتھے وی پنجاب ہووے‘‘آہ! شوکت علی

لكهت:مطلوب وڑائچ

شوکت علی مرحوم نال میری پہلی ملاقات اج توں تقریباً تن دہائی پہلاں ایس ویلے ہوئی جدوں میں دھونکل موڑ اُتے مریدکے جان لئی کھڑا سی، جتھے میرے دوست طاہر تے صادق اعجاز چیمہ میرا انتظار کر رہے سن کہ یک دم میں اک نکے سارے دھماکے دی اواز سنی تے میں کیہ ویکھنا واں کہ اک کار تے ٹریکٹر ٹرالی دی ٹکر ہو گئی اے میں وی دوجے لوکاں وانگوں حادثے ول نس گیا۔ زخمیاں نوں کار توں کڈیا تے اک لمبے والاں والا بندا وی ایہناں وچ شامل سی۔ خیر اسیں معمولی زخمی ہون والے لوکاں نوں قریبی دکان دی چارپائی اُتے بٹھایا۔ سانوں محسوس ہویا کہ ایمبولینس بلان دی لوڑ نہیں۔ زخمیاں وچوں لمبے والاں والے نے دسیا کہ اوہ مشہور فوک گلوکار شوکت علی اے۔ شوکت علی دا ناں سن دے ای ساڈے ذہن وچ 1965ء دی جنگ دے جنگی ترانے گونجن لگے ، (ساتھیو، مجاہدو، جاگ اٹھا ہے سارا وطن)۔ اسیں شوکت علی تے ایس دے ساتھیاں دی جیہڑی ممکن خدمت سی اوہ کیتی تے جاندے جاندے اوہ مینوں اپنا ٹیلی فون نمبر دے گئے۔ ایہہ شوکت علی نال میری پہلی حادثانی ملاقات سی، فیر ایس دے بعد مختلف موقعیاں اُتے ساڈی ملاقاتاں ہوندیاں رہیاں۔ میری مرحوم شوکت علی نال سوئٹزرلینڈ، یورپ تے امریکہ وچ وی ملاقاتاں ہوندیاں رہیاں۔ بعد وچ چونکہ اوہ وی جوہر ٹائون وچ رہائش پذیر سن تے میں وی جوہر ٹائون لہور وچ رہنا واں۔ ایس لئی ساڈی وقتا فوقتا ملاقاتاں ہوندیاں رہیاں۔ فیر اوہناں نے اپنی دھی دی شادی اُتے مینوں تے جہانگیر بدر (مرحوم) نوں خصوصی طور اُتے مدعو کیتا۔ ہن وی ایہناں دے پتر جیہڑے کینیڈا وچ رہندے نیں ایہناں نال وقتا فوقتا ملاقات ہوندی رہندی اے۔
قارئین!ایہہ تے شوکت علی (مرحوم) نال میرے ذاتی تعلقات دی داستان سی۔ اسیں ہن شوکت علی دی ملی خدمات اُتے نظر مارنے آں۔ شوکت علی اوہ واحد فوک فنکار سی جیہڑا اپنی دھرتی ماں نال عشق دی حد تیکر پیار کردا سی۔ ایہنوں پنجاب دے کلچر، ثقافت، شاعری تے فوک میوزک نال ایس حد تیکر لگائو سی کہ ایس نے لکھاں تے کروڑاں دی پیشکشاں ٹھکرا کے پنجاب دے میلیاں ٹھیلیاں وچ پنجابی رنگ جمان دی ہمیشہ کوشش کیتی۔ سانجھے پنجاب وچ شوکت علی جہیا کوئی فنکار نہ تے پیدا ہویا اے تے کوئی ایس دی تھاں لوے ایس لئی صدیاں دا ویلا درکار اے۔

میں ایہناں دناں چونکہ کینیڈا دے شہر برہمپٹن تے وینکوور وچ آباد سکھاں نال ملدا جلدا رہنا واں جس وی سکھ بھائی ملاقات ہوئے اوہ سب توں پہلے شوکت علی دا ضرور پچھدے نیں۔پنجابی ادب وچ شوکت علی دی ذاتی شاعری دا وی اک بوہت وڈا حصہ شامل اے پر ہیر وارث شاہ، بلھے شاہ تے بابا فریدؒ دے کلام نوں جس طرح شوکت علی نے ایس دی نظیر نہیں ملدی۔ پنجابی ثقافت نال ایس قدر پیار کرن والا ایہہ فنکار اپنی زندگی دے آخر دناں وچ جنہاں مشکلاں دا شکار رہیا ایہناں توں پہلو تہی کرنا یا اکھاں چرانا کسے وی پنجابی لئی ممکن نہیں، فیر حکومت سندھ نے شوکت علی نوں علاج لئی سندھ بلوایا تے ایس دا علاج معالجہ جاری رکھیا پر پنجاب وچ کسے نوں ایہہ توفیق نہیں ہوئی کہ اوہ اپنے ہیرو تے لوک سماج دے بے تاج بادشاہ نوں زندگی دی راہواں وچ درپیش آن والی مشکلاں ونڈ سکدے۔جدوں مینوں ایہناں حالات دی خبر ہوئی تے میں اپنی پارٹی دی مرکزی قیادت احمد رضا وٹو، میاں محمد آصف، پروفیسر طارق جٹالہ تے بابا نجمی نال درخواست کیتی کہ اوہ شوکت علی دے کول جا کے ایس دی عیادت کرن تے شوکت علی نوں دسن کہ پورا پنجاب دل و جان نال ایس دے نال اے۔ پنجاب نیشنل پارٹی دی مرکزی قیادت نے شوکت علی مرحوم نوں ایہہ دسن وچ کوئی کسر اٹھا نہ رکھی کہ پورا پنجاب شوکت علی لئی دعا گو اے۔ شوکت علی دی پنجاب نال محبت وی کسے تعارف دی محتاج نہیں خصوصی طور اُتے جدوں اوہناں نے ایہہ خوبصورت شعر گایا (کوئی پھُل گلاب ہووے ۔۔ربا تیرے کول آواں۔۔۔شالا اوتھے وی پنجاب ہووے)
شوکت علی مرحوم پنجابی زبان، ثقافت تے رسم و رواج دی زبوں حالی اُتے بوہت نالاں سن۔ ایہناں نوں دیگر پنجابی فنکاراں نال وی گلہ سی کہ اوہ پنجابی دی ترویض لئی اپنا کردار ادا کیوں نہیں کردے۔ میری مرحوم شوکت علی نال آخری ملاقات وچ ایہناں دی ایہہ خواہش کہ مینوں پنجاب نیشنل پارٹی دی ہر میٹنگ تے اجلاس وچ بلایا جائے پر اجل نے اجازت نہیں دتی۔ ہن پنجاب نیشنل پارٹی دی مرکزی قیادت نے شوکت علی نوں قومی ہیرو دا درجہ دین دا مطالبہ کیتا اے تے پنجاب نیشنل پارٹی حکومت پاکستان نال وی مطالبہ کردی اے کہ سانجھے پنجاب دے ایس عظیم ہیرو دی زندگی متعلق شیواں نوں قومی درجہ دتا جائے۔ لہور دی کسے معروف شاہراہ نوں شوکت علی دے ناں نال منسوب کیتا جائے تے شوکت علی جہے عظیم فنکار دی خدمات دے صلے وچ ایہناں دا مزار سرکاری نگرانی وچ تعمیر کروایا جائے تے ایہنوں قومی پنجابی ورثہ دا درجہ دتا جائے۔ جیہڑی قوماں اپنے اسلاف تے اپنے ہیروز نوں بھُل جاندیاں نیں ایہناں نوں تاریخ دے ورقیاں وچ لبھنا مشکل ہو جاندا اے۔ پنجاب نیشنل پارٹی نے احمد رضا وٹو ،مدثر اقبال بٹ ،بابا نجمی، میاں محمد آصف تے پروفیسر طارق جٹالہ دی زیر نگرانی اک کمیٹی دا اعلان کیتا اے جیہڑا شوکت علی دے مزار دی تعمیر یقینی بنائے گی۔ جیوی پنجاب، جیوی شوکت علی، جیوے پنجابی سماج، جیوے پاکستان۔